1Manase e jara‐ticne 12 bazurâ fuŋkerâ ŋicwofuŋ ehuc Jerusalem haeo juhame jara 55 tarawec.
2Manase e Israe ŋic jaŋe ŋic gurune gurune jaŋere mâreŋko raʒiniŋte Wofuŋzi mâreŋ rune jopa jâpec ejarewec jaŋere eebapa repicne i Wofuŋte ʒâŋe faio ebac ewec.
3Erâ mamac‐ticne Hisikiazi furu mâreŋ hetâtie‐fârewec i mocwâc heɋârerâ bahuc Baali nemu jaŋere alata barawec. Erâ Asera nemuɋâŋ herâ âkendâŋnehuc sambâŋko bâpiŋ guru dindiŋ jaŋe dape‐jarehuc kiŋaŋ qajarewec.
4Erâ Wofuŋte ufuŋko alata bame ŋerawec. Alata iŋucnere hâcne Wofuŋzi ʒiŋuc muwec: “Jerusalem haeo nore ʒâŋezi sawa raŋɋa raŋɋa fohuc juzejec.”
5Erâ Wofuŋte ufuŋ irec hae ʒoŋa jajahec ira sambâŋko bâpiŋ guru dindiŋ jaŋere alata bame ŋerawec.
6Erâ ŋokâfâc‐ticne qâhâmoc‐joparâ Hinom ŋokâ‐ticnere wâneŋko taha bâzi rikec‐jopawec. Erâ faŋfaŋ â sowidâŋ mumu i mu bac ehuc faŋfaŋ dâŋ mumu â qaŋgec bapa ŋic jaŋehec muc manac ewec. E Wofuŋte ʒâŋe faio hehesic boc ehuc Wofuŋ maŋbâiŋ ecnewec.
7Ehuc Wofuŋ e Dawidi â ŋokâ‐ticne Salomo ufuŋte dâŋ ʒiŋuc jasawec, i Manasezi qâsuarâ nemure ɋâŋ qâqâtâc ba akic erâ Anuture ufuŋko heme ŋewec: “Ʒâŋe‐nanezi ufuŋ â hae ʒira raŋɋa raŋɋa foocte Israe gurune gurune jaŋeraonec Jerusalem hae bâwosâepo.
8Erâ no Israe ŋic apa ŋosafâc‐jeŋic mâreŋ jarepo irecnec ejarepe kosa rac warec mocwâc mi eniŋmu. Jaŋe wiac sasawa mutâcne‐jarepo irec sâcko aimuŋ jaha ebac ehuc Mosere micko sâcmutâc â dâŋsanaŋ â mumutâc jarepo i mana rereŋ eniŋmuo ine iŋuc hâcne fuaocmu.”
9Ehame Manasezi Judaŋic â Jerusalem haere ŋecjucfâc bâdoc‐jopame jaŋe Wofuŋzi Israe ŋic jaŋere maio ŋic gurune gurune bâsirowec‐jopawec, i jaŋere hehesic sirickehuc eŋɋârâŋkembiŋ.
10Wofuŋzi Manase â ŋicfâc‐ticne dâŋ jazawec irec hazec mi râembiŋ.
11Irec Wofuŋzi Asiria ŋicwofuŋte momori micnefâc jaŋerao râec‐jopame jaŋe Manase hawiczi rorâ aeŋ bâbâroŋzi kâpâcwaru bakicne izi me kikene qarâ Babe mâreŋko barambiŋ.
12Eme e fific guguriŋte maŋnao juhuc Wofuŋ Anutu‐ticneraonec aki wama bâfuaocte kio wâwâsic ecnewec. Ehuc apa ŋosafâc‐ticne jaŋere Anuturao boc rume‐jâmbâŋkewec.
13Erâ numucneme Anutuzi nunumu â kio wâwâsic‐ticne manarâ uucmaŋ‐ticnao Jerusalem haeo mocwâc bârisiewec. Iŋuc ecneme Manasezi, Wofuŋ e Anutu, i mana tarawec.
14Eme e juku Dawidire hae qizec râpenao ira Gihoŋ opâ ʒoaŋ huhunaopec wâneŋko Hâwec Qowi Motâckopec haesac moc bawec. Erâ Ofele mâreŋ i bârâreckehuc bame fejâmbâŋkewec. Erâ wâc Juda hae basanaŋkekicne ŋerawec ira momori micnefâc‐ticne râec‐jopa rawec.
15Erâ Wofuŋte ufuŋko nemu jabane â ɋâŋ qâqâtâc ŋerawec i hetâtierâ Wofuŋ ufuŋ‐ticnere tikio â Jerusalem haeo e jahac alata bame ŋerawec i hetâtie‐fârerâ hae sahao behewec.
16Iŋuc erâ Wofuŋte alata i mocwâc heɋârehuc irec faio wama bâzi â daŋge bâzi rikewec. Ehuc Judaŋic jaŋe Israere Wofuŋ Anutu e sawa kiŋaŋ qacnehuc juniŋte mujarewec.
17Erâ sifu ŋic ŋokac jaŋe furu mâreŋko taha bâzi rikehuc jumbiŋ jaha; erâ i Wofuŋ Anutu‐jeŋicte sawa manasuhuc rikembiŋ.
18Eme Manasezi wiac sasawa ebac ewec â Anutu‐ticne numucnewec, erâ findaŋdâŋ mumu ŋic jaŋe Israere Wofuŋ Anuture ʒâŋeo dâŋ âzâcnembiŋ i Israe Ŋicwofuŋ jaŋere Binaŋ Qâhâcko qâreŋke‐fârekicne.
19Erâ nunumu‐ticne â Anutuzi nunumu‐ticne manawec irec binaŋ â Wofuŋtao mi siŋkehuc wiac sâqocne ewec, erâ rumewec irec juwicnao Aserim nemuɋâŋ â ɋâŋ qâqâtâc wiac bame ŋerawec i Findaŋdâŋ Mumu Ŋic jaŋere Binaŋ Qâhâcko qâreŋkekicne wâc.
20Manase e juku apa ŋosafâc‐ticne jaŋerao ʒuhuckehuc hâmome jaŋe ficticnaoa duckembiŋ. Ehame ŋokâ‐ticne Amoŋzi tucticne qarâ ŋicwofuŋ juwec.
21Amoŋ e jara‐ticne 22 bazurâ fuŋkerâ ŋicwofuŋ ehuc jara jajahec Jerusalem haeo juwec.
22E mamac‐ticne Manasezi ewec irec sâc jaha ehuc Wofuŋte ʒâŋe faio wiac mamakâcne ewec. Ehuc mamac‐ticne Manasezi ɋâŋ qâqâtâc bame ŋerawec i jaŋe taha bâzi rike‐jarehuc kiŋaŋ qajarewec.
23Erâ e mamac‐ticne Manasezi rumewec irec sâc Wofuŋte maio mi rumewec. E iŋuc ehuc kiŋ ŋemâcnea hurewec.
24Eme kiŋaŋ qaqafâc‐ticne jaŋe kamierâ râsi rocnehuc ficticnao qâhâmombiŋ.
25Eme ŋic ŋokac jaŋe moc faharerâ ŋicwofuŋ Amoŋ qâhâmombiŋ ŋic i jaŋe qâhâmoc‐jopambiŋ wâc. Ehuc ŋokâ‐ticne Josiazi tucticne qarâ juocte ŋicwofuŋ âkendâŋnembiŋ.
