1Joasi e jara‐ticne 7 bazurâ fuŋkerâ ŋicwofuŋ ehuc Jerusalem haeo jara 40 juwec. Neŋgoc‐ticne ʒâŋene Zibia e Bere‐Seba haeonec.
2Joasi e taha bapa Jojadare dameŋko Wofuŋte ʒâŋe faio wiac sasawa ebac eme sâcke‐fârewec.
3Eme Jojadazi ŋonâŋ jajahec bâfuacneme otâ ŋokâfâcne fuambiŋ.
4Joasi e juku Wofuŋte ufuŋ bâpiaŋkeocte mupaŋkewec.
5Irec taha bapa â Lewiŋic qâzuc‐joparâ ʒiŋuc jazawec: “Ŋoŋe Juda hae sâc rahuc jara sâc Anutu‐ŋeŋicte ufuŋ bâpiaŋkezo irec moneŋ i Israe ŋic jaŋeraonec ro qânusuc eniŋ. Erâ i biac efârenʒepieŋ.” Iŋuc jazame Lewiŋic jaŋe ine biac jaha mi embiŋ.
6Irec ŋicwofuŋzi taha bapa micne Jojada e hefârerâ ʒiŋuc âzâcnewec: “Go wemocte Lewiŋic ejaretec Wofuŋte kiŋaŋŋic Mosezi Israe kikefuŋ mupaŋke‐jarewec irec sâcko Juda â Jeruslem hae rune jaŋeraonec ʒâʒâfic bozere moneŋ mi bafisiŋgopieŋ?”
7Ŋokac repicne Atalia ere ŋokâfâc jaŋe hâcne Anuture ufuŋko raʒimbiŋ. Ehuc wâc Wofuŋte ufuŋko wiac bâtirikicne fowec i rorâ Baali nemu jaŋere biŋe qambiŋ.
8Eme ŋicwofuŋzi mume jaŋe katapa moc barâ Wofuŋte ufuŋ sahacnao hepie ŋewec.
9Eme Juda mâreŋ â Jerusalem haeonec ŋic jaŋe, Anuture kiŋaŋŋic Mose e mâreŋ burocnao Israe ŋic jaŋe moneŋ râeniŋte mujarewec irec sâc Wofuŋte taha bafisiniŋte dâŋ musawepie rawec.
10Ehame ŋic fekicne â ŋic ŋokac omane jaŋe afeckehuc moneŋ bafisirâ katapao râepie hujujec.
11Eme Lewiŋic jaŋe katapao moneŋ bocjaha eme honerâ katapa rorâ ŋicwofuŋte fekicnefâc jaŋerao bafisi jumbieŋko ine ŋicwofuŋte qâqâreŋ ŋic â taha bapa micne ere babafic moc jahe moneŋ rohuc katapa i mocwâc ŋeŋe‐ticnao barisie jupirec. Jaŋe ʒoaŋne ʒoaŋne iŋuc ehuc moneŋ mâretec qâzucke jumbieŋ.
12Eme ŋicwofuŋ â Jojada jahe moneŋ i Wofuŋte ufuŋ bâbâpiaŋkere gie qizeckembiŋ jaŋe jare jupirec. Eme jaŋe Wofuŋte ufuŋ bâpiaŋkeniŋte qânâ rârâe â fic bapa ŋic erâ wâc aeŋ â aeŋ bâbâroŋzi gie bapa ŋic jaŋe mâmâc Wofuŋte ufuŋ bâpiaŋkeniŋte rocjopambiŋ.
13Eme ŋic gie qizeckembiŋ jaŋe soŋaŋ‐jopahapie ufuŋ bâbâpiaŋ gie bambiŋ. Eme Anuture ufuŋ i mârâc ŋewec irec sâc baku batakirepie ŋewec.
14Jaŋe baku bafârerâ moneŋ tiwâne fowec i ŋicwofuŋ â Jojada jaherao bârisiembiŋ. Eme moneŋ izi ine Wofuŋ ufuŋ‐ticnere wiac gâcne ʒiŋuc bambiŋ: Taha giere â qowi bâzi ririkere â hosâc âsu ririkere oto â râqâc erâ wâc gol â siliwa râqâc wiac mâmâc. Eme jaŋe Jojadare dameŋko Wofuŋte ufuŋko qowi bâzi ʒuʒuhuc jaha rikehuc jumbiŋ.
