1Israe ŋic jaŋe Sitim mâreŋko juhuc Moabi ŋic otâfâc‐jeŋic jaŋehec sasec boe sau gie bambiŋ.
2Jaŋe hâcne nemufâc‐jeŋic taha bâzi rike‐jarehuc Israe ŋic hefârec‐jopambiŋ. Eme jaŋe rarâ taha bâzi nâ bac ehuc nemufâc‐jeŋic araŋ bajarembiŋ.
3Israe ŋic jaŋe iŋuc ehuc Baali‐Peoro nemu erao qohotapie Wofuŋzi jaŋere boc mana gâpârewec.
4Ehuc Mose kecʒiŋuc âzâcnewec: “Go micne bapafâc‐jeŋic rocjoparâ ʒoaŋ ɋaɋacko Wofuŋ nore maio bituac‐jopa‐fâretec aaric‐nane omaezejec.”
5Iŋuc âzâcneme Mosezi Israe mumutara ŋic ʒiŋuc jazawec: “Ŋoŋe ru sâc ŋicfâc‐ŋeŋic Baali‐Peoro nemurao qohotambiŋ jaŋe qâhâmoc‐jopanʒepieŋ.”
6Eme Israe kikefuŋ sasawa jaŋe tutumaŋ qoruc bozere motâcko kio owa ehuc domahapie Israe ŋic moczi Midiaŋ ŋokac moc Mose â kikefuŋ jaŋere maio e jahacne wiacfâc jaŋerao jowa warewec.
7Eme taha bapa Aroŋte ŋokâ Eleaʒa ere ŋokâ Pinehasizi honerâ fahare ŋic ŋokac behec‐joparâ damu moc rowec.
8Erâ ŋic ŋokac jahe ficmaŋko fepire mi bâjapec‐jofa ferâ âke hâmoc‐jofazejec i! E iŋuc eme Israe ŋic huc mimicne fua‐jarewec i qaʒue wahawec.
9Eme sifu huc mimicnere erâ hâmombiŋ jaŋere ʒare 24 tauseŋ ewec.
10Eme Wofuŋzi Mose kecʒiŋuc âzâcnewec:
11“Aroŋte ŋokâ Eleaʒa ere ŋokâ Pinehasi eki nore âkehoc Israe ŋic jaŋere ŋondeŋko ʒoɋac sâko ehuc jaŋeraonec aaric‐nane bâsuewecte moc mi bâsirowec‐jopapo.
12Irec hâcne ʒiŋuc âzâcnezemec: ‘Manakic, no gohec wamare ʒâʒâfic epemu.
13Eme go â ɋâricfâcge ŋoŋe ʒâʒâfic irec maŋnao juhuc taha bapa gie barâ barahuc junʒepieŋ. Go Anutuge nore erâ ʒoɋac ehuc Israe ŋic jaŋere kiwiric romeŋte iŋuc fua‐ŋarezejec.’”
14Israe ŋic Midiaŋ ŋokac ehec âke hâmoc‐jofakicne ere ʒâŋe Ʒimiri. E Simeoŋte guru irec garikiŋ guru moc jaŋere micne Salu ere ŋokâ.
15Midiaŋ ŋokac âke hâmokicne ere ʒâŋe ine Koʒibi. E Midiaŋ ŋicguru irec garikiŋ guru moc jaŋere micne Zuru ere otâ.
16Eme Wofuŋzi Mose ʒiŋuc muhuc âzâcnewec:
17“Go Midiaŋ ŋic bâʒâic‐jopazemec.
18Jaŋe nemuɋâŋ‐jeŋiczi eatuc‐ŋopahuc bâʒâic‐ŋopambiŋ, irec ŋoŋe okacne joparâ ima samaki bacjopanʒepieŋ. Jaŋe hâcne Peoro nemure taha bâzio hefârec‐ŋoparâ otâ seŋjeŋic Koʒibi ŋarehuc eatuc‐ŋopapie sâqorembiŋ. Koʒibi e Midiaŋ ŋicguru irec garikiŋ mocte micne ere otâ. Eme ŋokac e hâcne Peoro nemure erâ huc mimicne fuawec ʒoaŋ ira qâhâmombiŋ.”
