1Eme Dawidizi muwec, “Saulore garikiŋfâc jaŋerao ŋic moc hetirikicne jukacko Jonataŋte erâ e ehâmocnezapo?”
2Eme Saulore garikiŋfâc jaŋerao kiŋaŋŋic moc juwec ʒâŋene Ziba. Eme e hâcne ecnepie Dawidirao rawec. Rame ŋicwofuŋzi ʒiŋuc wiocnewec: “Go Ziba hâcne me?” Wiocneme muwec: “Bomboŋ‐nane, kiŋaŋŋicge no hâcne.”
3Iŋuc mume ŋicwofuŋzi muwec, “Saulore garikiŋfâc jaŋeraonec ŋic moc mi jujâmbâŋkeŋgopieŋ me? Eme no Anuture erâ ehâmocnezapo.” Iŋuc mume Zibazi ŋicwofuŋ ʒiŋuc âzâcnewec: “Jonataŋte ŋokâ mocjaha mac jukac. E kike jahecne puriŋ ewec.”
4Iŋuc mume ŋicwofuŋzi wiocnerâ muwec, “E wena jukac?” Wiome Zibazi ŋicwofuŋ ʒiŋuc âzâcnewec: “E Lodeba haeo Amiele ŋokâ‐ticne Makirire ficko jukac.”
5Iŋuc âzâcneme ŋicwofuŋ Dawidi e kiŋaŋ sorec‐jopame Lodeba haeo rarâ Amiele ŋokâ‐ticne Makirire fickonec jowa warembiŋ.
6Eme Saulore ŋosa Jonataŋte ŋokâ Mefibosezi Dawidirao fisirâ ʒâŋe mai‐ticne mâreŋko hetutuckerâ dape qâhâŋ ewec. Iŋuc eme Dawidizi ʒâŋe‐ticne wirahuc muwec, “Mefibose.” Eme eki dâŋ ʒiŋuc bâtikiecnehuc muwec: “Bomboŋ‐nane, kiŋaŋŋicge no hâcne.”
7Iŋuc mume Dawidizi ʒiŋuc âzâcnewec: “Mi hâwicguoc, no mamacge Jonataŋte erâ ehâmo‐garepemu. Erâ ŋosage Saulore mâreŋ i mocwâc bârisie‐garepemu. Eme go dameŋ sâc nohec nânâ nâhuc jucmu.”
8Iŋuc âzâcneme Mefibosezi dape qâhâŋ ehuc muwec, “Kiŋaŋ qaqage no mo, irec qâto korehec no iŋucnere manasukomec?”
9Iŋuc mume ŋicwofuŋzi Saulo kiŋaŋŋic‐ticne Ziba hefârerâ muwec, “Saulo â garikiŋfâcne jaŋere wiac sasawa i bomboŋgere ŋokâ e râecnekopac.
10Eme go â ŋokâfâcge â kiŋaŋ qaqafâcge ŋoŋe ine bomboŋgere ŋokâzi nânâ bâfuaocte mâreŋ he qanʒaŋ ehuc irec fârine bâfuanʒepieŋ. Â bomboŋgere ŋokâ Mefibose e ine dameŋ sâc nohec nânâ nâhuc juocmu.” Ziba e ŋokâfâcne 15 â kiŋaŋ qaqafâcne 20 jumbiŋ.
11Eme Zibazi ŋicwofuŋ ʒiŋuc âzâcnewec: “Ŋicwofuŋ, fekicne‐nane wiac sasawa mutâcnekic irec sâcko kiŋaŋ qaqagezi efâreocmu.” Eme Mefibose e ŋicwofuŋte ŋokâfâc jaŋere sâcko Dawidire ficko juhuc nânâ nâhuc juwec.
12Mefibosere ŋokâ motec ɋâri moc juwec ʒâŋene Mika. Eme Zibare ficko jumbiŋ sasawa jaŋe Mefibosere kiŋaŋ qaqafâc efârembiŋ.
13Ehame Mefibose e Jerusalem haeo juwec. Ira hâcne juhuc dameŋ sâc ŋicwofuŋte ficko nânâ nâhuc juwec. E kike jahec‐ticne mâmâc jaha puriŋ epic hâcne.
