Kessaabaa 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹“Ixaanaa cuwayiyo saaxiniyaa guuganttaappe medhdha;

²ayyo oiddu zoozee de7o; zananai issi wara, gomppai issi wara, geesai qassi naa77u wara gido; kacetikka aara issuwaa gididi oiqetti merettona.

³Ayyo bolla doonaa, oiddu miyye ubbaanne a kaceta walahi bainna worqqan sheeshsha; a yuushuwankka worqqa tigettaa yuushsha aatta.

⁴He worqqa tigettaappe garssaara ixaanaa cuwayiyo saaxiniyaayyo worqqaappe naa77u sagaayota medhdha; yaatada ya baggaaranne ha baggaara naa77aa naa77aa oitta. Hegeeti tokkiyo wode kasota aattanaassi maaddanaassa.

⁵Kasota guuganttaappe kessada, eta worqqan sheeshsha.

⁶Ha yarshshiyoosaa Maachchaa Taabootaa sinttan kaqettida magalashuwaappe kare baggaara, hegaakka taani nenaara gaittiyo Maachchaa Taabootaa bolli de7iya atto giyo sohuwaa qum77uwaa sinttan wotta.

⁷“Aarooni maallado maallado xomppeta giigissanau yiyo wode, sawiya ixaanaa yarshshiyoosan cuwayo.

⁸Aarooni omarssi xomppeta poo7issiyo wode, zaarettidikka ixaanaa cuwayo; yaatikko, ixaanai GODAA sinttan yiya yeletau ubbatoo cuwattana.

⁹Ha yarshshiyoosan hara ai ixaananne, woikko xuugiyo yarshsho, woikko katta yarshsho yarshshoppa; ushshaa yarshshuwaakka a bolli tigoppo.

¹⁰Aarooni laittaappe issiton nagaraappe maarettanau shukkiyo mehiyaa suuttaa ekkidi, he yarshshiyoosaa bolli de7iya kacetu bolli wotto. Yaatidi geeshshiyo wogaa polo. Ha wogai sinttaara yaana wodetu ubban laittan laittan poletto. Yaatobare ha yarshshiyoosai GODAAYYO dummati geeyidaagaa gido” yaagiis.

¹¹Hegaappe guyyiyan, GODAI Muusa hagaadan yaagiis;

¹²“Neeni Israa7eela asaa qoodan ekkanau eta paidiyo wode, issi issi urai qoodettidi, ba shemppuwaa wozanau GODAAYYO miishshaa qanxxo; qanxxikko neeni eta qoodiyo wode, eta bolli boshi yeenna.

¹³Qoodan geliya asai huuphiyan huuphiyan Dunkkaaniyan eriyo meezaanaa likkiyan issi issi xaqara biraa qanxxo. Issi issi urai hagaa taayyo imo oottidi immo.

¹⁴Qoodan geliya asai laittai laatamaa kumidoogeenne hegaappe bolla ubbai, GODAAYYO immiyoobaa eho.

¹⁵Intte intte shemppuwaa wozanau GODAAYYO imuwaa immishin, dureekka manqqoikka issi likke immanaappe attin, duree darissidi woikko manqqoi guuttidi immoppo.

¹⁶Nagaraappe maarettanau qanxxiyo miishshaa Israa7eela asaappe ekkada, Xoossaa Dunkkaaniyaa giddo oosuwaassi peeshsha. Ha miishshai intte shemppuwaa wozanau, GODAA sinttan Israa7eela asaabaa hassayiyoobaa gidana” yaagiis.

¹⁷Hegaappe guyyiyan, GODAI Muusa hagaadan yaagiis;

¹⁸“Meechcha keriyaanne a wottiyoogaa nahaasiyaappe medhdha; medhdhada Xoossaa Dunkkaaniyaappenne yarshshiyoosaappe gidduwan wotta; wottada an haattaa tiga.

¹⁹Tigin Aarooninne a naati bantta kushiyaanne bantta tohuwaa meecettana.

²⁰Eti haiqqenna mala, Xoossaa Dunkkaaniyaa geliyo wode, audenne he haattan meecettona. Qassi GODAAYYO taman yarshshuwaa yarshshanaayyo yarshshiyoosaa mati shiiqido wode,

²¹eti haiqqenna mala, bantta kushiyaanne bantta tohuwaa meecettona. Hagee Aaroonassinne a zaretussi, yiya yeleta ubbaassi merinau woga gidana” yaagiis.

²²GODAI Muusa hagaadan yaagiis;

²³“Muruta qimameta, hegeetikka, usuppun kilo giraame gukkiya karbbiyaa, heezzu kilo giraame sawiya qarafaa, heezzu kilo giraame sawiya gucachchaanne

²⁴usuppun kilo giraame zimbbaanuwaa ekka. Ha ubbaikka Dunkkaaniyan eriyo meezaanaa likkiyan gido. Hegaa bollikka oiddu litiro zaitiyaa gujja.

²⁵Hageeta shittuwaa oottiyo eran wolakkada, sawiya geeshsha tiyettiyo zaite kessa.

²⁶Yaatada Xoossaa Dunkkaaniyaa, Maachchaa Taabootaa,

²⁷xaraphpheezaanne a bolli wottiyo miishsha ubbaa, xomppiyaa wottiyo ballaanne a miishshata, ixaanaa cuwayiyo saaxiniyaa,

²⁸xuuggiyo yarshshuwaa yarshshiyoosaanne an de7iya ubba miishshata, meechcha keriyaanne a wottiyoogaa tiya.

²⁹Eti aadhdhida keehi geeshsha gidana mala, neeni eta dummaya; eta bochchiyaabai ubbaikka geeshsha gidana.

³⁰“Hegaappe guyyiyan, Aarooninne a naati qeese gididi taayyo oottana mala, eta tiya; tiyada dummaya;

³¹Israa7eela asaayyo hagaadan yaagada yoota; ‘Hagee yiya yeletaassikka tiyettiyo ta geeshsha zaite gido;

³²ha zaitiyaa asa bollan gussoppa; qassi ai zaitekka hegaa oottido likkiyan oottoppa. I geeshsha gidido gishshau, inttekka a geeshshabaadan qoppite.

³³Hagaa mala shittuwaa giigissiya urinne qeese gidenna hara asa tiyiya uri ooninne ba asaa giddoppe bohetto’ yaaga” yaagiis.

³⁴Hegaappe guyyiyan, GODAI Muusa hagaadan yaagiis; “Sawiya qimameta: mittaa cooshshaa, xaadhdhiyaa keettan de7iya shittuwaa, sawiya shidaanne sawiya ixaanaa ekka; eta ubbaa yesoikka issi likke gido.

³⁵SHittuwaadan walahettida ixaanaa oottada, etan go7etta; walahi bainnabaanne geeshsha gidanaadan, an maxiniyaa yegga.

³⁶Appe amaridaagaa ekkada liiqissada cadda; yaatada taani nenaara gaittiyo Xoossaa Dunkkaaniyaa giddon Maachchaa Taabootaa sinttan wotta. Yaatobare i neeyyo ubbaappe aadhdhida geeshsha gidana.

³⁷Hagaa medhdhidoogaa likkiyan hara ixaanaa medhdhoppite. Hegee taayyo dumma geeshshabaa gidiyoogaa erite.

³⁸Hagaa milatiyaabaa medhdhidi, a sawuwaa singgidi ufaittanau koyiya uri de7ikko, i ba asaa giddoppe bohetto” yaagiis.