Binaŋ Qâhâc II 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Jotam e jara‐ticne 25 bazurâ fuŋkerâ ŋicwofuŋ ehuc Jerusalem haeo jara 16 juwec. Neŋgoc‐ticne ʒâŋene Jerusa e Zadokore otâ.

²Jotam e mamac‐ticne Uʒijare sâcko Wofuŋte ʒâŋe faio wiac sasawa ebac eme sâcke‐fârewec. Mocjaha, Wofuŋte ufuŋko fefe ine mi ewec, â ŋic ŋokac jaŋe eebapa repicne bajumbiŋ jaha.

³Jotam e Wofuŋ ufuŋ‐ticnere sacmotâc ʒâʒâŋiŋ i bawec â Ofele haere sacgie boc bawec wâc.

⁴Erâ ʒuhuckerâ Juda tiki mâreŋko hae barawec, ehuc tiki jâckâtenehec ira huec â ʒae barawec.

⁵E Amoŋŋic jaŋere ŋicwofuŋhec qaqac ehuc sanaŋke‐jâmbâŋkewec. Iŋuc ejareme Amoŋŋic jaŋe jara ira siliwa ŋemâc‐ticne 100 â padi ɋaɋacne ŋemâc‐ticne 10 tauseŋ â âmuc âmucnere ŋemâc 10 tauseŋ jaha râcnembiŋ. Erâ Amoŋŋic jaŋe sâc ijaha râcnehuc juhapie jara jahec â moc tarawec.

⁶Jotam e Wofuŋ Anutu‐ticnere mic sâcko wiac ebac ewecte tâpiri sâkohec juwec.

⁷Eme Jotamzi wiac sasawa ebac ewec, ʒika qawec â hata âte rawec irec binaŋ i ʒeŋgoma Israe â Juda Ŋicwofuŋ jaŋere Papia Qizecko qâreŋke‐fârekicne.

⁸Jotam e jara‐ticne 25 bazurâ fuŋkerâ ŋicwofuŋ ehuc Jerusalem haeo jara 16 juwec.

⁹Juku apa ŋosafâcne jaŋerao ʒuhuckehuc hâmome Dawidire hae qizecko duckembiŋ. Ehame ŋokâ‐ticne Ahaʒizi tucticne qârâ ŋicwofuŋ juwec.