1Sar imar o Izraeliti bešenas andro Šittim, varesave murša pašľonas le Moabike džuvľenca.
2On vičinenas le Izraeliten pre peskere obetne hoscini, savenca denas pačiv peskere devlen. O Izraeliti chanas ole chabenestar a lašarenas lengere devlen
3the le devles Baal-Peor. Vašoda o RAJ igen choľisaľiľa pro Izraeliti.
4Avke o RAJ phenďa le Mojžišoske: “Le kale manušengere vodcen, angle ma len murdar a thov len te ačhel pro kham, hoj miri choľi te oddžal le Izraelostar.”
5Avke o Mojžiš prikazinďa le Izraelike sudcenge: “Sako tumendar mi murdarel dojekhe muršes andral peskero kmeňos, savo lašarelas le Baal-Peor.”
6Ipen akor, sar paš o vudar le Sentne Stanoskero rovenas savore Izraeliti the o Mojžiš, avľa varesavo Izraelitas la Midijaňika džuvľaha andre peskero stanos angle lengere jakha.
7Sar oda dikhľa o Pinchas, le Eleazaroskero čhavo, saveske sas papus o Aron, ušťiľa lendar a iľa andro vast e kopija.
8Geľa andro stanos ole Izraelitaskero, savo anďa ola džuvľa, a sodujen jekhetane predemaďa la kopijaha, sar pašľonas. Avke sas zaačhado o nasvaľiben maškar o Izraeliti,
9ale 24 000 manuša mule pre kada zoralo nasvaľiben.
10O RAJ phenďa le Mojžišoske:
11“Vašoda, so kerďa o Pinchas, me imar na som buter choľamen pro Izraeliti. Ov na kamelas, hoj o manuša te lašaren avre devles, ča man, a vašoda len na zňičinďom andre miri choľi.
12Phen le Pinchasoske, hoj leha phandava smiromoskeri zmluva, so ľikerela pro furt.
13Ov the leskere potomki ena pro furt andre rašajiko služba, bo igen labolas pal o Del a oleha, so kerďa, obžužarďa le Izraeliten, hoj lenge te odmukav.”
14O Izraelitas, saves murdarďa jekhetane la Midijaňika džuvľaha, sas o Zimri, le Saluoskero čhavo, savo sas fajtakero vodcas andro kmeňos Šimeon.
15E džuvľi, savi sas murdarďi, sas e Kozbi. Oj sas čhaj le Curoskeri, savo sas vodcas andre jekh Midijaňiko fajta.
16Paľis o RAJ phenďa le Mojžišoske:
17“Džan pro Midijana a murdaren len,
18vaš oda nalačhipen, so tumenge kerde, sar tumen scirdle pro binos, hoj te lašaren le Baal-Peor a the vaš e Kozbi, savi sas murdarďi akor, sar avľa o nasvaľiben paš o Peor.”
19No, paloda pes ačhiľa oda:
