Text copied!
CopyCompare
Kâte Bible - Binaŋ Qâhâc II

Binaŋ Qâhâc II 10

Help us?
Click on verse(s) to share them!
1Israe ŋic jaŋe Rehoboam ŋicwofuŋ âdendâŋneniŋte Sikem haeo tumaŋne‐fârehapie Rehoboam e ira rawec.
2Ehame Nebate ŋokâ‐ticne Jeroboam e ŋicwofuŋ Salomoraonec wiserâ Aigita mâreŋko rawecte ira juhuc biŋe manarâ Aigita mâreŋkonec risiewec.
3Eme jaŋe dâŋ râecnehuc hefârembiŋ. Ehame Jeroboam â Israe ŋic sasawa jaŋe Rehoboamtao fisirâ ʒiŋuc muhuc âzâcnembiŋ:
4“Mamacgezi tagi bâmâmâcke‐nârewec. Irec goki gie ŋemâcne â tagi fai‐nâŋecko fokac i baafecke‐nâretec kiŋaŋ qagarenaŋmu.”
5Jaŋe iŋuc mupie dâŋ ʒiŋuc bâtikie‐jarewec: “Ʒoaŋ gie bapa jahec â moc tarame norao mocwâc warenʒepieŋ.” Iŋuc jazame râwiŋnembiŋ.
6Ehame ŋicwofuŋ Rehoboam e mamac‐ticne Salomozi ɋâricne juhame ŋicqizec ere maio fua jumbieŋ jaŋe ʒiŋuc mu wioc ejarewec: “Ŋoŋe ŋic keci jaŋe dâŋ weniŋuc bâtikie‐jarepemu i sâcne nazanʒapiŋ?”
7Iŋuc wio‐jareme jaŋe dâŋ ʒiŋuc bâtikiecnembiŋ: “Go ŋic ʒi wiac biaŋne ejarehuc aŋac bâfua‐jarecmu â dâŋ biaŋne jazacmuo ine jaŋe gore kiŋaŋ qaqa juraʒihuc juniŋmu.”
8Eme Rehoboam e ŋicqizec jaŋe dâŋ âzâcnembiŋ i qâsuahuc e jahacnehec fua sokac erâ ere maio fua jumbieŋ ŋicmotec i jaŋe mu indiŋ ejarewec.
9Ehuc ʒiŋuc wio‐jarewec: “Ŋic keci jaŋe dâŋ ʒiŋuc nazambiŋ, ‘Go mamacgezi tagi bâmâmâcke‐nârehuc fai‐nâŋecko râewec i baafecke‐nârec’; eme irec okacne i weniŋuc bâtikie‐jarenaŋte muŋgopieŋ?”
10Iŋuc wio‐jareme e jahacnehec fua sokac embiŋ ŋicmotec i jaŋe ʒiŋuc âzâcnembiŋ: “Mamacgezi tagi bâmâmâcke‐nârewec â goki ine baafecke‐nârezemec; dâŋ iŋuc gazambieŋ ŋic i jaŋe ʒiŋuc jazazemec: ‘Memotec‐nanere ɋâfoŋne i mamac‐nanere ombâŋ sirickekac.
11Mamac‐nanezi tagi bâmâmâcke‐ŋarewec â noni ine mocwâc fehuc bâmâmâcke‐ŋarepemu; mamac‐nane e ŋâŋârâczi bâtiŋ‐ŋopawec, â noni ine omeqaqazi bâtiŋ‐ŋopapemu.’”
12Ŋicwofuŋ e, “Ʒoaŋ gie bapa jahec â moc tarame norao mocwâc warenʒepieŋ,” iŋuc jazame râwiŋnembiŋte Jeroboam â ŋic sasawa jaŋe Rehoboamtao mocwâc fisimbiŋ.
13Fisipie ŋicwofuŋ e ŋicqizec jaŋe dâŋ âzâcnembiŋ i qâsuahuc dâŋ ʒocnehec bâtikie‐jarewec.
14Ehuc ŋicmotec jaŋe dâŋ mutâcnecnembiŋ irec sâcko jazahuc ʒiŋuc muwec: “Mamac‐nanezi tagi bâmâmâcke‐ŋarewec â noni ine mocwâc fehuc bâmâmâcke‐ŋarepemu; mamac‐nane e ŋâŋârâczi bâtiŋ‐ŋopawec, â noni ine omeqaqazi bâtiŋ‐ŋopapemu!”
15Ŋicwofuŋ e ŋic jaŋere dâŋ mi manawec. Wiac i Anutuzi Siloŋic Ahia ecneme Nebate ŋokâ‐ticne Jeroboam dâŋ âzâcnewec i deŋkeme Wofuŋtaonec okacne iŋuc fuawec.
16Eme Israe ŋic jaŋe ŋicwofuŋzi dâŋjeŋic mi manawec i honerâ ʒiŋuc bâtikiecnembiŋ: “Nâŋe Dawidihec ʒuʒuhuc‐nâŋec moc fokac me? Nâŋe Isaire ŋokârao wiac moc mi fonârekac. Ajoc, Israe ŋicbureŋ, nâŋe boze‐nâŋec sâc rafârenaŋ. Dawidire ɋâricfâc, ŋaŋacne garikiŋko sawa ʒâŋe finʒepieŋ.” Iŋuc murâ Israe ŋic jaŋe boze‐jeŋic sâc râwiŋnembiŋ.
17Ehame sifu Rehoboam e Israe ŋic Juda hae sâc jurambiŋ jaŋere ŋicwofuŋ juwec.
18Juku ŋicwofuŋ Rehoboam e kiŋaŋ qaqa ŋic jaŋere soŋaŋ Hadoram e soreme rame Israe ŋic jaŋe qânâzi hehâmombiŋ. Iŋuc epie Rehoboam e keretac‐ticnao ferâ Jerusalem haeo wiseocte ʒocne fârone ewec.

19Eme Israe ŋic jaŋe Dawidire garikiŋfâc jaŋere maŋrâŋgeŋ bâfuambiŋzi bâfuahuc juŋgopieŋ jaha.