Binaŋ Qâhâc II 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Eme Jerusalem haere ŋecjucfâc jaŋe Joramte ŋokâ ʒâcne Ahaʒia e ŋicwofuŋ âkendâŋnembiŋ. Ŋic guru Araba ŋic jaŋehec teuŋko fisimbiŋ jaŋe ŋokâfâc‐ticne kâcɋene i qâhâmoc‐jopa‐fârembiŋ hâcne. Irec Juda ŋicwofuŋ Joramte ŋokâ Ahaʒiazi ŋicwofuŋ juwec.

²Ahaʒia e jara‐ticne 42 bazurâ ŋicwofuŋ gie‐ticne fuŋkehuc Jerusalem haeo jara mocjaha juwec. E neŋgoc‐ticne ʒâŋene Atalia; Atalia e ine Omirire ŋosa.

³Ahaʒia e neŋgoc‐ticnezi hehesicte mumutâc‐ticne juwecte Ahabare kikefuŋfâc jaŋere kike hata bâjâpewec.

⁴E Ahabare kikefuŋfâc jaŋe embiŋ irec sâc jaha ehuc Wofuŋte ʒâŋe faio wiac mamakâcne ewec. E mamac‐ticne hâmowec irec faicnao jaŋe hâcne dâŋ âzâcnepie mana rereŋ eha sisipiric fuacnewec.

⁵Ahaʒia e jaŋere dâŋ bâjâpehuc Israe ŋicwofuŋ Ahabare ŋokâ Jehoramhec Siria ŋicwofuŋ Haʒaele râsi rocnehuc qaqac eniŋte Ramoti‐Gileade haeo rapic. Rapire Siria ŋic jaŋe Jehoram ʒâpâ qambiŋ.

⁶Eme Jehoram e Siria ŋicwofuŋhec qaqac ehapire Siria ŋic jaŋe Rama haeo ʒâpâ qambiŋ irec wic i somieocte Jesere haeo risiewec. Ehame Juda ŋicwofuŋ Joramte ŋokâ Ahaʒia e Ahabare ŋokâ Jehoramzi huc bame foha honeocte Jesere haeo huwec.

⁷Erâ Ahaʒia e Jehoram iqickeocte rahuc hâmoocte Anutuzi biac mutarame fowec. Irec Ahaʒia e ira hâcne fisirâ Jehoramhec Nimisi ŋokâ‐ticne Jehu râsi rocnehuc rapic. Jehu e Ahabare kikefuŋfâc bâsirowec‐jopaocte Wofuŋzi wokemaŋ ruacnewec.

⁸Eme Jehu e Ahabare kikefuŋfâc dâŋ mutara‐jarehuc juhame Judaŋic fekicne â Ahaʒia hahacfâc‐ticne jaŋere ŋokâfâc jaŋe fisipie honec‐joparâ qâhâmoc‐jopawec. Ahaʒia hahacfâcne jaŋere ŋokâfâc jaŋe e hone maiŋ ecnehuc jumbiŋ.

⁹Eme Jehu e Ahaʒiare babasa gie baku Samaria mâreɋko soŋkerâ juha bâfuarâ bafisipie qâhâmowec. Eme jaŋe ʒiŋuc hâcne muhuc duckembiŋ: “Josafata e maŋ hâcbuc jaha Wofuŋ wira basac ecnehuc juwec ere ŋosa hâcne.” Eme Ahaʒiare kikefuŋfâc jaŋerao ŋic moczi uucmaŋ i soŋaŋkerâ jujure sâc mi ewec.

¹⁰Eme neŋgoc‐ticne Atalia e ŋokâ‐ticne Ahaʒiazi hâmome honerâ izia faharerâ Juda ŋicwofuŋte garikiŋfâc jaŋe ʒeŋgoma bâsirowec‐jopawec.

¹¹Ehame ŋicwofuŋte otâ Josabea eki Ahaʒiare ŋokâ Joasi e ŋicwofuŋte ŋokâfâc gâcne jopazo ehapie jaŋeraonec rorâ soŋaŋ‐ticnehec guŋ fofo ficmaŋ mocko soŋjofawec. Ŋicwofuŋ Joram â Ahaʒia jahere otâ seŋ Josabea e taha bapa Jojadare ŋonâŋ juwecte iŋuc hâcne ehuc motec e Ataliazi qazacte soŋkewec. Eme irec Ataliazi mi qâhâmowec.

¹²Atalia Juda mâreŋko ŋokac wofuŋ juhame motec e Anuture ufuŋko soŋkekicnere jara 6 jaŋehec juwec.