Binaŋ Qâhâc II 31

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Eme wiac i tara‐fâreme Israe ŋic tutumaŋko jumbiŋ jaŋe Juda hae ŋerawec sâc rarâ qânâ wâtuŋ doma rawec i henʒaŋ qanʒaŋnembiŋ. Ehuc Aserim nemure ɋâŋ qâqâtâc doma rawec i wâc iŋuc jaha hefâuc qâfâuckehuc Juda mâreŋko â Benjamiŋ mâreŋko, erâ Eferaim â Manase mâreŋko furu mâreŋ â alata ŋerawec i ʒeŋgoma hetâc qâtâtiekupie rârâŋne‐fârewec. Iŋuc efârerâ Israe ŋic jaŋe hae‐jeŋicko ŋeŋe juju‐jeŋic sâc risiembiŋ.

²Eme Hisikia e taha bapa â Lewiŋic jaŋe guru‐jeŋic sâc ŋic buc buc qowi bâzi me wama bâzi rikeniŋte me gae hehuc daŋge mumuteŋ eniŋte, me Wofuŋte ufuŋ motâcko gie baniŋte mujarehuc gie‐jeŋic sâc râec‐jopawec.

³Erâ Wofuŋte sâcmutâc dâŋko qâreŋkekicne irec sâcko furicte â owâcne, erâ sabata hombaŋko â mosa furunao qowi bâzi ririkere biŋe i ŋicwofuŋzi e jahacnaonec qowi râe jujec.

⁴Ehuc ŋic ŋokac Jerusalem haeo jumbiŋ jaŋe taha bapa â Lewiŋic jaŋere nânâ wiac bafisi‐jarehuc juniŋte mujarewec. Iŋuc ejarepie jaŋe paŋʒâic jaha Wofuŋte sâcmutâckoa gie‐jeŋic baniŋte jazawec.

⁵Eme giedâŋ mujarewec i musawepie manarâ izia Israe ŋic jaŋe gie ɋârionec padi â waiŋ â wokemaŋ â baŋac, erâ nânâ wiac gâcne sasawa i mâretec ropie fisiwec. Erâ wiac sasawa i 10‐konec wâŋ irec sâc ŋemâcnea bafisimbiŋ.

⁶Ehame Israe ŋic â Judaŋic Juda hae sâc jurambiŋ jaŋe bulimakao â lama 10‐konec wâŋ, erâ wiac bâtirihuc Wofuŋ Anutu‐jeŋicte biŋe qakicne i bafisirâ râepie gurune gurune ŋerawec.

⁷Jaŋe mosa wahame jahec â moc ewec ira fuŋkerâ râe guruc ehuc juhapie mosa 7 wahame râe tarambiŋ.

⁸Ehame Hisikia â mefârofâc‐ticne jaŋe fisirâ gurune gurune ŋerawec i honerâ Wofuŋ â Israe ŋicfâc‐ticne muac baafec ejarembiŋ.

⁹Erâ Hisikia e nânâ gurune gurune ŋerawec irec taha bapa â Lewiŋic mu indiŋ ejarewec.

¹⁰Eme Zadokore kikefuŋkonec taha bapa fekicne Aʒariazi dâŋ ʒiŋuc bâtikiecnewec: “Jaŋe fuŋkerâ Wofuŋte ufuŋko wiac bafisimbieŋ irecnec sâcnâŋec nahapene ŋekac jaha. Wofuŋ e ŋicfâc‐ticne jambuŋ‐jopawec irec erâ wiac ʒi guru sâko ŋekac hâcne.”

¹¹Iŋuc mume Hisikiazi Wofuŋte ufuŋkoa rowaŋfic âke tâcne raniŋte mujarewec. Eme jaŋe fuŋkerâ iŋuc hâcne embiŋ.

¹²Ehuc ŋic ŋokac jaŋe taha wiac 10‐konec wâŋ â taha bâtirikicne bafisipie ira râembiŋ. Eme irec soŋaŋ Lewiŋic Konania â ere wahamicne ɋaticne Simei jahe jupic.

¹³Ehame ŋicwofuŋ Hisikia â Aʒaria, Anuture ufuŋte soŋaŋ sâko hâcne, jahe Konania â ɋaticne Simei hone bafic ejacteniŋte ŋic micne kecʒiŋuc rowosâec‐jopapic: Jehiele, Aʒaʒia, Nahati, Asahele, Jerimoti, Joʒabada, Eliele, Isimakia, Mahata â Benaja.

¹⁴Eme Lewiŋic Imina ere ŋokâ Kore e ʒoaŋ wewefunaopec haesac motâc irec soŋaŋ juhuc buafecko Anutu taha bacnembiŋ i bâtâc bame ŋifec tiri bâzire biŋe â ŋifec Wofuŋte biŋe fua jujec.

¹⁵Ehame e bafickeniŋte ŋic kecʒiŋuc jaŋe taha bapa jaŋere haeo rahuc qomâfâc‐jeŋic guru‐jeŋic sâc ŋic ŋokac qizecne me socɋâri taha i bâtâc bajarehuc jumbiŋ: Edeŋ, Miniamiŋ, Jesua, Semaja, Amaria â Sekania.

¹⁶Ehuc ŋic jara‐jeŋic 3‐o domarâ fekac jaŋe apa ŋiric ŋurucfâc‐jeŋic jaŋere sâcko biric‐jopakicne erâ ʒoaŋ gie bapa sâc gie‐jeŋic baniŋte Wofuŋte ufuŋko fembiŋ jaŋe wâc bâtâc bajarembiŋ. Jaŋe guru‐jeŋic sâc biri‐jeŋicko domahuc gie‐jeŋic bambiŋ irec sâcko ejarekicne hâcne.

¹⁷Taha bapa jaŋe garikiŋ‐jeŋic sâc biric‐jopakicne. Eme Lewiŋic jaŋeraonec jara‐jeŋic 20‐o domarâ fekac jaŋe gie â biri‐jeŋicte sâcko biric‐jopambiŋ.

¹⁸Taha bapa jaŋe tirine jupie sâckewecte ŋokac naru motecfâc‐jeŋic guru sâko jâmbâŋ jaŋehec mâmâc biric‐jopakicne.

¹⁹Erâ wâc Aroŋte ɋâricfâc taha bapa hae sâc hesarac mâreŋko jumbiŋ ira ŋic ʒâŋe‐jeŋic mukicne jaŋe taha bapa â Lewiŋic qâreŋ‐jopakicne jaŋe taha bâtâc bajarembiŋ.

²⁰Hisikia e Juda mâreŋko iŋuc hâcne ewec. E Wofuŋ Anutu‐ticne erao siŋkehuc wiac biaŋne â fâretiŋ sasawa efârewec.

²¹E Anutu wira basac ecnehuc gie sasawa Anuture ufuŋko â mumutâc â sâcmutâc dâŋte sâcko bawec; maŋ hâcbuc jaha ebac ewecte juhâc qâhâmowec.