5. Mojžišoskero 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹“Kameha le RAJES, tire Devles, a calo dživipen doľikereha leskere zakoni, prikazaňja the sikavibena.

²Ma bisteren adadžives, hoj tumare čhave na dikhle a na predžiďile oda, sar tumen o RAJ, tumaro Del, bararelas avri. Dikhľan le RAJESKERI slava the zor the leskero zoralo vast,

³the leskere znameňja the skutki, so kerďa le Faraonoske, le Egiptske kraľiske the caľa leskera phuvake.

⁴Tumen dikhľan, sar o RAJ zňičinďa la Egiptska armada lengere grajenca the verdanenca, sar kerďa, hoj len o Lolo Moros te zaučharel andre, sar pal tumende džanas, a hine zňičimen dži adadžives.

⁵Tumen džanen, so prekal tumende kerďa o RAJ pre pušťa angloda, sar avľan kade.

⁶Dikhľan the oda, so kerďa le Datanoha the le Abiramoha, le Eliaboskere čhavenca, sar e phuv phundraďa o muj a zľiginďa len lengere famelijenca, stanenca the savorenca, save pes lenca vzburinde.

⁷Tumen korkore dikhľan pre tumare jakha savore bare skutki, so kerďa o RAJ.”

⁸“Doľikeren dojekh prikazis, so tumenge adadžives dav, hoj te aven zorale te predžal o Jordan, a te zalen e phuv, andre savi džan,

⁹a hoj te dživen but andre odi phuv, pal savi o RAJ diňa lav tumare dadenge the lengere potomkenge – e phuv, kaj čuľal o medos the o thud.

¹⁰E phuv, so džan te zalel, nane sar o Egipt, andral savo avľan avri. Ode sadzinenas o semena a phari buči kerenas, hoj te dochuden o paňi pro maľi.

¹¹Ale andre kadi phuv, so džan te zalel, hin brehi the dolini a pijel o paňi le brišindestar andral o ňebos.

¹²O RAJ, tumaro Del, pes starinel pal late a leskere jakha pre late dikhen calo berš.

¹³Te čačes šunena mire prikazi, so tumenge adadžives dav, hoj te kamen le RAJES, tumare Devles, a te služinen leske cale jileha the dušaha,

¹⁴dava pre phuv o brišind jesone the jarone, andre lačho časos, hoj te el tumen o zrnos, e mol the o olejos.

¹⁵Dava the e čar pro maľi prekal tumaro dobitkos a tumen chana a čaľona.

¹⁶Dodikhen pre oda, hoj pes tumare jile te na den te odcirdel, hoj te na oddžan te služinel avre devlenge a te lašarel len.

¹⁷Te kada kerena, o RAJ ela pre tumende igen choľamen. Phandela andre o ňebos, hoj te na del o brišind a e phuv te na anel o uľipen a hoj tumen sig te meren avri andre odi lačhi phuv, so tumenge o RAJ del.

¹⁸Doľikeren kala lava andre peskere jile the goďi; priphanden len peske pro vasta the pro čekat sar leperiben.

¹⁹Peskere čhaven pal oda sikaven a vakeren lenge, či san andro kher, či džana le dromeha, či pašľona pro haďos, či ušťena.

²⁰Pisinena len pro zarubňi peskere kherengere the pre peskere brani,

²¹hoj te dživen but tumen the tumare potomki andre odi phuv, pal savi o RAJ diňa lav la veraha tumare dadenge. Dživena ode, medik o ňebos ela upral e phuv.

²²Te doľikerena savore kala prikazaňja the zakoni, so tumenge dav – hoj te kamen le RAJES, tumare Devles, a te keren savoro pal leskeri voľa a te ľikeren pes lestar –

²³paľis o RAJ tradela avri tumendar savore kala narodi a zalena o narodi, so hine bareder the zoraleder sar tumen.

²⁴Dojekh than, pre savo uštarela tumaro pindro, ela tumaro. Tumari phuv ela la pušťatar pro juhos dži paš o Libanon pro severos, le bare paňestar Eufrat pro vichodos dži paš o Stredozemno Moros pro zapados.

²⁵Ňiko angle tumende na obačhola. O RAJ tumaro Del kerela, hoj o manuša pes tumendar te daran pal caľi phuv, kaj džana, avke sar tumenge phenďa.

²⁶Adadžives tumenge dav, hoj peske te kiden avri o požehnaňje abo o prekošiben:

²⁷Avena požehňimen, te doľikerena o prikazaňja le RAJESKERE, tumare Devleskere, so adadžives tumenge dav.

²⁸Ale avena prekošle, te na doľikerena o prikazaňja le RAJESKERE, tumare Devleskere, a odvisarena tumen le dromestar, so tumenge prikazinďom, oleha, hoj chudena te lašarel avre devlen, saven na prindžaren.

²⁹Sar tumen o RAJ, tumaro Del, ľidžala andre odi phuv, so džan te zalel, vakerena o požehnaňje pal o verchos Gerizim a o prekošiben pal o verchos Ebal.

³⁰Avke sar džanen, kala duj verchi hine pro zapados le Jordanoske, paš o Morehoskere bare stromi, pre le Kanaančanengeri phuv, so dživen andre dolina Araba paš o foros Gilgal.

³¹Akana predžan o Jordan, hoj te džan a te zalen e phuv, so tumenge del o RAJ, tumaro Del. Sar la zalena a bešena andre,

³²dikhen mištes pre oda, hoj te doľikeren savore prikazaňja the zakoni, so tumenge adadžives dav.”