1Eme irec faicnao Amoŋ ŋicwofuŋ e hâmome ŋokâ‐ticne Hanuŋzi tucticne qarâ ŋicwofuŋ juwec.
2Juhame Dawidizi muwec, “Mamac‐ticnezi ehâmo‐narewecte no Nahasi ŋokâ‐ticne Hanuŋ ehâmocnezepac.” Iŋuc murâ mamac‐ticne hâmowec irec mu bâmiriŋ ecneniŋte Hanuŋtao kiŋaŋ sorec‐jopawec. Sorec‐jopame Dawidire kiŋaŋŋicfâc jaŋe raku Amoŋŋic jaŋere mâreŋko fisimbiŋ.
3Fisipie Amoŋŋic fekicne jaŋe ŋicbomboŋ‐jeŋic Hanuŋ ʒiŋuc âzâcnembiŋ: “Dawidi e mamacgere maname feha bâmiriŋguniŋte ŋic ʒi sorec‐jopajec go manatec iŋuc mi ezejec. Dawidi e kiŋaŋŋic jaŋe hae ʒi hone tâcneku imackeniŋte râec‐jopajec.”
4Iŋuc mupie Hanuŋ e Dawidire kiŋaŋŋic rocjoparâ ŋic buc buc mecʒâwâ‐jeŋic ŋifecne sawa hejarewec. Erâ ŋaqi qoruc‐jeŋic hoqaŋeŋ‐jeŋickoa bâtâcne‐jare‐fârerâ râec‐jopame rambiŋ.
5Eme ŋic jaŋe mâretec mimiembiŋ; ehame Dawidizi biŋe‐jeŋic manarâ kiŋaŋ sorec‐jopawec. Ehuc ʒiŋuc muwec: “Ŋoŋe Jeriko haeoa juhapie mecʒâwâ‐ŋeŋic wefume sâcne risienʒepieŋ.”
6Eme Amoŋŋic jaŋe Dawidi mâsi repicne ecnembiŋ i ʒâŋitarâ Siria ŋic Bete‐Rehobo haeo jumbiŋ jaŋerao kiŋaŋ sorec‐jopambiŋ. Eme jaŋe Siria ŋic jaha Zoba haeo jumbiŋ jaŋeraonec momori kikezi rara 20 tauseŋ rocjopambiŋ. Erâ Maka ŋicwofuŋ â ŋicfâcne 1 tauseŋ rocjopambiŋ. Erâ ʒuhuckerâ Toboŋic 12 tauseŋ rocjopambiŋ.
7Eme Dawidizi biŋe manarâ Joabe â momori ŋic tâpirihec sorec‐jopawec.
8Ehame Amoŋŋic jaŋe fisirâ sacmotâcko ʒikare birickembiŋ. Eme Siria ŋic Zoba â Rehobo haeonec, erâ Tobo â Makaŋic jaŋe ine mâreŋ taniŋnao birickembiŋ.
9Eme Joabe e ʒikazi orâŋ bârâŋ ecnehuc fisiwec i honerâ Israe ŋic bâwosâec‐jopakicne jaŋe bâfâuc‐joparâ gâcne jaŋe Siria ŋic jaŋehec qaqac eniŋte biric‐jopawec.
10Erâ ŋicfâc‐ticne gâcne jaŋe ɋaticne Abisairao râec‐jopame eki Amoŋŋic jaŋehec qaqac eniŋte biric‐jopawec.
11Eme Joabezi muwec, “Siria ŋic jaŋe boc sanaŋkeniŋmuo ine goki baficnuzemec â Amoŋŋic jaŋe boc sanaŋkeniŋmuo ine noni fârâ baficguzepac.
12Nâŋâc hâbihec ehuc ŋicfâc‐nâŋec jaŋere erâ â Anutu‐nâŋecte hae ŋerakac irec erâ sanaŋkehuc ʒika qanʒepeneŋ. Eme Wofuŋ e jahac manakac sâc ezejec.”
13Iŋuc murâ Joabe â ŋicfâcne e jahacnehec jumbiŋ jaŋe Siria ŋic jaŋehec qaqac ehuc jâpec‐jopapie wisembiŋ.
14Eme Amoŋŋic jaŋe Siria ŋic jaŋe wisepie honerâ iŋuc jaha Abisaihec qaqac embiŋ i beherâ wisehuc hae sacmaŋko raʒimbiŋ. Raʒipie Joabe e Amoŋŋic jaŋehec qaqac ehuc juweckonec risierâ Jerusalem haeo fisiwec.
15Eme Israe ŋic jaŋe Siria ŋic bawahac‐jopambiŋ Siria ŋic jaŋe iŋuc honerâ roroc efârembiŋ.
16Roroc efârerâ Hadadezezi kiŋaŋ sorec‐jopame rarâ Eufrata opâ ocniŋucnao Siria ŋic gâcne jumbiŋ jaŋe jowac‐jopa warembiŋ. Eme jaŋe momori micne Sobakazi micne bajareme Helam haeo fisimbiŋ.
17Iŋuc epie Dawidizi biŋe manarâ Israe ŋic rocjopa‐fâreme Jordaŋ opâ fotâcnerâ Helam haeo fisimbiŋ. Fisipie Siria ŋic jaŋe birickerâ Dawidihec ʒika qambiŋ.
18Qaku Israe ŋic jaŋere hâwic‐jopame wisembiŋ. Wisepie Dawidizi Siria ŋic keretacko jujune 700 jopawec â becâsicko rara ŋic 40 tauseŋ jopawec. Ehuc momori jaŋere micne Sobaka e wâc qame ijaha hâmowec.
19Ehame Israe ŋic jaŋe Hadadezere rurumaŋko ŋicwofuŋ sasawa jumbiŋ jaŋe bawahac‐jopambiŋ, eme ŋicwofuŋ jaŋe iŋuc honerâ Israe ŋic jaŋehec wama qaqac erâ jaŋere rurumaŋko jumbiŋ. Siria ŋic jaŋe iŋuc juhuc Amoŋŋic mocwâc bafic‐jopaniŋte hâwic‐jopawec.
