1Akor o vodci andral e famelija le Gileadoskeri, savo sas čhavo le Machiroskero, čhavo le Menaššeskero andral le Jozefoskero kmeňos, gele ko Mojžiš the ke aver anglune fajtakere vodci.
2Phende leske: “Rajeja, o RAJ tuke prikazinďa, hoj le losoha te rozďelines le Izraelitenge e phuv sar ďeďictvos. O RAJ tuke prikazinďa, hoj e phuv amare phraleskeri le Celofchadoskeri te des leskere čhajenge.
3No te džaha romeste andre aver kmeňos, amaro ďeďictvos ela dino ole kmeňoske. Avke našavaha o kotor la phuvatar, so sas amenge diňi.
4Sar avela o Berš le Radišagoskero, so hin sako pendato (50.) berš, prekal o Izraeliti, lengero phuvakero kotor ela dino lengere neve kmeňoske. A avke amaro kmeňos našavela odi phuv pro furt.”
5Avke o Mojžiš phenďa le Izraelitenge kada prikazis le RAJESTAR: “Le muršen andral le Menaššeskero kmeňos hin čačipen.
6Pal o čhaja le Celofchadoskere o RAJ prikazinďa kada: ‘Te džana romeste, oda dženo mušinel te el andral lengero dadeskero kmeňos.
7E ďeďično phuv le Izraelitengeri našťi predžal andral jekh kmeňos andre aver, ale savore Izraeliti mušinen te ľikerel peskere dadeskeri ďeďično phuv.
8Vašoda dojekh čhaj, savi chudela e ďeďično phuv andre varesavo Izraeliko kmeňos, mušinel te džal romeste andre peskere dadeskero kmeňos, hoj savore Izraeliti te chuden o ďeďictvos pal peskere dada.
9Avke na džala o ďeďictvos andral jekh kmeňos andre aver, ale savore Izraelike kmeňi ľikerena peskeri phuv.’ ”
10Le Celofchadoskere čhaja kerde avke, sar o RAJ prikazinďa le Mojžišoske.
11E Machla, e Tirca, e Chogla, e Milka the e Noa gele romeste pal peskere strična phrala pal le dadeskeri sera.
12Ačhile romňija le muršenge andral o kmeňos Menašše, savo sas čhavo le Jozefoskero, a lengeri ďeďično phuv ačhiľa lengera dadeskera fajtake.
13Kala prikazi the zakoni diňa o RAJ le Izraelitenge prekal o Mojžiš pro Moabike rovini pro vichodos le Jordanostar anglo Jericho.
