Binaŋ Qâhâc II 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Ehame ŋokâ‐ticne Josafatazi tucticne qarâ ŋicwofuŋ juwec. Ehuc Israe ŋic jaŋere erâ sanaŋke‐jâmbâŋkewec.

²Ehuc Juda hae sacsanaŋ‐jeŋichec ŋerawec ira momori ŋic guruc‐jopa rawec â Juda mâreŋ soŋaŋkeniŋte momori ŋic râec‐jopawec wâc, erâ mamac‐ticne Asazi Eferaim hae rorawec ira wâc iŋuc jaha râec‐jopa rawec.

³Erâ Josafata e mamac‐ticnezi hata fuŋkerâ âtewec ijaha âte rawecte Wofuŋzi ehec juwec. E Baali nemu wiac wira basac moc mi ejarewec.

⁴Erâ Israe ŋic jaŋere hatao mi rahuc mamac‐ticnere Anutu wira basac ecnehuc ere sâcmutâc dâŋkoa âte rawec.

⁵Irec Wofuŋzi meticnao uucmaŋ fowec i dope hutuŋ ecnewec. Ehame Judaŋic jaŋe taha wiac bafisicnehapie moneŋ mafa â ʒâŋe biŋe sâkohec ewec.

⁶E maŋticnezi Wofuŋte hatao sasanaŋ bâfuawec. Iŋuc erâ ʒuhuckerâ Juda mâreŋko furu mâreŋ â Aserim nemuɋâŋ ŋerawec i bârârie‐fârewec.

⁷E ŋicwofuŋ juha jara jahec â moc eme mefârofâc‐ticne ʒiŋuc jaŋe Juda hae sâc qaqazu gie baniŋte sorec‐jopawec: Beŋ‐Haili, Obadia, Ʒekaria, Netanele â Mikaja.

⁸Eme jaŋehec Lewiŋic ʒiŋuc jaŋe rambiŋ: Semaja, Netania, Ʒebadia, Asahele, Semiramo, Jonataŋ, Adonia, Tobia â Tobadonia. Eme Lewiŋic i jaŋehec taha bapa ʒiŋuczi rapic: Elisama â Jehoram.

⁹Jaŋe Wofuŋte sâcmutâc dâŋte papia qizec bajuhuc Juda mâreŋko qaqazu gie bambiŋ. Ehuc Juda hae sâc sâcke‐fârerâ rahuc ŋic ŋokac qazu‐jarembiŋ.

¹⁰Ehame Juda mâreŋ rârec rârec mâreŋ forawec irec ŋicwofuŋ jaŋe Wofuŋte hâwic‐jopa sâqoreme Josafatahec ʒika mocwâc mi bâfuambiŋ.

¹¹Eme Filisa ŋic gâcne jaŋe Josafata taha bacnehuc siliwa â taha wiac gâcne bafisicnembiŋ. Ehame Araba ŋic jaŋe wâc iŋuc jaha lama ŋicne 7 tauseŋ 700 â noniŋ ŋicne 7 tauseŋ 700 jaha bafisi râcnembiŋ.

¹²Iŋuc epie Josafata e ʒai ʒonʒoŋ sâkohec ewec. Ehuc Juda mâreŋko ficsanaŋ â rowaŋ hae barawec.

¹³Eme Juda hae sâc ira rowaŋfic sâko ŋecne rawec. Ehame momorifâc‐ticne tâpiri wânʒâŋ‐jeŋicheczi Jerusalem haeo jumbiŋ.

¹⁴Jaŋe garikiŋ sâc biri ʒiŋuczi jumbiŋ: Juda guruonec tauseŋ gurune gurune jaŋere micnefâc ʒiŋuc: Micne Adena e ŋic tâpiri ɋicwânʒâŋ‐jeŋichec 300 tauseŋ jaŋe micne bajarewec.

¹⁵Eme ere râpeo micne Johanaŋ e 280 tauseŋ jaŋe micne bajarewec.

¹⁶Eme ere râpeo ine Wofuŋte giere erâ buafec jaha fuawec, Ʒikirire ŋokâ Amasia hâcne, e ŋic tâpiri ɋicwânʒâŋ‐jeŋichec 200 tauseŋ jaŋe micne bajarewec.

¹⁷Eme Benjamiŋ guru jaŋeraonec ine Eliada, e ŋic tâpiri ɋicwânʒâŋhec, eki ŋic 200 tauseŋ tepe â maro fai‐jeŋicko feme jumbiŋ jaŋe micne bajarewec.

¹⁸Eme ere râpeo Joʒabadazi 180 tauseŋ ʒikare ʒawiehuc jumbiŋ jaŋe micne bajarewec.

¹⁹Ŋic i jaŋe ŋicwofuŋ e jahac Juda mâreŋko hae sacsanaŋ‐jeŋichec ŋerawec ira ŋic gâcne râec‐jopa rawec jaŋerao ʒuhuckerâ juhuc ŋicwofuŋ kiŋaŋ qacnembiŋ.