1Eme irec faicnao Moabi ŋic â Amoŋŋic, erâ Meuni ŋic gâcne jaŋe mâmâc Josafatahec qaqac eniŋte râsi rocnehuc fisimbiŋ.
2Ehame ŋic gâcne jaŋe warerâ Josafata ʒiŋuc âzâcnembiŋ: “Ŋic guru sâko jâmbâŋ hâwec ocniŋuc Edom mâreŋkonec go râsi rogarehuc fisiŋgopieŋ. Erâ manakic, jaŋe biac Hazezoŋ‐Tama, Eŋgedi hae hâcne, ira fisiŋgopieŋ.”
3Iŋuc mupie Josafata e hâwickeme Wofuŋ wira basac ecneocte manasuwec. Ehuc nânâ sowa juniŋte mume Juda mâreŋ sâcke‐fârewec.
4Eme Judaŋic jaŋe Wofuŋtaonec babafic fuaocte tumaŋnembiŋ, ehuc Juda hae sâc irecnec ŋic jaŋe Wofuŋ wira basac ecneniŋte fisimbiŋ.
5Eme Josafata e Wofuŋte ufuŋko hae ʒoŋa ɋâricne maickerâ Juda â Jerusalem kikefuŋ jaŋere ŋondeŋko fahare domawec.
6Ehuc muwec, “O apa ŋosafâc‐nâŋec jaŋere Wofuŋ Anutu, go sambâŋko Anutu jukomec hâcne. Ehuc ŋic gurune gurune jaŋere uucmaŋ wâc qaŋeŋkeekic. Erâ megao tapiri â sasanaŋ fokac, irec ŋic moczi sâcne mi bawahacguocmu.
7O Anutu‐nâŋec, go Israe ŋicfâcge jaŋere ʒâŋe faio mâreŋ ʒirec rune jopa jâpec ejaremeŋ. Ehuc âgoge Abraham ere ɋâricfâc tahac‐jopa sanaŋkemeŋ.
8Eme jaŋe ira ŋeŋe juju ewarehuc jueŋgopieŋ, erâ ʒiŋuc muhuc ʒâŋegere furufic moc bagarembiŋ:
9‘Nâŋerao wiac repicne, ʒika me mumutara me hucukic me roroc fuaocmuo ine ufuŋ ʒira ʒâŋege fokacte nâŋe ufuŋ ʒi maickerâ gore maio domahuc fific guguriŋ‐nâŋecte maŋko kio wâwâsic egarepene manarâ ŋezic‐nâpozemec.’
10Erâ manakic, Israe ŋic jaŋe Aigita mâreŋkonec wefumbiŋ dameŋ ira go Amoŋŋic â Moabi ŋic erâ Seiri tikiŋic jaŋere mâreŋko mi raʒiniŋte aka hejaretec moc mi bâsirowec‐jopahuc behec‐joparâ warembiŋ.
11Ʒi ine honekic, jaŋe i mana‐bipiehuc hae mâreŋge tahac‐nâpomeŋ ʒirecnec nâpo jâpec enâreniŋte wareŋgopieŋ.
12O Anutu‐nâŋec, go jaŋerao mumutara gie bac. Nâŋe ŋic guru sâko jâmbâŋ râsi fisi‐nâreŋgopieŋ ʒi jaŋere sâc mi eŋgopeneŋ. Nâŋe weniŋuc enaŋmu i mi manaŋgopeneŋ, irec gorao fipene fakac.”
13Eme Judaŋic ʒeŋgoma jaŋe ŋokac naru motecfâc‐jeŋic jaŋehec Wofuŋte maio domambiŋ.
14Ehame Asafare ɋâricfâc jaŋeraonec Lewiŋic moc ʒâŋene Jahaʒiele, Ʒekariare ŋokâ â Benaja, Jeiele â Matania jaŋere apa ŋosa Wofuŋte Mârozi baafeckeme kikefuŋ jaŋere ŋondeŋko fahare domawec.
15Ehuc ʒiŋuc muwec: “Judaŋic sasawa â Jerusalem haere ŋecjucfâc, erâ ŋicwofuŋ Josafata ŋoŋe mananiŋ: Wofuŋ e ŋoŋe dâŋ ʒiŋuc ŋazakac: ‘Ŋic guru sâko kecʒi jaŋere mi hâwic‐ŋopaoc â memeŋ garu wâc mi eniŋ. Ʒika i ŋoŋe qaniŋte mâcne, Anutuzi qaocte fuakac hâcne.
16Irec tomâcko râsi rojarehuc hunʒepieŋ. Manaŋgopiŋ, jaŋe Zizi heâŋko wefuniŋmu. Eme ŋoŋe ine Jeruele mâreŋ burocne irec ʒoaŋ wewefunaopec wâneŋ mickekac ira bâfuac‐jopaniŋmu.
17Ŋoŋe ʒika ʒi mi qaniŋmu. O Juda â Jerusalem ŋic, ŋoŋe dodoma‐ŋeŋicko qiriŋ tâmiric domahuc Wofuŋzi âkehoc‐ŋoparâ ʒika qahuc sanaŋkeme honenʒepieŋ.’ Mi hâwic‐ŋopaoc â memeŋ garu mi eniŋ. Ŋoŋe tomâcko râsi rojarehuc ranʒepieŋ, eme Wofuŋzi ŋoŋehec juocmu.”
18Iŋuc mume Josafata e daperâ ʒâŋe mai‐ticne mâreŋko hetutuckewec. Ehame Judaŋic sasawa â Jerusalem hae rune jaŋe wâc Wofuŋ wira wâwâsic ecnehuc Wofuŋte maŋfuŋko fodapembiŋ.
19Ehame Kohati â Korare guruonec Lewiŋic jaŋe Israere Wofuŋ Anutu muteŋkeniŋte owa ruruckehuc faharembiŋ.
