Text copied!
CopyCompare
Le Devleskero Lav Andre Romaňi Čhib 2019 - 4. Mojžišoskero

4. Mojžišoskero 8

Help us?
Click on verse(s) to share them!
1O RAJ phenďa le Mojžišoske:
2“Phen le Aronoske, hoj te dodikhel pre oda, sar thovela o efta lampi pro momeľaris, hoj te švicinen anglo momeľaris.”
3O Aron avke the kerďa a ačhaďa o lampi avke, hoj te švicinen anglo momeľaris, sar o RAJ prikazinďa le Mojžišoske.
4O momeľaris sas calo somnakuno telunestar dži paš o kvitki. O Mojžiš les diňa te kerel ipen avke, sar leske sikaďa o RAJ.
5Paľis o RAJ phenďa le Mojžišoske:
6“Odďelin le Leviten le Izraelitendar a obžužar len.
7Kavke len obžužareha: Pokropineha len le paňeha pro obžužaripen, la britvaha peske mi hoľinen calo ťelos, mi rajbinen o gada. Avke pes mi obžužaren.
8Paľis mi len terne bikos the chabeneskeri obeta le sane areha, so ela mišimen le olejoha. A dujte terne bikos le pre obeta vaš lengere bini.
9Paľis an le Leviten anglo Sentno Stanos, kaj pes manca zdžan, a zvičin savore Izraeliten.
10A sar len aneha angle ma, o Izraeliti pre lende mi thoven o vasta.
11Paľis o Aron mi anel le Leviten anglo RAJ sar e hazdľi obeta le Izraelitendar, hoj mange te služinen.
12Avke o Leviti mi thoven o vasta pro šere le bikenge. Jekhe bikos obetin sar obeta vaš o bini a dujtes sar labarďi obeta le RAJESKE, hoj te obžužares le Leviten le binendar.
13Paloda le Leviten ačhav anglo Aron the angle leskere čhave a sentňar len le RAJESKE sar e hazdľi obeta.
14Rozulav (odďelin) len le Izraelitendar. O Leviti ena mire.
15Ešeb (peršo) len obžužar a de sar hazdľi obeta, paľis šaj keren e služba paš o Sentno Stanos.
16On hine dine ča prekal ma, me mange len iľom vaš savore ešebne murša le Izraelitendar.
17Miro hino savoro ešebno, so uľiľa le Izraelitenge, či manuš abo džviros. Sentňarďom len mange andre oda džives, sar murdarďom savoro ešebno andro Egipt.
18Vašoda mange iľom le Leviten vaš savore ešebne čhave maškar o Izraeliti.

19Le Leviten dav sar daros le Aronoske the leskere čhavenge, hoj te služinen paš o Sentno Stanos a te keren o obeti vaš o binos le Izraelitengero, hoj te na en marde le džungale nasvaľibnaha, te avena paš o Sentno Stanos.”
20Avke o Mojžiš, o Aron the savore Izraeliti sentňarde le Leviten avke, sar o RAJ prikazinďa le Mojžišoske.
21O Leviti pes obžužarde le binendar, rajbinde peske o gada a o Aron len diňa le RAJESKE sar hazdľi obeta. Paľis o Aron vaš lenge anďa le RAJESKE obeta, hoj te en žuže le binendar.
22Avke o Leviti gele te kerel e služba paš o Sentno Stanos a dodikhenas pre lende o Aron the leskere čhave. Kerde lenca avke, sar o RAJ prikazinďa le Mojžišoske.
23O RAJ mek phenďa le Mojžišoske:
24“Kada hin o zakonos prekal o Leviti: Dojekh le bišupandž (25) beršendar upreder mušinel te služinel paš o Sentno Stanos,
25ale sar leske ela penda (50) berš, mukela e služba a imar na služinela.
26Šaj pomožinel avre Levitenge paš o Sentno Stanos te kerel lengeri služba, ale korkoro imar na služinela. Kavke rozulaveha e služba le Levitenge.”