Sâcmutâc Hâsine 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹“Ŋoŋe ʒuhuckerâ juhuc sawe mâririackeniŋte â Wofuŋzi mamacfâc‐ŋeŋic mâreŋ jare tahac eocte mupaŋke‐jarewec i ro rauc eniŋte miŋecgac sâcmutâc dâŋ sasawa ŋaza mutâc ekopac i aijakic jaha mana rereŋ efârenʒepieŋ.

²Ehuc Wofuŋ Anutu‐ŋeŋiczi mâreŋ burocnao jara 40 jowa qataŋ eŋare warehuc juwec hata irec wâc manasunʒepieŋ. E maŋŋeŋicko dâŋ weniŋucne fowec erâ sâcmutâc dâŋ mana rereŋ embiŋ me mâcne irec fuŋne manaocte esâic‐ŋopahuc bawahac‐ŋopawec hâcne.

³E bawahac‐ŋopame nânâre hâmo sipiric epie ŋaŋacne â mamacfâc‐ŋeŋic mana kâuc bambiŋ i hâcne gumec‐ŋopawec. I ŋoŋe ʒiŋuc mana taraniŋte iŋuc eŋarewec: Ŋiczi nânâre sawa mi juhâmoocmu, Wofuŋte mickonec dâŋ wahame sâc manahuc juhâmoocmu.

⁴Jara 40 sâko juwefuhapie ŋaqi wiac‐ŋeŋic tâcne ʒaŋ mi ewec â kike‐ŋeŋiczi soka siwiŋ wâc mi ewec.

⁵Irec ʒiŋuc mana taranʒepieŋ: Ŋic moczi ŋokâ‐ticne qa bâtiŋ ecneekac irec sâc jaha Wofuŋ Anutu‐ŋeŋiczi ŋoŋe qa bâtiŋ eŋareekac.

⁶Ŋoŋe iŋuc mana tararâ Wofuŋ Anutu‐ŋeŋic araŋ bacnehuc ere kike hata bâjâperâ sâcmutâc dâŋticne mana rereŋ enʒepieŋ.

⁷Wofuŋ Anutu‐ŋeŋic e mâreŋ biaŋne moc tiki â wâneŋ‐ticnao opâ ʒâŋe â riqic wiac forakac ira râec‐ŋopaocmu.

⁸Mâreŋ ira hâcne padi jacgoŋ fuaekac, erâ jâmbo â waiŋ, nemuja â oliwa jâc fuarâ doma rahapie ombâŋ‐jeŋicko baŋac wâc mâmâc âteekac.

⁹Ŋoŋe mâreŋ ira nânâ bocjaha nâ gapec ehuc wiac moc mi basaniŋmu. Mâreŋ irec qânâmaŋko aeŋ fokac â tikimaŋkonec aeŋ bâbâroŋ wise gufuc erâ roniŋmu.

¹⁰Irec ŋoŋe ira juhuc nânâ nâ gapec erâ Wofuŋ Anutu‐ŋeŋic mâreŋ biaŋne ŋare tahac ewec e muteŋ bâteŋ ecnenʒepieŋ.

¹¹“No miŋecgac sâcmutâc â mumutâc dâŋ erâ dâŋsanaŋ ŋaza mutâc ekopac i mana rereŋ mi ehuc Wofuŋ Anutu‐ŋeŋicte nikec‐ŋopazacte rucgereŋ‐ŋeŋic bahuc junʒepieŋ.

¹²Ŋoŋe nânâ nâ gapec ehuc fic wiac biaŋne basarickerâ ira ŋec foc eniŋmu

¹³me lama bulimakaofâc‐ŋeŋic â siliwa â gol wiac‐ŋeŋic erâ wâcwiac‐ŋeŋic gâcne sasawa sawe mâririackeme

¹⁴maŋfefe ehuc Wofuŋ Anutu‐ŋeŋic kâpâcwâru fic, Aigita mâreŋkonec hâcne batarac‐ŋopawec ere nikec‐ŋopazacte rucgereŋ‐ŋeŋic banʒepieŋ.

¹⁵Eki hâcne mâreŋ burocne kâcɋene â hâhâwicne sâko homa momori â omeqaqa fusucmakicne ira jowa qataŋ eŋarewec, erâ ekizia mâreŋ kereŋnao mume qânâ sanaŋ jomirekicnaonec opâ wahawec.

¹⁶Erâ wâc mâreŋ burocnao mamacfâc‐ŋeŋic mana kâuc bambiŋ i hâcne gumec‐ŋopawec. Erâ i bawahac‐ŋopahuc esâic‐ŋoparâ ʒâhec mocwâc ehâmo‐ŋareocte iŋuc eŋarewec.

¹⁷Ŋoŋe ʒiŋuc munʒipiŋte rucgereŋ‐ŋeŋic banʒepieŋ: ‘Menâŋec â tâpiri‐nâŋecte fârine mâriri sâko ʒi bâfuaŋgopeneŋ hâcne.’

¹⁸Ŋoŋe Wofuŋ Anutu‐ŋeŋicte manasuhuc junʒepieŋ, eki hâcne mazuc mâriri bâfuaniŋte tâpiri râe‐ŋareekac; e ʒâʒâfic‐ticnere dâŋ mamacfâc‐ŋeŋic mupaŋke‐jarewec i basanaŋkeocte iŋuc hâcne eŋareekac.

¹⁹No miŋecgac uŋdâŋ kecʒiŋuc ŋazakopac: Ŋoŋe Wofuŋ Anutu‐ŋeŋicte nikec‐ŋopame nemu gâcne bâjâpec‐joparâ kiŋaŋ qajarehuc araŋ bajareniŋmuo ine sipiricke‐jâmbâŋkeniŋmu.

²⁰Ŋoŋe Wofuŋ Anutu‐ŋeŋicte dâŋ mana rereŋ mi epie Wofuŋzi ŋic gurune gurune ʒâŋe fai‐ŋeŋicko bâsirowec‐jopawec irec sâc jaha ŋoŋe bâsirowec‐ŋopaocmu.