Binaŋ Qâhâc II 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Eme Uʒija e jara‐ticne 16 bazume Juda ŋic ŋokac jaŋe rorâ mamac‐ticne Amaziare tuc qarâ juocte ŋicwofuŋ âkendâŋnembiŋ.

²Ŋicwofuŋ Amazia e apa ŋosafâc‐ticne jaŋerao ʒuhuckehuc hâmome duckembiŋ irec faicnao Uʒija e Eloti hae bara Judaŋic bârisie‐jarewec.

³Uʒija e jara 16 bazurâ fuŋkerâ ŋicwofuŋ ehuc Jerusalem haeo juhame jara 52 tarawec. Neŋgoc‐ticne ʒâŋene Jekolia e Jerusalem haeonec.

⁴Eme Uʒija e mamac‐ticne Amaziazi ewec irec sâc jaha ehuc Wofuŋte ʒâŋe faio wiac sasawa ebac eme sâcke‐fârewec.

⁵E Anutu araŋ bacnehuc juocte Ʒekariazi âzâcne qazuc ewec, ehame e jahac Anutu wira basac ecnehuc juocte mupaŋkewec. Eme Wofuŋ wira basac ecnehame Anutuzi jujuhâmo bâfuacnewec.

⁶Eme e rarâ Filisa ŋic jaŋehec qaqac embiŋ, eha hae ʒiŋuc jaŋere sac heropiewec: Gati, Jabane â Asidode. Erâ Asidode hae rârec rârec mâreŋ forawec ira mecne â Filisa mâreŋ gâcnao wâc mâmâc hae barawec.

⁷Eme Filisa ŋic â Araba ŋic Guru‐Baali mâreŋko jumbiŋ, erâ Meuni ŋic jaŋe jopaocte Anutuzi bafickewec.

⁸E boc sanaŋke‐jâmbâŋkewecte ʒâŋe biŋe‐ticnezi Aigita mâreŋ mao fisiwec, ehame Amoŋŋic jaŋe sahac taha râcnehuc jumbiŋ.

⁹Eme Uʒija e Jerusalem haeo Tuturuŋ Motâcko â Wâneŋ Motâcko â Titiki Motâcko ʒae bahuc basac qasanaŋkewec.

¹⁰Erâ e lama bulimakao guru sâko Sefela mâreŋko â wâneŋko jucnembiŋte mâreŋ burocnao ficʒora bame ŋerame opâ nombâŋ bocjaha rorawec. E gie hesaracte aŋac sâko boc focneme hesarac ŋic waiŋ gie soŋaŋkecneniŋte tiki mâreŋko â wâneŋko jumbiŋ.

¹¹Erâ Uʒija e momori guru moc ʒika qaqare sâc jucnembiŋ wâc. Ehame qâqâreŋ ŋic Jeiele â ŋic fekicne Maseja jahe gurune gurune biric‐jopahapire ŋicwofuŋte momori micne jaŋeraonec moc ʒâŋene Hanania eki micne‐jeŋic juwec.

¹²Eme garikiŋ sâc ŋic tai tâpiri sâko‐jeŋichec jumbiŋ jaŋere micnefâc qâqâhâc ʒare‐jeŋic 2 tauseŋ 600.

¹³Eme jaŋere mumutâcko momori guru moc jumbiŋ ʒare‐jeŋic 307 tauseŋ 500. Eme râsi jaŋe ŋicwofuŋ qanʒipiŋte jaŋe hâcne ŋezickehuc tâpirihec jaha ʒika qaniŋte jumbiŋ.

¹⁴Eme Uʒija e momori jaŋere sându maro, du â aeŋ ŋaqi, erâ tepe â tacbaŋte qânâ bâmocke‐jare‐fârewec.

¹⁵Erâ Jerusalem haeo masiŋ bapa saric ŋic jaŋe masiŋ bâfuambiŋ i ʒaene ʒaene â tuturuŋne tuturuŋne ira râeme ŋerawec. Ehame ʒika dameŋko tepe motec â qânâ kâcɋene i qâtâcne jumbieŋ. E Wofuŋzi biaŋne bafickewecte sanaŋke‐jâmbâŋkeme ʒâŋe biŋe‐ticne qazu qambaraŋ erakume mâreŋ sâc sâcke‐fârewec.

¹⁶E sanaŋkewec dameŋ ira sahac fefe ehuc sipirickewec. E Wofuŋ Anutu‐ticne eatuckehuc Wofuŋte taha ufuŋko hosâc âsu ririke alata ira hosâc âsu rikeocte raʒiwec.

¹⁷Ehame taha bapa Aʒaria e Wofuŋte taha bapafâc ŋic tâpirihec jaŋehec râpefuŋnao raʒimbiŋ.

¹⁸Ehuc ŋicwofuŋ Uʒija dâŋ mucnehuc kecʒiŋuc âzâcnembiŋ: “Uʒija, Wofuŋ hosâc âsu ririkecne gie i gore gie mâcne, i Aroŋte ɋâricfâc taha bapa mutiric‐jopakicne jaŋe hâcne hosâc âsu rikeniŋte mujarekicne. Go furufickonec hurâ râc. Go gie bâsifuckekicte Wofuŋ Anuturaonec huriri qâreŋ i gorao mocwâc mi fuaocmu.”

¹⁹Iŋuc âzâcnepie Uʒija e aarickewec. Erâ e hosâc âsu rikocte râqâc badomahuc taha bapa aaric mana‐jarewecte Wofuŋte ufuŋkoa alata heririŋko taha bapa jaŋere ʒâŋe faioa ʒâŋe mai‐ticnao wakoc fuawec.

²⁰Ehame taha bapa fekicne Aʒaria â taha bapa gâcne jaŋe ʒâŋe firâ honepie mi ʒâŋe maine wakoc sasawa ezejec i! Iŋuc honerâ jaŋe picpac jaha jâpembiŋ â e jahac wâc Wofuŋzi qawecte ʒocnehec hurâ rawec.

²¹Eme ŋicwofuŋ Uʒija e Wofuŋte ufuŋkonec jâpekicnere â wakochec juwecte fic mocko buc wakochec jaha jukuhame hâmoc dameŋ‐ticne maickewec. Ehame ŋokâ‐ticne Jotamzi ŋicwofuŋte wiacfâc soŋaŋ‐jopahuc ŋic ŋokac qaŋeŋ‐joparâ juwec.

²²Eme Uʒijazi wiac sasawa ebac ewec i Amozire ŋokâ Jesajazi fuŋnao‐necteaŋ ninic jaha qâreŋke‐fârewec.

²³Juku Uʒija e apa ŋosafâcne jaŋerao ʒuhuckehuc hâmome jaŋe, “E wakochec,” iŋuc muhuc ŋicwofuŋ jaŋere ʒâŋeruŋ gieo apa ŋosafâc‐ticne fombiŋkoa duckembiŋ. Ehame ŋokâ‐ticne Jotamzi tucticne qarâ ŋicwofuŋ juwec.