1Josafata e moneŋ mafa â ʒâŋe biŋe sâkohec juwec. E Ahabahec ŋokac nareŋ gareŋ ehuc ʒuʒuhuc epic.
2Juku jara wezimuc tarame Josafata e Ahabarao Samaria mâreŋko huwec. Hume Ahabazi e â ŋicfâcne jaŋe lama â bulimakao bocjaha jâmbâŋ qa hezuc ejarewec, ehuc e jahacnehec Ramoti‐Gileade hae râsi rocnehuc fenicte fotariecnewec.
3Ehuc Israe ŋicwofuŋ Ahabazi Juda ŋicwofuŋ ʒiŋuc muhuc wiocnewec: “Go Ramoti‐Gileade haeo ʒika qazo mâmâc ranacmu me?” Iŋuc mume Josafatazi dâŋ ʒiŋuc bâtikiecnewec: “Wiac sasawa fonarekac i gore biŋe jaha; no nahacne mecne â ŋicfâc‐nane mecne nâŋe gore hâcne. Irec nâŋe mâmâc ʒikao ranaŋmu.”
4Josafatazi iŋuc murâ Israe ŋicwofuŋ ʒiŋuc âzâcnewec: “Qanaŋ Wofuŋtaonec dâŋ manazore mu wioc enʒepeneŋ.”
5Iŋuc mume Israe ŋicwofuŋ e porofete 400 hetumaŋ‐joparâ ʒiŋuc wio‐jarewec: “No Ramoti‐Gileade haeo ʒika qazo rapemu me behepemu?” E iŋuc wiome jaŋe ʒiŋuc âzâcnembiŋ: “Sâcne rac, Anutuzi megao râeocmu hâcne.”
6Jaŋe iŋuc mupie Josafatazi muwec, “Ʒira Wofuŋte porofete moc juŋgopieŋko jaŋerao mu wioc moc sâcne enʒapeŋ me?”
7Iŋuc mume Israe ŋicwofuŋzi Josafata ʒiŋuc âzâcnewec: “Ʒira ŋic moc jukac e Imilare ŋokâ ʒâŋene Mikaja erao mupene eki Wofuŋ sâcne mu wioc ecneocmu. Erâ ine no ere takicnuekac; e nore findaŋdâŋ biaŋne moc mi muhuc wiac sâqocnere sawa muekac.” Iŋuc mume Josafatazi muwec, “Ŋicwofuŋ, go iŋuc mac mi muc.”
8Iŋuc mume Israe ŋicwofuŋ e micne moc hefârerâ ʒiŋuc âzâcnewec: “Go picpac jaha rarâ Imila ŋokâ‐ticne Mikaja jowa warec.”
9Eme Israe ŋicwofuŋ â Juda ŋicwofuŋ Josafata jahe Samaria haere sacmotâcko ŋicwofuŋ ŋaqi‐jekichec eri ŋeŋe‐jekicko ŋehapire porofete jaŋe maŋfuŋ‐jekicko findaŋdâŋ mumbiŋ.
10Ehame Kenanare ŋokâ Zedekia e jahac aeŋzi ʒuŋe bafârerâ muwec, “Wofuŋ e ʒiŋuc mukac: ‘Wiac ʒiŋucnezi Siria ŋic sâcne hecjopaku hemiziec‐jopaniŋmu.’”
11Eme porofete jaŋe ijaha mufârehuc mumbiŋ, “Ajoc, Ramoti‐Gileade haeo rarâ aŋac ʒeri bâfuac, Wofuŋzi hae i ŋicwofuŋ gore meo râeocmu.”
12Eme kiŋaŋŋic Mikaja jowaocte rawec e ra fisirâ ʒiŋuc âzâcnewec: “Manakic, porofete jaŋere dâŋzi sâc mocjaha efâreme ŋicwofuŋtao biaŋkekac. Irec gore dâŋzi jaŋere dâŋte sâc jaha ehame mutec sâckezejec.”
13Iŋuc mume Mikajazi muwec, “Wofuŋ e jujâmbâŋkekacte Anutu‐nanezi muekac sâc jâmbâŋ mupemu.”
14Iŋuc murâ ŋicwofuŋtao fisime ŋicwofuŋzi ʒiŋuc âzâcnewec: “Mikaja, nâŋe ʒika qanaŋte Ramoti‐Gileade haeo ranaŋmu me behenaŋmu?” Iŋuc mume dâŋ ʒiŋuc bâtikiecnewec: “Go rarâ aŋac ʒeri bâfuac; Wofuŋzi hae i gore meo râeocmu.”
15Iŋuc mume ŋicwofuŋzi âzâcnerâ muwec, “Go dâŋ burec mi ehuc Wofuŋte ʒâŋeo dâŋ fârinea nazacmurâ bocjaha gazaekopac.”
16E iŋuc mume Mikajazi ʒiŋuc muhuc âzâcnewec: “No Israe ŋic honec‐jopape lama soŋaŋ tâmiric iŋucne tikio siaŋ siperec qambiŋ. Iŋuc epie Wofuŋzi kecʒiŋuc muwec: ‘Ŋic ʒi jaŋe bomboŋ tâmiric; irec wamao hae‐jeŋic sâc risienʒepieŋ.’”
