Solomon 7:1-13

¹Eno abagi we, nage te kwin we me deli tiwai mu polalubao. Nago sągą nadoba bulali, tama nago sągą meda meni yai mu elalubao. Nago sągą te sawia pai mu da, te piksa noma me deli te kolesaga konea pai bidigo te masigi togolama, nigali piksa noma tiwai mu yali.

²Nago mosogobe te kap tiwai te wain pągąwai pusu yai pauda dali taluai tiwai yali. Nago pamene si te gasa sawi yai mu te wit me deli pesage holali tiwai, augwaligo te sawia pai plaua dagego au ilali tiwai dao.

³Nago ame si te wiegi yai bulu uni hasa si tiwai da, augwa idago augwali si deli sogo ame nani.

⁴Nago dogoni magete tedela yai taua me deli tiwai. Nago gedu te genuai taun Hesbon sunumi pąde elalubo dwasianu sigi ąį ge tiwai yali. Nago guni wiegi yai mu tama, te Lebanon tonalubo bidi dabego taua tiwai, te augwaligo Damaskus pedai badu tonalubo dao.

⁵Nago tobolu ugaba mu igulali, te Karmel bulu du tiwai. Nago tobolu nisi udula pali, te kingo sawia pai name ugwa tiwai yali. Tama te tobolu nisigo te king tulaluabo sę mu ilibo dao.

⁶Eno abagi we, nage gasa sawi yai we mu da. Eno nage godolo mu ebao, te nago tigidali naigo ena pemene ilibo dao.

⁷Nage wiegi yai mu te doloba pai ni kokonas tiwai. Te nago ame te aga du dabe tiwai da.

⁸Ena te kokonas nidu ugaba holama, te nai aga du saibao. Eno nago ame suali, te du hauwa walai wain nologo elalubo tiwai yali.

⁹Eno nago pedauwali denami odali, te wiegi yai nedu du laulau denami ebo tiwai. Nago ena dali nono nani, te wain ąį pusu mu ebo tiwai yali. Awe, eno abagi wali bidi, eno te wain nage mawaibao. Te godege pibo sogo me te tobage wain wiegi yai ebo da.

¹⁰Ena te ena abagi wali bidigo we da, te agai ena godolo mu ebo dao.

¹¹Eno abagi wali bidi, nage ena dali asao. Tama da te dwasianu bulu dabeba bidigi pinao.

¹²Te kigamu digi mu te da hogodasa peyu, te wain ni dabe sueibao. Te augwali kulubi pedelama, te augwa yabe diligi naniwe, ma meniwe, te homu ebao. Tama dago te nai du wiegi yai walobo ni dabe sueibao. Te augwa plaua dabe diligi naniwe, ma meni yaliwe? Da te wain gide bidalu, te eno te tiwai nagebolo ola mobaso, te eno nage godolo mu eba homu yagameo.

¹³Eno abagio, eno te wiegi wiegi yai ni du wai naga selama, te be sunumi pąde muai elaluali, te nago tumainogo yali. Meba eno polobadu sali, tama meba megi naga eno sali. Tama dago te wiegi yai bono dabe denami ebaso, te dago godolo ebo homu hodolomainu ebao.