1Ahaʒi e jara‐ticne 20 bazurâ fuŋkerâ ŋicwofuŋ ehuc Jerusalem haeo jara 16 juwec. Ehuc apa‐ticne Dawidizi wiac ewec irec sâcko mi ehuc Wofuŋte ʒâŋe faio wiac ebac eme mi sâckewec.
2E Israe ŋicwofuŋ jaŋere hata bâjâpewec. Ehuc Baali nemu jaŋere biŋe aeŋ me gol rike sueŋkerâ ɋâŋ qâqâtâc ba akic ewec.
3Erâ Hinom ŋokâfâcne jaŋere wâneŋko hosâc âsu rike jujec â Israe ŋic jaŋe ŋic gurune gurune jaŋere mâreŋko raʒiniŋte Wofuŋzi mâreŋ rune jopa jâpec ejarewec jaŋere eebapa repicne i ehuc ŋokâfâcne bâzi rikec‐jopawec.
4Erâ furu mâreŋko â tiki faio erâ jâc dodomanere fuŋnao taha bâzi â hosâc âsu rikehuc juwec.
5Eme irec Wofuŋ Anutu‐ticnezi Siria ŋicwofuŋte meo râeme eki bawahahuc ŋic ŋokacfâc‐ticne guru sâko jâmbâŋ rocjoparâ kâpâcwâru bacjoparâ Damasko haeo amec‐jopa rawec. Erâ Israe ŋicwofuŋte meo wâc râeme eki iŋuc jaha bawahahuc ŋic bocjaha qâhâmoc‐jopawec.
6Erâ jaŋe apa ŋosafâc‐jeŋic jaŋere Wofuŋ Anutu e râpeckembiŋte Remalia ŋokâ‐ticne Pekazi ʒoaŋ mocjahao ŋic tâpiri sâkohec 120 tauseŋ Juda mâreŋko qâhâmoc‐jopawec wâc.
7Ehame Eferaim ŋic tâpirihec, ʒâŋene Ʒikiri, eki ŋicwofuŋte ŋokâ Maseja â ŋicwofuŋ ficticnere micne Aʒarikam â ŋicwofuŋte mefâro Elikana jaŋe qâhâmoc‐jopawec.
8Eme Israe ŋic jaŋe qomâfâc‐jeŋic jaŋere ŋokac naru motec 200 tauseŋ kâpâcwâru bacjoparâ amec‐jopa rambiŋ. Jaŋe mafa mateŋ‐jeŋic jowac rorâ Samaria mâreŋko barambiŋ.
9Ehame Wofuŋte porofete moc, ʒâŋene Odede e ira juwec. Eki hâcne momori guru Samaria mâreŋko risiembiŋ jaŋe bâfuac‐jopaocte rawec. Ra bâfuac‐joparâ ʒiŋuc jazawec: “Manaŋgopieŋ, apa ŋosafâc‐ŋeŋic jaŋere Wofuŋ Anutu e Judaŋic jaŋere aarickeme ŋoŋere meo râec‐jopawec. Ehame ŋoŋe aaricko jopapie sesuc sembureŋ fewec.
10Eme ʒi Juda mâreŋkonec ŋic â ŋokac â Jerusalem hae rune jaŋe kiŋaŋ qaqafâc‐ŋeŋic bacjopaniŋte gie baŋgopieŋ i ŋoŋe ŋaŋacne sâqocnere kiŋ Wofuŋ Anutu‐ŋeŋictao mi fokacte iŋuc eŋgopieŋ me?
11Irec ʒi hazec râerâ mananiŋ: Ŋoŋe soctofafâc‐ŋeŋic kâpâcwâru bacjoparâ amec‐jopa warembiŋ jaŋe bârisiec‐jopaniŋ. Wofuŋ kimbeŋ‐ticnere ʒocbâruŋzi fai‐ŋeŋicko fekac hâcne.”
12Eme Eferaim ŋic fekicne kecʒiŋuc jaŋe bafickehuc ʒikaonec warembiŋ ŋic i jaŋe dâŋ mujarehuc domambiŋ: Johanaŋ ŋokâ‐ticne Aʒaria â Mesilemoti ŋokâ‐ticne Berekia â Salumte ŋokâ Jehiʒikia â Hadelaire ŋokâ Amasa.
13Ehuc ʒiŋuc jazambiŋ: “Ŋoŋe kâpâcwâru ŋic ʒira mi bacjopa warenʒepieŋ. Ŋoŋe Wofuŋ bunao bahuc kiŋ bahac‐nâŋec fokacko jaha ʒuhuckerâ kiŋ fai‐nâŋecko hezo eŋgopieŋ hâcne. Kiŋnâŋec ŋemâcnea fuawec fokacte Wofuŋ aaric‐ticnere ʒocbâruŋzi Israe ŋic nâŋâcne faio biac fewec fokac hâcne.”
14Iŋuc mupie momori jaŋe kâpâcwâru ŋic â mafa mateŋ wiac rombiŋ i ŋic fekicne â kikefuŋ jaŋere maŋfuŋko guruckembiŋ.
15Ehame ŋic ʒâŋe‐jeŋic mupie sâc faharerâ momori jaŋe mafa mateŋ wiac bawarembiŋ irecnec rorâ kâpâcwâru ŋic jaŋeraonec gâcne biuctac jumbiŋ jaŋe ŋaqi qoruc hejarepie huwec. Ehame gâcne sâko jaŋe wâc ŋaqi qoruc â kikehuhu hejarepie hume ficko râec‐jopahuc nânâ opâ gumec‐jopambiŋ. Ehuc betaŋkekicne jaŋe ine doŋgi faio râec‐joparâ mocwâc soctofafâc‐jeŋic jaŋerao Jeriko hâmu gie hae ira bacjopa rambiŋ. Ra râec‐joparâ mocwâc Samaria mâreŋko risiembiŋ.
16Eme dameŋ ira ŋicwofuŋ Ahaʒi e Asiria ŋicwofuŋzi bafickeocte erao dâŋ râeme rawec.
17Edomŋic jaŋe Juda mâreŋko râsi mocwâc fisirâ bawahac‐jopahuc kâpâcwâru bacjoparâ amec‐jopa rambiŋte iŋuc ewec.
18Ehame Filisa ŋic jaŋe Sefela â Juda mâreŋ dâkâne moc Negebe ira hae ŋerawecko râsi fisimbiŋ. Ehuc hae ʒiŋuc rombiŋ: Bete‐Semesi, Ajaloŋ â Gedoroti, erâ Soko â hae piticfâcne, Timina â hae piticfâcne erâ Gimiʒo â hae piticfâcne. Iŋuc erâ ira ŋesanaŋkembiŋ.
19Juda ŋicwofuŋ Ahaʒi e wiac gâgâpâcne ehuc Wofuŋtao mi siŋkewecte Wofuŋzi Judaŋic bâuruŋ‐jopawec hâcne.
20Irec Asiria ŋicwofuŋ Tigela‐Pilese e mi bafickehuc râsi fisicnerâ ecneme fific guguriŋ faio juwec.
21Iŋuc ecneme Wofuŋte ufuŋkonec â ŋicwofuŋte fickonec â ŋic fekicne jaŋere fickonec boreŋ wiac gâcne rorâ Asiria ŋicwofuŋ sahac taha‐ticne râcnewec. Eki ine sifu mi bafickewec.
22Ŋicwofuŋ Ahaʒi e fific guguriŋte faio juhuc Wofuŋtao moc mi siŋke‐jâmbâŋkewec.
23Ehuc Damasko ŋic jaŋe e bawahambiŋ jaŋere nemufâc taha bâzi rike‐jarehuc ʒiŋuc muwec: “Siria ŋicwofuŋ jaŋere nemufâc jaŋe bafic‐jopambiŋte no taha bâzi rike‐jarepe baficnunʒepieŋ wâc.” Ehame jaŋe sifu e â Israe ŋic sasawa sipiric‐jopambiŋ.
24Eme Ahaʒi e Anuture ufuŋko râqâc wiac i qânusucke‐fârerâ piic piic henʒaŋ qanʒaŋneme fewec. Ehuc Wofuŋ ufuŋ‐ticnere motâc i hefârewec. Erâ Jerusalem hae tuturuŋne tuturuŋne ira e jahacne alata barawec.
25Ehuc Juda hae ŋerawec sâc ira nemu gâcne hosâc âsu ririke‐jarere furu mâreŋ barawec; iŋuc ehuc apa ŋosafâc‐ticne jaŋere Wofuŋ Anutu maŋbâiŋ ecnewec.
26Eme juju â eebapa‐ticnere dâŋ gâcne sasawa i fuŋnaonecteaŋ ninic jaha Juda â Israe Ŋicwofuŋ jaŋere Papia Qizecko qâreŋke‐fârekicne.
27Eme Ahaʒi e apa ŋosafâcne jaŋerao ʒuhuckehuc hâmome Israe ŋicwofuŋ jaŋere ʒâŋeruŋko mi barahuc Jerusalem haeoa duckembiŋ. Ehame ŋokâ‐ticne Hisikiazi tucticne qarâ ŋicwofuŋ juwec.
