Än Salomon Köl 3

1

2

3

4

5

6

7

8

¹Lupwen üa kon won kiei lepwin, üa tan pwe üa kütta ätewe üa tongei seni lon letipei. Üa kütta, nge üsap küna.

²Iwe, iei üpwe pwätä o kukulou won alen ewe telinimw, pwal lon ekewe lenien amwicheich. Üpwe kütta ätewe üa tongei seni lon letipei. Üa fokun küttafetalei, nge üsap küna.

³Ekewe chon mas ra künaei lupwen ar feilfetal lon ewe telinimw. Iwe, üa aisiniir, “Ifa usun, ousap küna ätewe üa tongei seni lon letipei?”

⁴Üa kärän feil seniir, ngei üa fen küna ätewe üa tongei seni lon letipei. Üa amwöchü, nge üsap mwüt ngeni pwe epwe feila tori üa panalong lon imwen inei, lon rumwen neminewe a nöüniei.

⁵Oupwe pwon ngeniei, ämi föpwülün Jerusalem, oupwe öpölü ekewe chian lemäl, pwe ousap aosukosuka äm tongfengen.

⁶Met ewe a feitä seni lon fanüapö usun eu ötüöt mi ötütä, a pwokus ren säfei mi aüchea me apach mi pwokus, pwal ren sokun osiroi mi pwokus itan mör chon amömö ra amömöla?

⁷Nengeni, ra uwei Salomon won an lenien mot, nge wone mwän mi pwora seni lein ekewe mwichen sounfiun Israel ra nom ünükün.

⁸Ir meinisin ra ri ngeni lukalaper efoch ketilas, ra pwal silelap le maun. Iteiten eman me eman a wor nöün ketilas, pun ra molotä fän iten ar repwe maun lepwin.

⁹King Salomon a föri eu lenien mot mi lingöch fän itan seni irän Lepanon.

¹⁰Iwe, üren ewe lenien mot ra för seni silifer, lükisökürün a för seni kolt, nge ekewe pinu ra för seni mangaku mi parapar. Iwe, ekewe föpwülün Jerusalem ra fokun angangöch le chüri lon fän ar tong.

¹¹Oupwe towu, ämi föpwülün Sion, pwe oupwe nengeni ewe king Salomon mi mwärini ewe mwärämwär inan a amwärämwära ngeni lon ränin an apwüpwülü, lon ewe rän letipan a fokun pwapwa.