1“Doľikeren pačivales dojekh prikazis, so adadžives tumenge phenav, hoj te dživen, hoj tumen te avel but čhave a te džan te zalel e phuv, pal savi o RAJ la veraha diňa lav tumare daden.
2Leperen peske pre savore droma, sar o RAJ, tumaro Del, tumen ľidžalas saranda (40) berš pal e pušťa, hoj tumen te pokorinel a te probaľinel (skušinel), hoj te džanel, so tumen hin andro jile – či doľikerena leskere prikazaňja, abo na.
3Pokorinelas tumen a domukelas, hoj te bokhaľon. Paľis tumen čaľarelas la mannaha, so angloda na prindžarenas aňi tumen aňi tumare dada. Aleha tumen o RAJ sikavelas, hoj o manuš na dživel ča le marestar, ale dojekhe lavestar, so avel avri andral le RAJESKERO muj.
4Tel kala saranda berš tumenge o gada na čhingerisaľile a aňi o pindre na šuvľile.
5Len tumenge andro jile, hoj o RAJ, tumaro Del, tumen bararel avri avke, sar o dad bararel avri peskere čhas.
6Doľikeren o prikazi le RAJESKERE, tumare Devleskere; phiren pal leskere droma a daran lestar!
7Se o RAJ, tumaro Del, tumen ľidžal andre lačhi phuv, kaj hin but paňa, chaňiga the prameňa, so aven avri andral o dolini the andral o verchi;
8andre phuv, kaj hin e pšeňica, o jačmeňis, o viňici, o figovňika, o granatoskere phaba, o olivovo olejos the o medos;
9andre phuv, kaj hin furt maro a ňič tumenge na chibaľinela; kaj andro bara hin o trast a o verchi hine pherde le meďoha.
10Sar chana the čaľona, paľikeren le RAJESKE, peskere Devleske, vaš e lačhi phuv, so tumenge diňa.
11Den tumenge pozoris, hoj te na bisteren pro RAJ, tumaro Del, hoj te doľikeren leskere prikazi the o zakoni, so adadžives tumenge dav.
12Sar tumen ela o čaľipen a ačhavena tumenge o šukar khera, andre save bešena;
13sar tumen ela but dobitkos the bakre, rup the somnakaj, a sar sa, so tumen hin, barola,
14paľis ma ačhen barikane andro jile a ma bisteren pro RAJ, tumaro Del, savo tumen iľa avri andral o Egipt, andral o otroctvo.
15Ov tumen ľidžalas pal e bari the strašno pušťa, kaj hine o jedovate sapa the o škorpijona, the pal o šuko than bi o paňi a diňa tumen o paňi andral e zoraľi skala.
16Pre pušťa tumen čaľarelas la mannaha, so angloda na chale tumare dada. Ov tumen pokorinelas a probaľinelas, hoj tumenge paľis te presikavel o lačhipen.
17Vašoda peske šoha (ňikda) ma gondoľinen: ‘Kada barvaľipen dochudľam peskere vastenca the amara zoraha.’
18Leperen tumenge pro RAJ, tumaro Del, bo ov tumen del zor te dochudel o barvaľipen, hoj te doľikerel e zmluva, so la veraha phandľa tumare dadenca, avke sar oda hin the adadžives.
19Ale te bisterena pro RAJ, tumaro Del, a visaľona ke aver devla, lašarena len a služinena lenge – adadžives tumenge phenav, hoj čačes merena.
20Avke sar o narodi, saven tumaro Del murdarela angle tumende, avke the tumen merena, bo na šunenas o hangos (hlasos) le RAJESKERO, tumare Devleskero.”
