1Vizatia ari tie pa Zerusalema se Zehoehazi sa tuna Zosaea meke va baṉaria rini pa Zerusalema.
2Zehoehazi si hiokona ṉeta vuahenina meke tava baṉara si asa pa Ziuda, meke koa baṉara si asa ka ṉeta sidara pa Zerusalema.
3Mae se Neko sa baṉara pa Izipi meke pusi vagia si asa meke tozi ni sa sari pa Ziuda pude tabara lani koasa si ka ṉeta tina made gogoto kilo mamatana sa siliva, meke ka toloṉavulu made kilo mamatana sa qolo, na vina bulena sa, gua.
4Meke va baṉaria e Neko pa Ziuda sa tasina Zehoehazi se Eliakimi, hobe ia sa sa pozana, meke poza nia Zehoiakimi sa. Se Zehoehazi si turaṉa taloa nia Neko la pa Izipi.
5Se Zehoiakimi si ka hiokona lima vuahenina totoso tava baṉara si asa pa Ziuda, meke koa baṉara si asa pa Zerusalema ka manege eke vuaheni. Tavete va kaleana pa kenuna e Zihova sa nana Tamasa.
6Rapatia e Nebukaneza, sa baṉara pa Babiloni si pa Ziuda, meke saputu vagia sa se Zehoiakimi, pusi nia seni sa meke turaṉa la nia sa pa Babiloni.
7Paleke taloa ni e Nebukaneza si kaiqa tinagotago arilaedi tanisa Zelepade te Zihova, meke la vekoi sa pa nana vetu baṉara pa Babiloni.
8Doduru gua pu taveti e Zehoiakimi, sari tinavete kaleadi meke sari sinea pu evaṉi sa si ta kubere gore beto koasa Buka Tadi na Baṉara Izireli meke Ziuda. Sa tuna koreo, e Zehoiakini si sogo hobea si asa pa binaṉara.
9Se Zehoiakini si ka manege vesu vuahenina totoso tava baṉara si asa pa Ziuda, meke koa baṉara si asa pa Zerusalema ka ṉeta sidara meke manege puta rane. Asa ba tavete va kaleana pa kenuna e Zihova.
10Sipu kamo sa totoso sapu elo pule sari na linetelete na huda, si tuqe vagia Nebukaneza sa baṉara se Zehoiakini meke turaṉa la nia pa Babiloni, meke paleke taloa ni sa sari na tinagotago tanisa Zelepade te Zihova. Meke va baṉaria e Nebukaneza sa buhina e Zehoiakini, se Zedekaea, pude na baṉara pa Ziuda meke pa Zerusalema.
11E Zedekaea si ka hiokona eke vuahenina totoso tava baṉara si asa pa Ziuda, meke koa baṉara si asa pa Zerusalema ka manege eke vuaheni.
12Tavete va kaleana pa kenuna e Zihova si asa, meke lopu va pepekae meke va avoso la koe poropita Zeremaea, sapu zama nia sa zinama te Zihova.
13Korona lulia tugo Zedekaea se Nebukaneza sa baṉara; na zukuria Nebukaneza si asa pude zama tokotokoro pa pozana sa Tamasa sapu pude koa va tabe si asa koa sa. Namu korona hokara si asa pude hobe meke kekere pule la koe Zihova, sa Tamasa pa Izireli.
14Meke sari na koimata pa Ziuda, na hiama, meke sari na tie ba gua tugo, luli rini sari na hahanana kaleadi tadi na popoa pa vari likohaedi koasa vinahesidi rina beku. Ke va bonia rini sa Zelepade te Zihova, sapu ele va madia Sa pa Zerusalema.
15Se Zihova, sa Tamasa tadi na tiatamadia, si garunu la poropita lamo si Asa pude va balau i, sina tataru ni Sa sari na tie meke sa Nana Zelepade.
16Ba va sisire ni rini sari na tie paleke inavoso Tanisa; korodia va avosi sari Nana zinama, meke hegere ni rini sari Nana poropita, osolae sa tinaṉaziri te Zihova koari Nana tie si noma hola meke loke tie boka govete nia.
17Ke vagi mae nia Zihova sa baṉara pa Babiloni pude la raza i. Va matei sa baṉara pa Babiloni sari na tie vaqura pa Ziuda pa korapa Zelepade. Loke nana tataru koari na tie, vaqura babe koana, palabatu babe na barikaleqe, mohodi babe lopu mohodi. Luara beto lani sa Tamasa koa sa.
18Vagi betoi sa baṉara pa Babiloni sari doduru likakalae hopedi pa korapana sa Zelepade, koasa lose poata, meke sari na tinagotago tanisa baṉara meke sari nana tie tavetavete, vagi beto lani sa pa Babiloni.
19Meke sulu pania sa sa Zelepade te Tamasa meke sa doduruna sa popoa lavata, sari na vetu baṉara, meke sari doduru likakalae arilaedi, meke ta huara sa gobana sa vasileana.
20Vagi lani sa pa Babiloni sari na tie pu lopu ta seke va mate, meke vasina si koa nabulu si arini koa sa meke koari na tuna osolae kamo sa binaṉara pa Pesia.
21Ke gua sapu zama nia e Zihova koasa poropita Zeremaea si gorevura: “Sa pepeso si kaqu magogoso, lopu kaqu ta lete ka zuapa ṉavulu puta vuaheni, na hinobena sa minagogoso Sabati tanisa pepeso sapu lopu ta luli.”
22Pa vuaheni kekenu sipu koa baṉara se Saerasi pa Pesia, si va gorevura ia e Zihova gua sapu zama nia Sa koasa poropita Zeremaea. Va gevuru ia Sa sa bulona e Saerasi pude tozi vura nia si keke tinarae ṉiṉirana; kubere gore nia meke garunu vura nia sa pude ta tiro pa doduru vasina koasa nana binaṉara:
23“Hierana sa zinama te Saerasi, sa baṉara pa Pesia: ‘E Zihova, sa Tamasa pa Maṉauru, si va baṉara au si arau pa doduruna sa kasia popoa, meke vizatau Sa si arau pude kuri ponia si keke Zelepade Tanisa pa Zerusalema pa Ziuda. Ego, gamu doduru tie te Tamasa, si mi topue la, meke e Zihova sa mia Tamasa si mani koa koa gamu.’ ”
