Yontu Tɑɑ Yontu 7:1-13

¹Sulɑmii pɛɛlɔ nyɑ́, kɔɔ, kɔɔ, Kɔɔ, nɑ tǝ́ nyǝnɩ-ŋ. Pepe tɔɔ kɛ́ ɩ́ nyǝnǝɣɩ Sulɑmii tʋ? Ɩ wɛ kɛ́ ɩsɩɩ kpekɑ nɑɑlɛ pɑɑlɛ.

²Awulumpu pɛɛlɔ nyɑ́, ɑmɑ nyɑ́ nɔɔhɛɛ tewɑ nyɑ́ ntɑŋkpɑlɑ tɑɑ. Nɑ nyɑ́ tǝnɑɣɑ nɑ́ɑ́ wɛ ɩsɩɩ lɩɩtʋ nti niŋ tǝmlɛ tʋ lupɑ tɔ.

³Nyɑ́ lotu kulutɑɑ kɛ́. Tǝ tɑɑ ɩɩ lɑŋǝɣɩ sʋlʋm sɔɔsʋŋ nyǝm. Pǝyele tǝ cɑɣɑ kɛ́ ɩsɩɩ tɔɣɔnɑɣɑ pee huɣule kɛ yɑɑyenɑɑ hɛkʋ.

⁴Nyɑ́ hǝlɑ nɑɑlɛ wɛ kɛ́ ɩsɩɩ nɑsɛm tompiyɑ.

⁵Nyɑ́ luɣu nǝɣǝsǝnɑ ɩsɩɩ tuuŋ kelɑ ɑkele. Nyɑ́ ɩsǝpee wɛ ɩsɩɩ Hɛsǝpɔŋ ɩcɑtɛ nɔɣɔ lɩɩnɑ. Nɑ nyɑ́ mǝntɛ nɑ́ɑ́ sǝŋɑ ɩsɩɩ Lipɑŋ ɑkele, wei ɩ tɔɔ pɑ feŋiɣinɑ Tɑmɑsɩ hɔɣɔlʋɣʋ tɔ.

⁶Nyɑ́ nyʋɣʋ sǝŋɑɑ kɛ́ ɩsɩɩ Kɑmɛɛlɩ pʋɣʋ nɑ nyɑ́ nyɔɔsɩ nɑ́ɑ́ wɛ ɩsɩɩ nyɑɑlʋɣʋ ŋku pɑ lii ɑkpɑɑyɑlɑ tɔ. Pǝ tɔkɑ wulɑʋ nɔɣɔlʋ kɛ nyɑ́ nyɔɔsɩ kpɑsɩ tɑɑ.

⁷Mɑ sɔɔlʋɣʋ tʋ nyɑ́, ɑmɑ n tewɑɣɑ. Nyɑ́ nyǝnʋɣʋ tɑɑ wɛ teu.

⁸N sǝŋɑɑ kɛ́ ɩsɩɩ pɑ́ɑ́ʋ. Nɑ nyɑ́ hǝlɑ nɑ́ɑ́ wɛ ɩsɩɩ kpɑkpɑtukuŋ.

⁹Mɑ tʋ mɑ tɑɑ sɩ mɑɑ kpɑ pɑ́ɑ́ʋ ŋkʋ. Nɑ mɑ́ sɛtɩ kʋ tukuŋ. Nyɑ́ hǝlɑ ɑnɩ ɑ wɛ-m tɔtɔɣɔ ɩsɩɩ lɛsɛŋ tukuŋ. Nyɑ́ feesiŋ wɛ-m sɔɔsʋŋ ɩsɩɩ tʋɣʋ pee.

¹⁰Nyɑ́ kʋyɔɣɔtʋtʋ wɛ leleŋ kɛ́ ɩsɩɩ sʋlʋm kʋpɑm. Pǝ kɛ́ mɑ kʋsɔɔlʋ sʋlʋm kɛ́. Ɩsɩɩ pǝ kpeŋuɣu mpɑ pǝ kʋwɑ tɔ pɑ ntompee tɔɔ tɔ.

¹¹Mɑ kʋsɔɔlʋ tǝnnɑ-m nɑ ɩ kʋnyɩɩlʋɣʋ wɛ mɑ tɔɔ.

¹²Mɑ kʋsɔɔlʋ nyɑ́, kɔɔ nɑ tǝ́ lɩɩ. Tɩɩ sʋʋ ɑcɑlɛɛ tɑɑ kɛ́ ɑhoo.

¹³Ɩlɛnɑ tǝ́ kpɑ lɛsɛŋ tɩɩŋ tɑɑlɛ kɛ tɑnɑŋ kʋpɑŋkʋ nɑ tǝ nɑ́ sɩ pɑ tʋ hɛtʋ nɑ tǝ́ yɛɣɛlǝɣɩ? Nɑ tɩɩŋ lɛlǝŋ tʋwɑ yɑɑ ɩ tɑ tʋ? Tǝnɑɣɑ mɑɑ hʋlɩ-ŋ mɑ sɔɔlʋɣʋ tǝnɑ.