Binaŋ Qâhâc II 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Salomo e numu tarame sambâŋkonec ʒoc waharâ qowi bâzi â taha wiac fowec i ʒâtâmirewec. Ehame Wofuŋte huriri qâreŋzi taha ufuŋ i fusucmawec.

²Eme Wofuŋte huriri qâreŋzi ufuŋ‐ticne fusucmarâ fowecte taha bapa jaŋe Wofuŋte ufuŋko mi raʒimbiŋ.

³Eme Israe ŋic jaŋe sambâŋkonec ʒoc wahawec â Wofuŋte huriri qâreŋzi taha ufuŋko fowec i mâmâc honerâ ʒâŋe mai‐jeŋic mâreŋko hetutuckehuc Wofuŋ numucnerâ daŋge âzâcnehuc ʒiŋuc mumbiŋ: “Wofuŋ e uruc jauŋ‐ticnehec, â aki anonoc‐ticne i fofo sanaŋ foekac.”

⁴Iŋuc murâ ŋicwofuŋ â ŋic ŋokac sasawa jaŋe Wofuŋte maŋfuŋko taha bâzi rikembiŋ.

⁵Ŋicwofuŋ Salomo e bulimakao 22 tauseŋ â lama 120 tauseŋ iŋuc taha bâzi rikewec. Ŋicwofuŋ â ŋic ŋokac jaŋe iŋuc ehuc Anuture ufuŋ mutirimbiŋ.

⁶Taha bapa jaŋe dodoma‐jeŋicko domambiŋ â Lewiŋic jaŋe Wofuŋ musi bacneniŋte musire wiac barâ domambiŋ. Wiac i Wofuŋ e aki anonoc‐ticne fofo sanaŋ foekac irec ŋicwofuŋ Dawidizi dameŋ ira me ira Wofuŋ daŋge âzâcnewec sâc bawec; e wiac izi hâcne Wofuŋ ʒeri mumuteŋ ecnewec. Ehame jaŋere ŋifecnao taha bapa jaŋe qeŋjeŋic qahapie Israe ŋic sasawa jaŋe domambiŋ.

⁷Eme Salomo e Wofuŋte ufuŋko hae ʒoŋa mai fowec i mutiriwec. Ehuc e jahac aeŋ bâbâroŋzi alata bawec izi qowi bâzi â taha bâzi â wokemaŋ irec sâc mi ewecte qowi bâzi â wama bâzire wokemaŋ i ira hâcne rikewec.

⁸Eme dameŋ ira Salomo â Israe kikefuŋ sâko jaŋe Hamati haeonec raku Aigita opâo fisikac, mâreŋ ŋondeŋ irecnec fisirâ ʒoaŋ gie bapa 7 tiwâ bâzi sâko ehuc fombiŋ.

⁹Eme ʒoaŋ gie bapa 8 ira tutumaŋ tatarane embiŋ. Jaŋe alata mutirihuc ʒoaŋ gie bapa 7 jumbiŋ â tiwâ bâzi ehuc ʒoaŋ gie bapa 7 jaha jumbiŋ hâcne.

¹⁰Eme mosa 7 irec ʒoaŋ gie bapa 23 ira Salomozi ŋic ŋokac râec‐jopame hae‐jeŋic sâc râwiŋnembiŋ. Ehuc Wofuŋzi Dawidi, Salomo â Israe ŋicfâc‐ticne eebapa biaŋne jowatu warewec irec ʒeri â bubiaŋ manambiŋ.

¹¹Salomo e Wofuŋte ufuŋ â ŋicwofuŋte fic i iŋuc hâcne bawec. E Wofuŋte ufuŋ â e jahacne fic baocte manasu biric ewec sâc baku batara‐fârewec.

¹²Ehame Wofuŋzi ŋafeo Salomo fuacnerâ muwec, “No nunumuge manarâ ufuŋ ʒi taha bâzire ufuŋ moc muhuc no nahacne biŋe bâwosâekopac.

¹³No sawa karoracko motâc hepe hoe mi heocmu, me ɋirikiŋ ejarepe fisi mâreŋ ʒi sâcke‐fâreniŋmu, me ŋicfâc‐nane jaŋerao hucukic mimicne bâfuapemu,

¹⁴eme nore ʒâŋe bajueŋgopieŋ ŋicfâc‐nane i jaŋe rumerâ numuhuc hawari‐nane honeniŋte basacnuniŋmu, ehuc eebapa‐jeŋic sâqocnaonec risieniŋmuo ine no sambâŋko juhuc mana‐jarerâ kiŋjeŋic behepemu â mâreŋ‐jeŋic bâpiaŋkepemu.

¹⁵Irec ufuŋ ʒira nunumu fuaocmu sâc ʒâŋe fifi â hazec rârâe jupemu.

¹⁶No miŋecgac ufuŋ ʒira ʒâŋe‐nanezi raŋɋa raŋɋa foocte bâwosâehuc mutirikopac hâcne. Eme ʒâŋe‐nane â maŋnane i dameŋ sâc ʒira foocmu.

¹⁷Â go ine mamacge Dawidizi juwec irec sâc jaha nore maŋfuŋkoa juhuc dâŋsanaŋ â mumutâc dâŋ gaza mutâc epo irec sâcko ebac ecmuo

¹⁸ine no mamacge Dawidihec ʒâʒâfic ehuc ʒiŋuc mupo irec sâcko eri ŋeŋege dope hutuŋ ecnepemu: ‘Ŋic moczi Israe ŋic ŋoŋe qaŋeŋ‐ŋopaocte moc mi basaniŋmu.’

¹⁹“Ŋoŋe ine râpecnurâ dâŋsanaŋ â mumutâc dâŋnane mai‐ŋeŋicko râepo i iŋuc jaha râpeckehuc ra nemu gâcne dape‐jareniŋmuo

²⁰ine no mâreŋ ŋarepo ʒirecnec qâunuc‐ŋopapemu. Erâ ufuŋ ʒira nore ʒâŋe biŋe foocte mutiripo i ʒâŋe mai‐naneonec tuŋkepe raocmu, eme ŋicne ŋicne jaŋe ufuŋ ira iticnehuc qâqiŋ qarâ âke sisic dâŋ ecneniŋmu.

²¹Ehame ufuŋ ʒâŋe biŋe rara sâkonehec ʒi hatapecne izi me izi fotâcnehuc hone warec erâ ʒiŋuc wionʒoŋgopieŋ: ‘Wofuŋzi wemocte hae mâreŋ â ufuŋ ʒi wiac iŋucne ejactewec?’

²²Jaŋaczia iŋuc wiohuc ʒiŋuc munʒoŋgopieŋ: ‘Jaŋe Wofuŋ Anutu‐jeŋiczi kâcɋenefâc‐jeŋic Aigita mâreŋkonec jowac‐jopa wefuwec e beherâ nemu gâcne jaŋerao qohotarâ numu‐jarehuc kiŋaŋ qajarembiŋte Wofuŋ Anutu‐jeŋiczi wiac hâhâwicne keci sasawa bâfua‐jare‐fârewec.’”