1Eme Dawidi e jahacnehec jumbiŋ ŋic i jaŋe biric‐joparâ momori guru i tauseŋ jaŋere micne â 100 jaŋere micne iŋuc âkendâŋ‐jopawec.
2Iŋuc erâ momori guru bâfâuckeme guru jahec â moc ewec: Guru moc i Joabezi micne bajareocte mucnewec â moc i Joabe ɋaticne Zerujare ŋokâ Abisairao râec‐jopawec erâ guru moc i ine Gatiŋic Itai erao râec‐jopawec. Iŋuc ejare‐fârerâ ʒiŋuc jazawec: “No nahacne wâc mâmâc ranaŋmu.”
3E iŋuc mume ŋic jaŋe heckecnehuc mumbiŋ, “Go nâŋehec mi razemec. Juku nâŋe wise wiac moc epene jaŋe nâŋere boc mi manasuniŋmu. Me nâŋeraonec nâfocnezi hâmopie irec wâc boc mi muniŋmu. Goki ine ŋic 10 tauseŋ nâŋere sâc ehuc boc siric‐nâpokic. Irec go haeoa juhuc bafic‐nâpotec sâckezac.”
4Iŋuc mupie ŋicwofuŋ e dâŋ ʒiŋuc bâtikie‐jarewec: “Ŋoŋe manapie sâckekac irec sâcko epemu.” Iŋuc jazame momori gurune gurune 100 â 1 tauseŋ jaŋe asasai âtehuc hurâ rahapie ŋicwofuŋ e haesac motâc ŋifecnao domawec.
5Ehuc Joabe â Abisai â Itai ʒiŋuc jaza qâmoc ewec: “Motec wârâŋ‐nane Abisalom e nore erâ wiac aijakic jaha ecnenʒepieŋ.” Ŋicwofuŋzi micne jaŋe Abisalomte dâŋ jaza qâmoc ewec i ŋic jaŋe mana‐fârembiŋ.
6Ehuc momori guru jaŋe Israe ŋic jaŋehec qaqac eniŋte hurâ rambiŋ. Erâ Eferaim mâreŋte jâckâteo ira ʒika qambiŋ.
7Ehuc Dawidire ŋicfâc jaŋe Israe ŋic bawahac‐jopambiŋ. Erâ ʒoaŋ ira ŋic afecne mâcne, 20 tauseŋ hâmocne jopambiŋ.
8Erâ ʒikazi mâreŋ i sâcke‐fârewec. Eme ʒoaŋ ira ŋiczi jâckâteo sifuckembiŋ i ʒikazi jopambiŋ irec sâc sirickewec.
9Eme Abisalom e Dawidire ŋicfâc bâfuac‐jopawec. Erâ doŋgi‐ticnere faio rahame doŋgizi boriŋjâc sâko moc irec tieŋne guruhec ira rurumaŋkehame jâc tieŋnezi qizec gerenao rorâ basanaŋkeme sawao kuraeŋ qahuc domaha doŋgizi fofotâc jaha rawec.
10Ehame Dawidi ŋicfâcne jaŋeraonec moczi wiac fuawec i hone manac erâ ra Joabe ʒiŋuc muhuc âzâcnewec: “Manakic, no Abisalom e boriŋjâcko qaŋatierâ waha domame honepac.”
11Iŋuc âzâcneme Joabezi wiocnerâ muwec: “Go mâc honemec me? Go wemocte dameŋ ijaha qatec mâreŋko mi rucnejec. Go iŋuc etec muzac no bubiaŋ manahuc siliwa dâkâne 10 â umbika moc iŋuc garezapo.”
12Iŋuc mume ŋic e dâŋ ʒiŋuc bâtikiecnewec: “Go siliwa dâkâne i tauseŋ menaneo râezo mutec no ŋicwofuŋte ŋokâ e sifu mi qazapo. Nâŋe mana‐fârehapene ŋicwofuŋzi go â Abisai â Itai ʒiŋuc hâcne ŋaza qâmoc ewec: ‘Motec wârâŋ‐nane Abisalom e nore erâ akickenʒepieŋ.’
13Eme no kosa ehuc juju‐ticne sipirickezapo ine ŋicwofuŋtao soŋsoŋ mi fozac â go ine dic banarenʒaŋ hâcne.”
14Iŋuc mume Joabezi muwec, “No gohec dameŋ mi sipirickepemu.” Iŋuc murâ Abisalom e jâczi rowecko ijaha ɋâricne domahame oc fasaekicne jahec â moc bajuwec izi bunao âeckewec.
15Âeckeme Joabe e jahacne maro babaju ŋicmotec 10 jaŋe Abisalom orâŋkerâ qahuc qâhâmombiŋ.
16Iŋuc erâ Joabezi qeŋ qahuc ʒika bâniniŋkeniŋte mume momori jaŋe Israe ŋic jopa jâpec ejarembiŋ i beherâ risiembiŋ.
17Ehuc Abisalomte qâŋɋâŋ rorâ kâteo nombâŋ sâko moc fowec ira behepie hume fainao qânâ ropie huku wefu ferâ ŋewec. Ehame Israe ŋic jaŋe wiserâ hae‐jeŋic sâc rafârembiŋ.
18Abisalom e ɋâricne juhuc ʒiŋuc muhuc ŋicwofuŋte wâneŋko ma moc âkendâŋnewec: “Ʒâŋetuc‐nane bajuocte ŋokâ‐nane moc mi jukac.” Iŋuc murâ ma i e jahacne wase bawec, irec dameŋ ʒiŋuczia Abisalomte ma mueŋgopieŋ.