17Mikaja e iŋuc mume Israe ŋicwofuŋzi Josafata dâŋ kecʒiŋuc muhuc âzâcnewec: “E nore findaŋdâŋ biaŋne moc mi muhuc wiac sâcqocnere sawa muekac i mi gazapac me?”
18Iŋuc mume Mikajazi muwec, “Ʒi ine Wofuŋte dâŋ manac: No Wofuŋ e eri ŋeŋe‐ticnao ŋeme honehape sambâŋko kiŋaŋ qaqafâc‐ticne guru dindiŋ jaŋe gâjoŋne ŋifec â ŋifec doma rambiŋ.
19Ehame Wofuŋzi muwec, ‘Mozi Ahaba doc bame rarâ Ramoti‐Gileade haeo ʒikao ferâ hâmoocmu?’ Eme moczi dâŋ moc muwec â moczi moc muwec.
20Ehame mâro moczi fuarâ Wofuŋte maio domahuc muwec, ‘Noni doc bapemu.’ Iŋuc mume Wofuŋzi wiocnerâ muwec, ‘Wemo wiaczi doc bacmu?’
21Mume muwec, ‘No fuarâ porofete jaŋere micko eeatuc mâro moc epemu.’ Mume Wofuŋzi muwec, ‘Goki hâcne doc batec fârinehec ezejec, irec fuarâ iŋuc ec.’
22Eme irec ʒiŋuc manac: Wofuŋzi porofetefâcge ʒi jaŋere micko eeatuc mâro moc râewec. E gorao wiac repicne fuaocte mupaŋkewec hâcne.”
23Iŋuc mume Kenana ŋokâ‐ticne Zedekiazi Mikajare maŋfuŋko rarâ maucnao qahuc muwec, “Wofuŋte Mâro e go dâŋ gazaocte noraonec weniŋuc jaha gorao fâjec?”
24Eme Mikajazi muwec, “Manakic, go soŋkezore ficmaŋ ʒâʒâŋiŋko raʒicmu dameŋ ira ʒâŋe fârigezi honecmu.”
25Iŋuc mume Israe ŋicwofuŋzi muwec, “Ajoc, Mikaja rorâ hae ʒirec mâreŋ soŋaŋ Amoŋ â ŋicwofuŋte ŋokâ Joasi jaherao baraniŋ.
26Ehuc ʒiŋuc munʒepieŋ: ‘Ŋicwofuŋ e kecʒiŋuc mukac: Ŋic ʒi kâpâcwâru ficko râerâ nânâ opâ afecne mac gumehuc juhapie sahac furu risiezepac.’”
27Iŋuc mume Mikajazi muwec, “Go sahac furu risiecmu me mâcne irec dâŋ moc Wofuŋzi nore micko mi râewec.” Iŋuc murâ ʒuhuckerâ muwec, “Ŋic ŋokac sasawa ŋoŋe dâŋ i mananiŋ.”
28Eme Israe ŋicwofuŋ â Juda ŋicwofuŋ Josafata jahe Ramoti‐Gileade haeo rapic.
29Ehuc Israe ŋicwofuŋzi Josafata âzâcnerâ muwec, “No hawari‐nane hetikierâ ʒikao rapemu â goki ine ŋicwofuŋ ŋaqige rojuzemec.” Iŋuc murâ Israe ŋicwofuŋ e hawari‐ticne hetikiewec. Eme ʒikao rambiŋ.
30Eme Siria ŋicwofuŋ e keretacfâc‐ticne jaŋere micne ʒiŋuc jazawec: “Ŋoŋe ŋic fekicne wahakicne mi jopahuc Israe ŋicwofuŋ e sawa qanʒepieŋ.”
31Eme keretacte micne Josafata honerâ mumbiŋ, “E hâcne Israe ŋicwofuŋ.” Iŋuc murâ risierâ qazo ehapie Josafatazi owackewec; owackeme Wofuŋ Anutuzi bafickehuc jopa jâpec ejarewec.
32Eme keretacte micne jaŋe e Israe ŋicwofuŋ mâcne, iŋuc hone tararâ râpeckerâ rambiŋ.
33Ehame ŋic moczi tepe‐ticne âpârehuc kosa qâtâcnekopac muhuc Israe ŋicwofuŋ becsahac â amecfoŋ ʒuʒuhuc‐jekicko muruwec. Murume keretac guriŋ bapa‐ticne âzâcnerâ muwec, “Ajoc, keretac bâtikierâ ʒikaonec bacnu rac, no biac ʒâpâ murucnuŋgopieŋ hâcne.”
34Eme ʒoaŋ ira ʒikazi boc ɋârâŋkewec, â ŋicwofuŋ e ine keretac‐ticnao dopeckehapie Siria ŋic honec‐jopahuc ŋeku ŋafeme hâmowec.
