Nambas 25

6

13

14

20

21

22

23

24

25

27

33

35

¹Tane Israel apanawa bola Sitim bedewe waimoie apana mona nina dewawa Moab iotopa do dewasaie.

²Tane Moab iotopa Israel apanawa nisomoieno mo godiu mampe pulontoia bedewe odeiena. Ita do nana naie mo godiu wadaposimoie.

³Mo epe dewantone Baal-Peo godiwa wadaposisaie, sa baiwa Iawe God mo mampo nuawa kadiidaleno nuakadiwa wanaubeno ien.

⁴Ita Iawe God Moses mampe wane wanase, “E ne emanawo walamo sabamo apana uwauntoia apanawa uduudu bomoa. Ita ne nuakadina Israel apanawa osouwo iena epa, mai dewasapa, dia.”

⁵Sa baiwa Moses Israel apanawa uwauntoia diamone wanase, “E deadea wainilana bedelawo mo mida nomone antone Baal-Peo godiwa wadaposisaiena bomonatuwapi.”

⁶Tane Moses ita Israel apanawa ape kakaiwa moape ke waie waimoie. Ita mo eweio Israel apanawa dea Midia iwa banlene me wandia apewa bedewe alen.

⁷Tane Aron atawa Piniasi Eliesa otopa pirisi nolawa dewasadia dewa ema ewene apana auweia emone nosene alene e waden,

⁸ita Israel apanawa sa wawe alene ape bedewe oden. Ita me e mampe apana eine ita i bupa dosane eino bontoiena. Ita walama sawo Iawe God matangelawa kero kadiwaida wanaubeno iena dialen.

⁹Tane matangela sa bedewe apana wisiawa 24,000 kero wadamono bontoiena.

¹⁰Mape Iawe God Moses diene wanase,

¹¹“Aron atawa Piniasi, pirisi nolawa dewasadia Eliesa otopa ne insedina ruaida dewasan. Me epe dewasana mampe apana mai god lagawaa wadaposisapu, dia. Tane ne os wadaposineampa. Ne mo mampo nuana kadileno kadimopona saiwa me diasan.

¹²Sa baiwa e me diaa, ne wanwan euda obasa sauawa badowa me mampe itudina.

¹³Me nuawa kadileno ebona wiwirawantompa baiwa Israel apanawa kadiu riasan ita mo kadiu insadabuamona. Ita tauma sauana badowa me ita me nosinosiwa do osouwo itudina. Mo pirisi nolawa dewasampe ita akasantopu.”