1Eme Wofuŋzi Nataŋ Dawidi erao soreme rawec. Ra ʒiŋuc âzâcnewec: “Hae mocko ŋic jajahec jupic, moc mafahec, moc hapetac.
2Mafaŋic e lama bulimakao bocjaha jâmbâŋ jucnembiŋ.
3Hapetac e ine lama motecne mocjaha mac jucnewec; i furine barâ jauŋkeme e jahacne â ɋiefâcne jaŋehec ŋec foc ejujec. Nânâ i runezi nâwec irec dâkâne nâjujec, opâ i râqâc‐ticnaonec nâjujec, guŋ i qicticnao fojujec, ehuc ŋic e jahacne ɋie irec sâc juwec hâcne.
4Ehame mafaŋictao ŋicmanac moczi fisiwec. Fisime e jahacne lama me bulimakao moc rorâ hezu rikec ecneocte manonierâ hapetacte lama rorâ ŋicmanac fisiwec e rike gumec ecnewec.”
5Dawidi e dâŋ i manarâ mâretec aarickeme Nataŋ âzâcne muwec, “Wofuŋ e jukacte, ŋic mâsi keci ewec, e hâmocte biŋe ezejec.
6Erâ e hapetac busâqoc mi manacnehuc wiac iŋuc ecnewecte mocjahare okacne lama 4 râcnezejec.”
7Eme Nataŋzi Dawidi âzâcnewec, “Ŋic i go hâcne. Wofuŋ, Israere Anutu, e ʒiŋuc mukac: ‘No Israe ŋic jaŋere ŋicwofuŋ âkendâŋguhuc wokemaŋ rua‐garepo, erâ Saulo ere meonec bataracgupo;
8erâ kâcɋenegere wiacfâc â kâcɋenegere ŋokacfâc gare‐fârepo, erâ Israe â Juda kikefuŋ megao râec‐jopapo, eme izi mi sâcgume wiac i me i sâcne ʒuhucke‐garezapo.
9Ehame go ine wemocte Wofuŋte dâŋ qâsuahuc, wiac maname sâqorekac i emeŋ? Go Hitiŋic Uria ʒikazi qameŋ. Amoŋŋic jaŋere ʒikazi Uria qarâ ŋokac‐ticne rotec gore ŋokac ewec.
10Go mana suacnumeŋ, ehuc Hitiŋic Uria ere ŋokac rotec gore ŋokac ewec, irec ʒikazi go â wiacfâcge moc mi behec‐ŋopazejec.’
11Wofuŋ e ʒiŋuc mukac: ‘Manakic, no garikiŋfâcge jaŋerao wiac repicne bâfuapemu. No ʒâŋe faigao ŋonâŋfâcge rocjoparâ diguracfâcge jarepe jaŋe ʒoaŋ ɋaqackoa jaŋehec foniŋmu.
12Go wiac ʒi soŋsoŋko emeŋ, noni ine ʒoaŋ ɋaɋacko Israe ŋic jaŋere ʒâŋe faio epemu!’”
13Iŋuc mume Dawidizi Nataŋ ʒiŋuc âzâcnewec: “No jâmbomac sâqocne bahuc Wofuŋ bunao bapo hâcne.” Dawidi e iŋuc mume Nataŋzi dâŋ ʒiŋuc bâtikiecnewec: “Wofuŋzi kiŋge iŋuc jaha behekac, go mi hâmocmu.
14Mâc, go gahac wiac iŋuc ehuc Wofuŋ râsifâc‐ticne jaŋe ʒâŋe‐ticne musoriŋkeniŋte hata bâfuâ‐jaremeŋte motec fuajec e ine hâmo‐jâmbâŋkeocmu.”
15Nataŋ e dâŋ iŋuc âzâcne‐fârerâ ficticnao risiewec. Ehame Uria ŋonâŋ‐ticnezi Dawidi motec rocnewec e Wofuŋzi qame hucsâko fuacnewec.
