1. Mojžišoskero 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹O RAJ phenďa le Noachoske: “Dža caľa tira famelijaha andro korabos, bo dikhľom, hoj ča tu sal jekh maškar savore manuša čačipnaskero angle ma.

²Le tuha po efta pari savore žuže džvirinendar, ale le nažuže džvirinendar le ča po jekh para.

³Le mek po efta pari le čiriklendar andral dojekh rodos. Ker oda, hoj te predživen a hoj te el lendar pale buter.

⁴Mek efta dživesa a paľis mukava pre phuv baro brišind, so ľikerela saranda (40) dživesa the saranda rača, a zňičinava pre phuv savoro džido, so stvorinďom.”

⁵O Noach kerďa savoro avke, sar leske o RAJ prikazinďa.

⁶Le Noachoske sas šov šel (600) berš, sar avľa e potopa pre phuv.

⁷Andro korabos geľa anglal oda paňi ov la romňaha the leskere čhave le romňijenca.

⁸Le Noachoha gele andro korabos andro pari savore žuže the nažuže džvirinendar, samcos the samica, le čiriklendar the savorestar, so pes cirdel pal e phuv, avke sar leske prikazinďa o Del.

¹⁰Pal o efta dživesa avle o bare paňa pre phuv.

¹¹Ačhiľa pes pro dešueftato (17.) džives andro dujto čhon, sar sas le Noachoske šov šel (600) berš. Savore paňa chudle te demel avri andral e phuv a phundraďa pes o ňeboskere oblaki a chudľa te del o zoralo brišind.

¹²Pre phuv delas o brišind saranda (40) dživesa the saranda rača.

¹³Mek oda džives gele andro korabos o Noach la romňaha the leskere čhave o Šem, o Cham the o Jafet peskere romňijenca.

¹⁴Gele lenca savore dzive the maľakere džvirini, the ola, so pes cirden pal e phuv, a mek savore le čiriklendar.

¹⁵Ko Noach andro korabos gele po duj savore džvirinendar, so dichinelas.

¹⁶Gele andre o samcos the e samica savorestar, so dživel, avke, sar leske prikazinďa o Del. Paľis o RAJ pal lende phandľa o vudar.

¹⁷O paňa pre phuv furt buter baronas saranda (40) dživesa a hazdle o korabos upre la phuvatar.

¹⁸O paňa igen baronas a učharenas andre savoro, so sas pre phuv, a o korabos plavinelas upral o paňa.

¹⁹O paňa avke zorales baronas pre phuv, hoj zaučharde andre savore nekbareder verchi tel o ňebos.

²⁰O paňa mek barile a prebaronas o nekbareder verchi efta metri.

²¹Avke muľa savoro, so pes čhalavelas the cirdelas pre phuv: dojekh džvirina, dojekh čiriklo, the dojekh manuš.

²²Savoro pre šuki phuv, so dichinelas, muľa avri.

²³Avke o Del iľa o dživipen savorenge, so dživenas pre phuv: le manušenge, le džvirinenge, le čiriklenge the olenge, so pes cirden pal e phuv. Ačhiľa ča o Noach the ola, ko sas leha andre loďa.

²⁴O paňa ľikerenas pre phuv šel the penda (150) dživesa.