20Eme jaŋe furic uupictea faharerâ Tekoa mâreŋ burocnaopec rambiŋ. Jaŋe rahuc rahuc Josafata e domarâ muwec, “Juda â Jerusalem haere ŋecjucfâc ŋoŋe mananiŋ. Ŋoŋe Wofuŋ Anutu‐ŋeŋic manasiŋkepie dope hutuŋ eŋareocmu. Erâ porofetefâc‐ticne jaŋerao siŋkehuc juhâc qâhâmoniŋmu.”
21Iŋuc jazarâ ŋic jaŋehec muc manac erâ ŋic tiri ŋaqi‐jeŋic rojuhuc momori ʒikare ʒawiembiŋ jaŋe bânie‐jarehuc Wofuŋ gae hecneniŋte âkendâŋ‐jopawec. Eme jaŋe gae ʒiŋuc hembiŋ: “Wofuŋ daŋge âzâcnenaŋ, e aki anonoc‐ticne fohuc juocmu sanaŋ.”
22Jaŋe fuŋkerâ gae hehuc muteŋkehapie Wofuŋzi Amoŋ â Moabi â Seiri tiki mâreŋkonec ŋic Judaŋic râsi fisi‐jarembiŋ jaŋe somâc‐jopaniŋte ŋic guru moc ejareme fisirâ ima samaki bacjopambiŋ.
23Ehame Amoŋ â Moabi ŋic jaŋe faharerâ Seiri tiki mâreŋkonec ŋic i jopaku jopa miziembiŋ. Erâ Seiri mâreŋte ŋecjucfâc‐ticne jaŋe omaec‐joparâ risie jaŋe jaŋaczia qaqac ehuc qâqâmiziec embiŋ.
24Ehame Judaŋic jaŋe mâreŋ burocnao ruc bapa ŋic jaŋere ficko fisirâ domahuc ŋic guru sâko jaŋerao fipie rawec. Ehuc mâreŋko qâŋɋâŋ forapie honec‐jopambiŋ; moczi moc mi wisewec.
25Eme Josafata â ŋicfâcne jaŋe mafa mateŋ wiac‐jeŋic roniŋte fisirâ honepie bulimakao guru sâko jâmbâŋ, mafa â ŋaqi qoruc â wiac furi sâko forawec. Eme i hâcne aŋe jaŋacne biŋe eocte roipiembiŋ. Bocjaha jâmbâŋte roipiehuc juhapie ʒoaŋ gie bapa jahec â moc tarawec.
26Eme ʒoaŋ gie bapa jahec â jahec ira jaŋe Beraka wâneŋko tumaŋnehuc Wofuŋ muac baafec ecnembiŋ. Eme jaŋe mâreŋ ŋondeŋ irec ʒâŋe Beraka Wâneŋ mumbiŋzi dameŋ ʒi muhuc juŋgopieŋ jaha.
27Eme Josafatazi Judaŋic â Jerusalem hae rune micne bajareme risiembiŋ. Jaŋe Wofuŋzi bufahac qajareme kisâfâc‐jeŋic jaŋere erâ ʒeri bari ehuc Jerusalem haeo risiembiŋ hâcne.
28Ehuc Jerusalem haeo Wofuŋte ufuŋko gita kulele â qeŋhec fisimbiŋ.
29Ehame mâreŋ sâc irec ŋicwofuŋ jaŋe Wofuŋzi Israe ŋic jaŋere kisâfâc jopawec irec biŋe manarâ Anuture hâwic‐jopawec.
30Eme Josafata e Anutu‐ticnezi rârec rârec ira wama bâfuacnewecte uucmaŋ‐ticnao ʒikare fânâŋ mocwâc mi fuawec.
31Josafata e iŋuc hâcne ehuc Judaŋic jaŋere ŋicwofuŋ juwec. E jara‐ticne 35 bazurâ fuŋkerâ ŋicwofuŋ ehuc jara 25 Jerusalem haeo juwec. Neŋgoc‐ticne ʒâŋene Aʒuba e Silehire otâ.
32Josafata e mamac‐ticne Asare kike hata i moc mi âte sifuckehuc ijaha bâjâpewec. Ehuc Wofuŋte ʒâŋe faio wiac sasawa ebac eme sâcke‐fârewec.
33Erâ sifu furu mâreŋ i mi bârârie‐fârewec, â ŋic ŋokac jaŋe maŋjeŋic apa ŋosafâc‐jeŋic jaŋere Anutu erao râepie wâc mi domawec.
34Eme Josafatazi wiac sasawa ebac ewec i fuŋnaonecteaŋ ninic jaha Hanani ŋokâ‐ticne Jehure binaŋko qâreŋke‐fârekicne. Eme juku Israe Ŋicwofuŋ jaŋere Papia Qizecko wâc qâreŋkekicne.
35Eme irec faicnao Juda ŋicwofuŋ Josafata e Israe ŋicwofuŋ Ahaʒiarao ʒuhuckewec. Ahaʒia e ine wiac mamakâcne ehuc juwec.
36Eme Josafata e Ahaʒia bafickeme woke jaŋe Tarasisi mâreŋko raniŋte bocjaha bapic. Jahe woke bapa gie i Ezioŋ‐Gebe haeo bahuc jupic.
37Ehame Maresa haeonec ŋic moc ʒâŋene Dodawahu ere ŋokâ Elieʒezi Josafatare findaŋdâŋ ʒiŋuc muwec: “Go Ahaʒiahec ʒuʒuhuc epicte Wofuŋzi wiac bakomec i bâsiroweocmu.” Ehame woke jaŋe fâucke ʒaŋ embiŋte Tarasisi mâreŋko raniŋte eipiembiŋ.