19Eme Zadoko ŋokâ‐ticne Ahimazizi muwec, “Wofuŋzi ŋicwofuŋ e râsifâc‐ticne jaŋere tâpirionec batarakac biŋedâŋ i noni barâ gasackepe.”
20E iŋuc mume Joabezi ʒiŋuc âzâcnewec: “Miŋecgac ʒoaŋ ʒizi biŋedâŋ barâ rara ʒoaŋ aricne. Go tomâc fureme wiac mocko ine barazemec, miŋecgac ine ŋicwofuŋte ŋokâzi hâmojecte misac.”
21Joabezi iŋuc murâ Kusiŋic ʒiŋuc âzâcnewec: “Go rarâ wiac hone manac ekic i ŋicwofuŋ âzâcnec.” Iŋuc âzâcneme Kusiŋic e Joabere maŋfuŋko fodaperâ fahare gasackewec.
22Iŋuc eme Zadoko ŋokâ‐ticne Ahimazi e Joabe mocwâc âzâcnerâ muwec: “Go sifu mana‐naretec no Kusiŋic e bâjâpehuc gasackezapo.” Iŋuc mume Joabezi ʒiŋuc âzâcnewec: “Motec‐nane, go maŋgâŋ wemocte gasackecmu? Go biŋedâŋ baracmu irec okacne wiac moc mi rocmu.”
23Iŋuc mume Ahimazizi muwec, “No sifu gasackepemu.” Iŋuc mume Joabezi âzâcnerâ muwec, “Wiac eme gasackerâ rac.” Iŋuc âzâcneme Ahimazi e wâneŋkopec hata jaha gasackerâ rahuc Kusiŋic jâuruwec.
24Dawidi e haesac motâc jajahec jahere ŋoŋondeŋko ŋewec. Ŋehame ruc bapa ŋic e haesacte sâpeo ferâ motâc bupu faio domahuc fime rame ŋic moc buc gasackeme honewec.
25Honerâ ŋicwofuŋ wiracnehuc âzâcnewec. Âzâcneme ŋicwofuŋzi muwec, “Buc warekacko ine ʒiŋuc manazo: E biŋedâŋ bawarekac.” Iŋuc mume ŋic e bembeŋko ware fua tâcnewec.
26Eme ruc bapa ŋic e firâ ŋic moc gasackeme jaha honewec. Honerâ sacmotâc soŋaŋ wiracnehuc muwe: “No ŋic moc buc jaha gasackeme honekopac.” Iŋuc mume ŋicwofuŋzi muwec, “E wâc biŋedâŋ jaha bawarekac.”
27Eme ruc bapa ŋiczi muwec, “No bâbâni warekac ŋic ere gagasac i honepe Zadoko ŋokâ‐ticne Ahimazire gagasac tinac ekac.” Iŋuc mume ŋicwofuŋzi muwec: “E ŋic biaŋne, irec biŋe biaŋ bawarekac.”
28Iŋuc mume Ahimazi e fisirâ ŋicwofuŋ ʒiŋuc muhuc âzâcnewec: “Ŋicfâcge sâcne jufâreŋgopeneŋ.” Iŋuc murâ ŋicwofuŋte maŋfuŋko fodaperâ ʒâŋe maine mâreŋko hetutuckehuc ʒuhuckerâ muwec, “Wofuŋ Anutuge e muteŋ bâteŋ ecnezo. Eki hâcne ŋicwofuŋ‐nane go râsi egarembiŋ jaŋe ejareme kisâfâc‐jeŋic jaŋere meo fefârembieŋ.”
29Iŋuc mume ŋicwofuŋzi wiocnerâ muwec, “Motec wârâŋ‐nane Abisalom e sâcne jukac me?” Wiocneme dâŋ ʒiŋuc bâtikiecnewec: “Joabezi kiŋaŋŋicge no sorecnuhame ŋic jaŋe ʒocnehec gasacke rac warec epie honepac, erâ wemo wiacte iŋuc embieŋ i mi manakopac.”
30Iŋuc mume ŋicwofuŋzi muwec, “Kecira rârierâ domac.” Iŋuc âzâcneme rârierâ niniŋkerâ domawec.
31Ehame Kusiŋiczi fisirâ muwec, “Ŋicwofuŋ‐nane biŋedâŋ biaŋne bafisikopac. Wofuŋ e ʒoaŋ ʒira go râsi egarehuc faharembiŋ jaŋere tâpirionec bataracgukac.”
32Iŋuc mume ŋicwofuŋzi wiocnerâ muwec, “Motec wârâŋ‐nane Abisalom e sâcne jukac me?” Iŋuc wiocneme Kusiŋiczi dâŋ ʒiŋuc bâtikiecnehuc muwec: “Ŋicwofuŋ‐nane kisâfâcge sasawa, go sipiricguniŋte fahareeŋgopieŋ jaŋe motecgerao wiac fuajec iŋuc sasawa fua‐jareme muzac sâckezac.”
33Iŋuc âzâcneme ŋicwofuŋ e bu ʒaʒamaŋne fâuckezo eme haesac motâc faicnao fic ŋewec irec maŋne ira ferâ kiowec. Erâ kio kio rahuc ʒiŋuc muwec: “O ŋokâ‐nane Abisalom, ŋokâ‐nane, ŋokâ‐nane Abisalom! Noni gore okacne hâmope muzac sâckezac. O Abisalom ŋokâ‐nane, ŋokâ‐nane!”
