Nambas 25

6

13

14

20

21

22

23

24

25

27

33

35

¹Israel biyisi Shittim meyaginai si mamana wai, sebasebare si dagui Moab bibaine yabata si raukaipara.

²Si yorisi asi god kurina si puyopuyo bunuwa. Ba sibi kam poragana ba asi god si bopepetei.

³Bada i yagisi saki kurisi kairavina Israel kurisi mena si kapu ba Peor asi god Baal si bopepetei.

⁴Bada Moses kurina i wona, “Nikosi pipiya asi babada ereonowasi ke yaunisi ba ki kasibunuwana ba kao ai matakuai, ki debisi kata kega Bada ini yagisi saki Israel biyisi kurisi.”

⁵Kata Moses Israel asi bibuibuiya biyisi si wonisi, “Komi iyabomi wata ami pipiya gaburimi yai, si kapu ba Peor asi god Baal te bopepetei wai, koi kasibunuwana.”

⁶Moses ba Israel biyisi ereonowasi Tabernacle matam ketanai si tutou ba matasi yai Israel sebare midian wasike i urabai i botu ana rakaraka kurisi.

⁷Maranai Eleazar natuna Phinehas Aaron wawana kona wai priest,

⁸ba nikona i kinani wai koroto i kasibau taveyei ba yaronai ana iyo i yauni sebarena i kibi i riu ana ku gweda ba i yowa wai asi ruwamo i tupa kokonisi sebare ba wasike, kata Israel biyisi kasi gubaga i kakaba,

⁹saba matapa pipiya asi 24,000 si rabobo.

¹⁰Bada Moses kurina i wona,

¹¹“Eleazar natuna Phinehas kona wai priest ba Aaron wawana, au yagisi Israel biyisi gwabisi yai i tere sirei, kona yauku bokuwaiku kairavina i nuwarauwa kosi kamosi yai, kata au waina ata wosei wai kega a wosei.

¹²Karaku ke wonei kata au nuwanuba bidamanina maragasina kurina ana wosei.

¹³Niko bidamanina maragasina kamonai, kona ba ana rakaraka mara murinai te botubotu wai priest saibirina kamosi yai ina madamana, kairavina ana God kana waba bokuwayina kairavina i nuwarauwa ba Israel biyisi asi goyona i maisa taveyei.”