1Eme Dawidi e tiki botâŋko fisirâ piticne rahame Mefibose kiŋaŋŋic‐ticne Zibazi doŋgi jajahec rocjofarâ fisi bâfuawec. Doŋgi jahere faio ine wiac kecʒiŋuc râekicne fowec: Poroŋ 200 â waiŋ hândâŋ kereŋne 100 â ʒoaŋ dameŋte jâchândâŋ 100 jaha erâ waiŋ ʒopo moc.
2Eme ŋicwofuŋzi Ziba wiocnerâ muwec, “Go wemocte wiac ʒi bawarekomec?” Wiocneme Zibazi muwec, “Doŋgi jajahec ʒi ŋicwofuŋ gore wiacfâc jaŋe fai‐jekicko ŋerâ raniŋte bacjofa warekopac, erâ ʒoaŋ dameŋte jâchândâŋ â poroŋ ʒi ine ŋic motec jaŋe nâniŋte â waiŋ ʒopo ʒi ine mâreŋ burocnao juhuc opâre hâmorâ nâniŋte bawarekopac.”
3Iŋuc mume ŋicwofuŋzi wiocnewec, “Eme bomboŋgere ŋokâ e wena?” Wiocneme Zibazi muwec, “E ʒiŋuc muhuc Jerusalem haeoa ŋekac: ‘Israe kikefuŋ jaŋe miŋecgac mamac‐nanere uucmaŋ mocwâc bârisie‐nareniŋmu hâcne.’”
4Iŋuc mume ŋicwofuŋzi Ziba ʒiŋuc âzâcnewec: “Manakic, Mefibosere wiac sasawa i gore ekac.” Iŋuc mume Zibazi muwec, “Ŋicwofuŋ‐nane, no dape‐garekopacte mana‐naretec sâckehuc juzejec.”
5Eme ŋicwofuŋ Dawidi e Bahurim haeo fisihame Saulore garikiŋfâc jaŋeraonec ŋic moc ʒâŋene Simei eki fisi bâfuawec. E Gerare ŋokâ. E ware warehuc ʒuʒuhuc jaha mu surec ejarewec.
6Erâ qânâ rorâ ŋicwofuŋ Dawidi â kiŋaŋ qaqafâcne jaŋe wicke‐jarewec. Ehame ŋic ŋokac â ŋic qac momori jaŋe orâŋ bârâŋ ecnembiŋ.
7Eme Simei e mu surec ecnehuc ʒiŋuc muwec: “Ŋic sâqocne, soc hohoŋke ŋic, go wisec, wise tâmirec.
8Saulo kikefuŋfâcne jaŋere ŋeŋetacko ŋicwofuŋ erâ jukicte jaŋere socte kiŋ i Wofuŋzi gorao batarakac. Ehuc uucmaŋ i gowac rorâ ŋokâge Abisalom râcnekac. Honekic, soc hohoŋke ŋic go, go gahacne hehesic izia ŋerisie‐garekac.”
9Iŋuc eme Zeruja ŋokâ‐ticne Abisaizi ŋicwofuŋ ʒiŋuc âzâcnewec: “Qâto korehec keci e wemocte ŋicwofuŋ‐nane go iŋuc jâmbâŋ mu surec egarekac? No rarâ upene qâtâcnepemu.”
10Iŋuc mume ŋicwofuŋzi muwec, “Wiac izi Zeruja ŋokâfâcne ŋoŋere biŋe mi ekac. E sâwec dâŋ mukac i Wofuŋzi ‘Dawidi sâweckec’ iŋuc âzâcneme ekacko mozi ʒiŋuc wiocneocmu: ‘Go wemocte iŋuc ekomec?’”
11Iŋuc murâ Dawidi e Abisai â kiŋaŋ qaqafâcne sasawa ʒiŋuc jazawec: “Manaŋgopieŋ, no nahacne ŋokâ jâmbâŋzi nuocte ehame mozi Benjamiŋ ŋic keci ere maname sâqoreocmu. Ŋoŋe behehapie mu surec enareoc. E Wofuŋzi iŋuc eocte mucneme ekac hâcne.
12Wofuŋ e busâqoc‐nane honerâ mu surec enareŋgopieŋ irec okacne wiac biaŋne bâtikie‐nareocmu mecne.”
13Dawidi e iŋuc jazahuc ŋicfâcne jaŋehec hatao rahapie Simei e ŋifecnao tapio rahuc mu surec ecnerâ qânâ wicke‐jarehuc rufe tie‐jarewec.
14Iŋuc ejareme ŋicwofuŋ â ŋicfâcne jaŋe docke sâqorehuc raku Jordaŋ opâo fisirâ opâ nâ ruac embiŋ.
15Eme Abisalom e Ahitofe â Israe ŋic sasawa jaŋehec Jerusalem haeo fisimbiŋ.
16Eme Dawidi âgo‐ticne Areki ŋic Husai e Abisalomtao fisirâ ʒiŋuc âzâcnewec: “Ŋicwofuŋ, go juraʒihuc juzemec! Ŋicwofuŋ go juraʒihuc juzemec!”
17Iŋuc mume Abisalomzi Husai ʒiŋuc muhuc âzâcnewec: “Hâc, go iŋuc ehuc âgoge araŋ bacneekic me? Go wemocte âgogehec mi rameŋ?”
18E iŋuc âzâcneme Husaizi muwec, “Mâcne, Wofuŋ â ŋic ʒi, erâ Israe ŋic sasawa jaŋe go hâcne bâwosâecgumbiŋ irec gorao qohotarâ gohec juhuc jupemu sanaŋ.
19No ŋic i me i mâcne, Dawidi ŋokâ‐ticne go sawa kiŋaŋ qagarepemu. No mamacge kiŋaŋ qacnehuc jupo irec sâc jaha gore kiŋaŋ qahuc jupemu hâcne.”
20Eme Abisalomzi Ahitofe âzâcnerâ muwec, “Weniŋuc jaha enaŋmu i goki muc.”
21Iŋuc mume Ahitofezi Abisalom ʒiŋuc âzâcnewec: “Go mamacgezi ŋokac mamare rocjopawec erâ fic soŋaŋkeniŋte behec‐joparâ rawec i jaŋerao rarâ jaŋehec foc. Iŋuc etec Israe ŋic jaŋe go gahac mamacge wiac repicne ecnekic i mana‐fârenʒepieŋ. Ehame go gahacnehec juŋgopieŋ ŋic i jaŋere tâpiri faharezejec.”
22Iŋuc mume Abisalomte qoruc boze moc ficbupuo fârembiŋ. Eme Abisalomzi Israe ŋic jaŋere ʒâŋe faio mamac‐ticnezi ŋokac mamare rocjopawec i jaŋehec fowec.
23Dameŋ ira ŋic jaŋe Ahitofe mumutâc dâŋticnere manapie Anuture mumutâc dâŋ irec sâc jaha ewec; eme irec hâcne Dawidi â Abisalom jahe wâc mumutâc dâŋticne sâsepire fewec.
