1O RAJ phenďa le Mojžišoske:
2“Mar le Midijanen vaš oda, so kerde le Izraelitenge. Sar ada kereha, mereha.”
3Akor o Mojžiš phenďa le manušenge: “Pririchtinen pes pro mariben le Midijanenca a potrestinen len vaš oda, so kerde le RAJESKE.
4Andral dojekh Izraeliko kmeňos bičhaven andro mariben 1 000 muršen.”
5Avke kidle avri 1 000 muršen andral dojekh kmeňos. Savore murša sas 12 000.
6O Mojžiš len bičhaďa andro mariben jekhetane le rašaha le Pinchasoha, saveske sas dad o Eleazar. O Pinchas pes starinelas pal o sentne veci the pal o maribnaskere trubi.
7Mukle pes andro mariben pro Midijana, avke sar o RAJ prikazinďa le Mojžišoske, a murdarde savore muršen.
8Maškar o murdarde sas the o pandž Midijaňike kraľa: o Evi, o Rekem, o Cur, o Chur the o Reba. Murdarde the le Bileam, le Beoriskere čhas.
9Paľis o Izraeliti zaile a odľigende le Midijaňike džuvľen le čhavenca, savoro lengero dobitkos, o stadi the lengero barvaľipen.
10Zlabarde savore fori, andre save bešenas, the lengere stani.
11Zaile a odľigende savoro, so pes delas te odľidžal le manušendar the le dobitkostar.
12Ande len anglo Mojžiš, rašaj Eleazar the anglo Izraeliti andro taboris, so sas pre Moabike maľi paš o Jordan pre aver sera le Jerichostar.
13O Mojžiš, o Eleazar the savore Izraelike vodci gele pes lenca te zdžal avri pal o taboris.
14O Mojžiš choľisaľiľa pro veľiťeľa upral o ezeros the upral o šel, save pes visarenas le maribnastar.
15Phenďa lenge: “Soske mukľan te dživel savore džuvľen?
16Leperen tumenge pre oda, hoj o džuvľa gele pal o Bileam. On scirdle le Izraeliten, hoj te lašaren le Peor a le RAJES te omuken. Vašoda avľa pro RAJESKERE manuša e bibach.
17Akana murdaren dojekhe muršores the dojekha džuvľa, savi pašľiľa le muršeha.
18Ale le čhajen, save mek na pašľile le muršeha, muken prekal peste.
19Savore tumendar, ko murdarďa varekas abo pes chudľa le mule ťelostar, ačhena efta dživesa avri pal o taboris. Pro trito the pro eftato džives obžužarena tumen the ole džuvľen, saven zaiľan.
20Obžužaren savore gada, dojekh cipuňi veca, dojekh kaštuno sersamos the savoro, so hin la kozakere balendar.”
21O rašaj Eleazar phenďa le muršenge, save pes visarde le maribnastar: “Kada hin o prikazis andro zakonos, so o RAJ diňa le Mojžišoske:
22O somnakaj, o rup, o brondzos, o cinos vaj o olovos,
23oda hin, savoro so na zlabiľa, pes mušinel te obžužarel andre jag the le žužipnaskere paňeha. A savore aver veci kampel te obžužarel le žužipnaskere paňeha.
24Pro eftato džives peske rajbinena o gada a avena žuže. Ča akor šaj aven pale andro taboris.”
25Paľis o RAJ phenďa le Mojžišoske:
26“Tu, o rašaj Eleazar, the o Izraelike vodci zgenen savoro, so zaiľan – le manušen the o dobitkos.
27Rozulav oda pro duj: jepaš de le muršenge, save sas andro mariben, a aver jepaš okle manušenge.
28Paľis kide avri olestar, so chudle o slugaďa, o daňe le RAJESKE: Dojekh 500 manušendar le jekhes avri, a avke the le bikendar, le somarendar, the le bakrendar.
29Le oda avri ole kotorestar, so hino lengero, a de le rašaske Eleazaroske sar le RAJESKERO kotor.
30Le kotorestar, so sas zailo a dino le okle Izraelitenge, le jekhes avri dojekh penda (50) manušendar, a the le bikendar, le somarendar the bakrendar. Deha oda le Levitenge, save pes starinen pal le RAJESKERO Sentno Stanos.”
31A o Mojžiš the o Eleazar kerde sa avke, sar prikazinďa o RAJ.
32Savoro, so zaile o slugaďa, sas 675 000 bakre,
3372 000 dobitkos,
3461 000 somara
35a 32 000 pačivale čhaja.
36O slugaďa chudle 337 500 bakre
37a lendar dine sar daň le RAJESKE 675 bakre.
38Chudle 36 000 gurumňa a olestar e daň prekal o RAJ sas 72 gurumňa.
39Chudle 30 500 somara a olestar e daň prekal o RAJ sas 61 somara.
40Chudle 16 000 manušen, save sas zaile, a lendar dine le RAJESKE 32 dženen.
41O Mojžiš oda diňa le Eleazaroske pre hazdľi obeta le RAJESKE, avke sar prikazinďa o RAJ.
42Oka dujto kotor, so o Mojžiš rozulaďa olestar, so chudle o slugaďa, a dine okle Izraelitenge,
43sas 337 500 bakre,
4436 000 gurumňa,
4530 500 somara,
46the 16 000 manuša, saven zaile.
47Ole kotorestar, so sas le Izraelitengero, o Mojžiš iľa dojekhe pendatone manušes the dobitkos a diňa le Levitenge, save pes starinenas pal le RAJESKERO Sentno Stanos, avke sar o RAJ prikazinďa le Mojžišoske.
48Paľis avle anglo Mojžiš savore armadakere veľiťeľa
49a phende leske: “Tire služobňika zgende le muršen, saven ľidžahas. Aňi jekh lendar na chibaľinel.
50Avke amen anas o somnakune veci – o naramki, o čati, o angrusa, o čeňa the o lancici – le RAJESKE sar obeta, hoj te el odmukle amare bini.”
51O Mojžiš the o Eleazar iľa lendar o somnakaj the savore somnakune veci.
52Savoro somnakaj, so dine o armadakere veľiťeľa le RAJESKE sar hazdľi obeta, sas vaj 190 kili.
53O slugaďa peske mukle oda, so zaile.
54O Mojžiš the o Eleazar preile o somnakaj le armadakere veľiťeľendar a ľigende andre le RAJESKERO Sentno Stanos, hoj peske o RAJ te leperel pro Izraeliti.