15Juku Jojada e ŋicqizec jâmbâŋ erâ jara 130 bazurâ hâmowec.
16E Anutu araŋ bacnehuc ufuŋ‐ticnao â Israe ŋondeŋko wiac biaŋne ewecte Dawidire hae qizecko ŋicwofuŋ jaŋere ŋondeŋko duckembiŋ.
17Jojada hâmome Judaŋic fekicne jaŋe fisirâ ŋicwofuŋ fodapecnepie mana‐jarewec.
18Eme jaŋe apa ŋosafâc‐jeŋic jaŋere Wofuŋ Anutu e râpeckehuc ɋâŋwâtuŋ â ɋâŋ qâqâtâc wiac gâcne kiŋaŋ qajarembiŋ. Ehame kiŋjeŋic irec erâ Wofuŋte kimbeŋzi Judaŋic â Jerusalem hae rune jaŋere faio fewec.
19Erâ sifu Wofuŋ e jahacnao mocwâc bârisiec‐jopaniŋte porofete sorec‐jopawec. Eme jaŋe fuŋne ritu‐jarepie sifu dâŋjeŋicte hazec mi râembiŋ.
20Iŋuc epie Anuture Mârozi taha bapa Jojadare ŋokâ Ʒekaria neŋgoc ŋesiŋ ŋecneme ŋic ŋokac jaŋere maio fahare domahuc ʒiŋuc jazawec: “Anutuzi ʒiŋuc mukac: ‘Ŋoŋe wemocte Wofuŋte sâcmutâc i huckehuc sâcne mi juhâmoŋgopieŋ? Ŋoŋe Wofuŋ râpeckembiŋte eki wâc iŋuc jaha râpec‐ŋopawec.’”
21Iŋuc jazame jaŋe roroc erâ râsi rocnembiŋ. Erâ ŋicwofuŋzi mume Wofuŋ ufuŋ‐ticnere hae ʒoŋao qânâzi hehâmombiŋ.
22Ŋicwofuŋ Joasi e Ʒekaria mamac‐ticne Jojadazi ehâmocnewec irec mocwâc mi manasuhuc ŋokâ‐ticne qâhâmowec. Eme Ʒekaria e hâmohuc ʒiŋuc muwec: “Wofuŋzi honehuc okacne bazuzejec.”
23Eme jara tataranao Siria momori ŋic jaŋe Joasi râsi rocnehuc fisimbiŋ. Jaŋe Juda â Jerusalem haeo fisirâ ŋic ŋokac fekicnefâc‐jeŋic bâsirowec‐jopa‐fârerâ jaŋere mafa mateŋ sasawa i Damasko ŋicwofuŋtao râepie rawec.
24Siria momori ŋic jaŋe afecne sawa fisimbiŋ, erâ ine Judaŋic jaŋe apa ŋosafâc‐jeŋic jaŋere Wofuŋ Anutu râpeckembiŋte Wofuŋzi Juda momori ŋic bocjaha jâmbâŋ Siria ŋic jaŋere meo râec‐jopawec. Eme jaŋe Joasi ʒika okac bazucnembiŋ.
25Ehuc ʒâpâ qarâ beherâ rambiŋ. Ehame momori micnefâc‐ticne jaŋe taha bapa Jojada ŋokâ‐ticnere socte erâ râsi roroc ehuc fofo‐ticnaoa qâhâmopie fowec. Eme Dawidire hae qizecko duckembiŋ. Erâ i ŋicwofuŋ jaŋere ʒâŋeruŋko mi duckembiŋ.
26Soŋsoŋko râsi rocnepic ine ŋic kecʒi jahe: Amoŋ ŋokac Sineati ere ŋokâ Ʒabadi â Moabi ŋokac Ʒimiri ere ŋokâ Joʒabada.
27Eme ŋokâfâcne jaŋere dâŋ binaŋ â e jahacne binaŋ, erâ Anuture ufuŋ bâpiaŋkekicne irec binaŋ i Ŋicwofuŋ jaŋere Papia Qizecko mumuburocko qâreŋke‐fârekicne. Ehame ŋokâ‐ticne Amaziazi tucticne qarâ ŋicwofuŋ juwec.
