SOLOMON ENA ANE 7:1-13

¹Lohia kekenimu e, emu mai tamakadia ida be daka hairai! Mamumu bauka-baukadia na herahera nadidia na heheto, karakara tauna namona ese e kara.

²Hudomu na kehere kuboruna na heto, vine ranuna ai e honu hanaihanaimu. Bogamu na uit isenuna ta, sosana ese e haheḡeḡea daemu.

³Ratamu ruaosi na uda nanidia natudia rua na heheto, uda nanina natuna vara-hekapa.

⁴Aiomu na kohoro na heto, aivori amo e hadaia ḡauna. Matamu na Hesebon gohugohudia, Batarabim ikoukouna badibadinai. Udu-baubaumu na Lebanon kohorona na heto, Damasko roha-hekeina.

⁵Kwaramu na mai hairaina, Karamele ororona na heto; bona huimu heveriveridia na varo kakakakadia na heheto, hanua pavapavana na huimu ai vada e heau kau. *****

⁶Lalokau e, moale ihavarana kekenimu, oi na hane namo, oi na mai hairaimu.

⁷Emu lata na buatau auna na heto, bona ratamu na buatau takodia na heheto.

⁸Lau na tomu, Buatau auna baina dae, bona takona baina abidia. Ratamu na vine takodia ida bae heḡereḡere, udumu bonana na apolo bonadia heḡereḡeredia.

⁹Emu haherahu na vine ranuna namo-hereana na heto, i'inuna na mai gaihona, bibinagu ai bona isegu ai. *****

¹⁰Lau na egu lalokau tauna ena; ia ese e ura henigumu.

¹¹Egu lalokau e, aoma! aita raka lasi tano paka ai, hanua maraḡidia ai baita noho;

¹²daba ai vine imeadia baitala, baita itaia, vine vada e kobo dae eiava, baita diba, buredia vada e papa eiava, baita tahua, rimono vada e tubu eiava lasi. Unuseni ai baina ura henimu.

¹³Dudai bonadia na e daemu, emai iduara daediai na huahua namo-hereadia idau-idau, matamatadia bona gunadia, vada na haboudia oiemu, egu lalokau e!