1“Ko pota kabitamni kata nikosi kaotunetune ereonowasi karaku a bereberimi wai kona kibi kata kona mana, ba koni tuwa pesara, ba kona riu ba Bada nosinosimi kurisi i kaobiyoyobana wai kupurina kona yauni ba ini karimi yai.
2Ko nosi, mekabage Bada ami God bodu 40 i naovimi kupura momna kamonai kata ita terimi koi moyaka meyimi ba i rurubaimi kata ita kuiri awaika nuwanuwami yai ba yebo ana kaotunetune kota bosisirana kona kega.
3I wosimi koi moyaka ba soya ko rabobo saba manna i kanikanimi, saba niko kam wai, komi ba wawami yabata kega ko kuiri. Nikona i wosei wai i bibeyimi kata pipiya kega kam wata sina kani ba sina mana, saba wona ereonowana Bada kawanai e kasikasibau wai, konai tana mana.
12Ba saba maranai ko kamkam siyabagi wai, yove yawayawana ko bowabowa ba ko mabinubaimi,
13ba ami cow ba sheep asi koroto te rakarakata ba, ami silver ba gold te pesapesara ba ami sawara ereonowasi te pesapesara saki,
14ko kinani kata kega kona netagegeyim, ba Bada ami God kuni notawapei, Egypt kupurinai patuma kamonai i urabakasibauwimi.
15Kairavinai naovimi nao kupura momna kaikapona ba aba naganagarina, okowina kega, ba memei mota bikokonisi ba rido yabata, ba akima padapadana kamonai okowa kairavimi i wosei i kasibau.
16Ba kupura mominai manna tutunumi si buruburuwei wai i kanimi ba i wosimi koi moyaka kata i rurubaimi mara murinai komi ami gairena kairavina.
17Abisiri yai kuna wona, ‘Yauku ikesiku au maragatai ba au sini nubanubai ba yaroku ai niko mariya a panani.’
18Saba Bada ami God ko nosi, kairavina kona maragata i berimi wai ko mariya, ba ana bidamanina maragasina nosinosimi yabata kurisi i wosei wai i bokikisi yepo i botu karaku.
19Abisiri yai Bada ami God koni nota gugei ba god mutusi koni saunurisi, ba kona bopepetisi ba kona rudune kurisi wai karaukarau ana kaorumatanimi ba ana kasibigoyonimi.
20Kata dam mutusi naomi yai Bada i kasibigoyonisi wai, komi Bada ami God kega kona bosisirei wai nanakasike ina kasibigoyonimi.”
