YAASINƆ 1:16-33

¹⁶Zaakũ òdigↄ̃ lika kũ yãvãnikɛnaao, ò wãna kũ gbɛ̃dɛnaao.

¹⁷Bàkpakpana bãnↄ wára bi yã pãmɛ.

¹⁸Òtɛn tankutɛ kpákpa ń zĩdanɛmɛ, ń toke mɛ́ à ń para.

¹⁹Ɔgↄvãniwɛtɛrinↄ zian gwe ń pínki, ń lukana pↄ́i mɛ́ àdi ń wɛ̃̀ndi bo.

²⁰Ɔ̃ndↄ̃ tɛn wiki lɛ́ gãnulɛa, a kòto dↄ zɛ́dan.

²¹Àtɛn lɛ́ zu zɛ́ kũ òdi kↄ̃ kakaran lɛ́a, àtɛn kpàkpa kɛ wɛ̃tɛ bĩnilɛnↄ gũn à pi:

²²Ɔ̃ndↄ̃saridenↄ, ánigↄ̃ kun kũ ↄ̃ndↄ̃sarikɛo ari bↄrɛɛ? Lalandikɛrinↄ, áni ma fobona tó bↄrɛɛ? Yↄ̃nkↄnↄ, ánigↄ̃ zã dↄ̃nan ari bↄrɛɛ?

²³Tó a ma lɛ́damma mà yã, de ma a dↄ̃naa pìsiáwa, mani tó àgↄ̃ ma laasun vĩ.

²⁴Lákũ ma á sisi a gi sã kpái nà, ma ↄ pòroárɛ á gbɛ̃ke dí laakari kɛro,

²⁵lákũ a ma lɛ́damma kpà sãkoto nà pínki, ádi we laakari kũ ma á gbáiro,

²⁶tó kisira á lé, mani á yáa dↄmɛ, tó yã á lé, mani á lalandi kɛmɛ,

²⁷bee tó yã á lé lán zàga'ĩa bà, ke tó kisira á lé lán tùtuu bà, ke tó takasi kũ yã'ũmmanaao gɛ̃̀ái.

²⁸Zĩ birea áni lɛ́ zumai, mani we sↄ̃ro, áni ma ki wɛtɛ, áni ma e sↄ̃ro.

²⁹Zaakũ a zã dↄ̃nan, ádi zɛ kũ vĩnakɛna Dikirinɛɛoro.

³⁰Ádi we ma lɛ́dammairo, a laakari kũ ma á gbá gya bò.

³¹Áni á dàa gbɛ̀ le, yã vãni kũ a zɛo ni wí á musu.

³²Kpɛlina ↄ̃ndↄ̃nɛ ni ↄ̃ndↄ̃saridenↄ dɛdɛ, laasunsari ni yↄ̃nkↄnↄ dúgu zↄ̃.

³³Gbɛ̃ kũ à ma yã kũna sↄ̃ anigↄ̃ kun aafia, anigↄ̃ kun kũ laakariio kpatɛna vĩnakɛna vãninɛɛ sari.