1. Mojžišoskero 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Kada hin le Adamoskero rodokmeňos. Sar o Del kerelas le manušes, stvorinďa les ajses sar ov, pre peskero obrazis.

²Sar muršes the džuvľa len stvorinďa, požehňinďa len a diňa len nav “manuš”.

³Le Adamoske sas šel the tranda (130) berš, sar uľiľa leske čhavo, savo sas ajso sar ov, a diňa leske nav Šet.

⁴Sar uľiľa o Šet, dživelas o Adam paľis mek ochto šel (800) berš a sas les muršora the čhajora.

⁵O Adam dživelas eňa šel the tranda (930) berš a paľis muľa.

⁶Le Šetoske sas šel the pandž (105) berš, sar leske uľiľa čhavo o Enoš.

⁷Sar leske uľiľa o Enoš, dživelas o Šet paľis mek ochto šel the efta (807) berš a sas les muršora the čhajora.

⁸Sas leske eňa šel the dešuduj (912) berš, sar muľa.

⁹Le Enošiske sas eňavardeš (90) berš, sar leske uľiľa o Kenan.

¹⁰Sar leske uľiľa o Kenan, dživelas o Enoš paľis mek ochto šel the dešupandž (815) berš a sas les muršora the čhajora.

¹¹O Enoš muľa, sar leske sas eňa šel the pandž (905) berš.

¹²Le Kenanoske sas eftavardeš (70) berš, sar leske uľiľa o Mahalalel.

¹³Sar leske uľiľa o Mahalalel, dživelas o Kenan paľis mek ochto šel the saranda (840) berš a sas les muršora the čhajora.

¹⁴Sas leske eňa šel the deš (910) berš, sar muľa.

¹⁵Sar le Mahalaleloske sas šovardeš the pandž (65) berš, uľiľa leske čhavo o Jared.

¹⁶Sar leske uľiľa o Jared, dživelas o Mahalalel paľis mek ochto šel the tranda (830) berš a sas les muršora the čhajora.

¹⁷O Mahalalel muľa, sar leske sas ochto šel the eňavardeš the pandž (895) berš.

¹⁸Le Jaredoske sas šel the šovardeš the duj (162) berš, sar leske uľiľa o Enoch.

¹⁹Sar leske uľiľa o Enoch, dživelas o Jared paľis mek ochto šel (800) berš a sas les muršora the čhajora.

²⁰Sar o Jared muľa, sas leske eňa šel the šovardeš the duj (962) berš.

²¹Le Enochoske sas šovardeš the pandž (65) berš, sar leske uľiľa čhavo o Matuzalem.

²²Paľis o Enoch mek dživelas trin šel (300) berš. Sas les muršora the čhajora a phirelas le Devleha.

²³O Enoch dživelas trin šel the šovardeš the pandž (365) berš

²⁴a calo peskero dživipen phirelas le Devleha a jekhvareste našľiľa, bo les o Del iľa ke peste.

²⁵Sar sas le Matuzalemoske šel the ochtovardeš the efta (187) berš, uľiľa leske o Lamech.

²⁶Sar leske uľiľa o Lamech, dživelas o Matuzalem paľis mek efta šel the ochtovardeš the duj (782) berš a sas les muršora the čhajora.

²⁷Sar o Matuzalem muľa, sas leske eňa šel the šovardeš the eňa (969) berš.

²⁸Le Lamechoske sas šel the ochtovardeš the duj (182) berš, sar leske uľiľa muršoro.

²⁹O Lamech phenďa: “Leskero nav ela Noach, bo ov amen dela o radišagos a odlela o pharipen la bučatar, so keras amare vastenca pre kadi phuv, so o RAJ prekošľa.”

³⁰Sar leske uľiľa o Noach, dživelas o Lamech paľis mek pandž šel the eňavardeš the pandž (595) berš a sas les muršora the čhajora.

³¹Le Lamechoske sas efta šel the eftavardeš the efta (777) berš, sar muľa.

³²Sar sas le Noachoske pandž šel (500) berš, uľile leske trin čhave: o Šem, o Cham the o Jafet.