16Eme Dawidi e motecte Anutu mu wâsic ecnewec. Erâ nânâ sowa juhuc ŋafeo mâreŋko fohuc juwec.
17Ehame micnefâc‐ticne ficticnao jumbiŋ jaŋe bafahareniŋte epie hazec qarâ fohuc jaŋehec nânâ moc mi nâwec.
18Eme ʒoaŋ gie bapa 7 ira motec e hâmowec. Hâmome Dawidi kiŋaŋ qaqafâc‐ticne jaŋe motec hâmowec i mufuacneniŋte hâwic‐jopawec. Jaŋe ʒiŋuc hâcne mumbiŋ: “Motec e ɋâricne fohame mu bâmiriŋ ecnepene dâŋnâŋec moc mi manawec. Eme ʒi weniŋuc motec hâmojec i âzâcnepene manaocmu? Âzâcnepene juku sahac‐ticne moc sipirickeme!”
19Dawidi e ine kiŋaŋ qaqafâcne jaŋe jaŋackoaŋ saŋucko dâŋ muc manac embiŋ i honerâ motec e biac hâmojec iŋuc mana tarawec. Mana tararâ kiŋaŋ qaqafâcne wio‐jarerâ muwec, “Motec hâmojec me?” Wio‐jareme mumbiŋ: “Hâmojec.”
20Iŋuc âzâcnepie Dawidi e mâreŋko fohuc juweckonec faharerâ opâ ruarâ ŋaqi qoruc ɋâricne rorâ sahac‐ticne erickerâ Wofuŋte ufuŋko ferâ Wofuŋ dapecnehuc numucnewec. Iŋuc efârerâ ficticnao risierâ nânâre mume nânâ hecnepie nâwec.
21Iŋuc eme kiŋaŋ qaqafâcne jaŋe âzâcnerâ mumbiŋ: “Go keci wemo mâsi ekomec? Motec e ɋâricne fohame go nânâ sowa juhuc motecte erâ kiomec. Juku hâmome ine faharerâ nânâ nâkomec.”
22Mupie ʒiŋuc jazawec: “Motec e ɋâricne juha ine ʒiŋuc muhuc nânâ sowa juhuc kiopac: ‘Mozi manakac, Wofuŋzi aki anonoc enarehuc mana‐nareme motec e juocmu mecne?’
23Eme ʒi ine hâmojec, irec wemocte sowa juzo? No motec sâcne mi bârisiepemu. Noni erao rapemu eki ine norao sâcne mi risieocmu.”
24Eme Dawidi e ŋonâŋ‐ticne Batiseba mu bâmiriŋ ecnehuc ehec jume motec kiweckerâ rome ʒâŋene Salomo muwec. Eme Wofuŋ e Salomore ecneme
25Nataŋte micko dâŋ râeme eki Wofuŋte manasuhuc motec ʒâŋene Jedidia muwec.
26Eme Joabe e Amoŋŋic jaŋere hae ʒâŋene Raba i râsi fisicnehuc ʒika qarâ ŋicwofuŋte fic hae rowec.
27Ehuc kiŋaŋŋic Dawidirao sorec‐jopahuc muwec, “No Raba hae râsi fisicnehuc ʒika qarâ opâ ʒâkâŋ‐ticne ro rauc epac.
28Irec go ŋic gâcne sâko qâzuc‐joparâ hae i somâckehuc ro rauc ec. No hae i rorâ ʒâŋe biŋe sâkohec ezipore go iŋuc hâcne ezemec.”
29Iŋuc mume Dawidi e ŋic qâzuc‐jopa‐fârerâ Raba haeo rarâ ʒika qahuc hae i rowec.
30Ehuc ŋicwofuŋte qizecko eridu ŋewec i heunuckewec. Heunuckerâ honeme ŋemâc‐ticne 100 ewec. Erâ eridu sahacnao qânâ furi sâko ŋewec. Eme eridu i Dawidire qizecko hepie huwec. Eme Dawidi e hae irec mafa wiac bocjaha jâmbâŋ ameckerâ rawec.
31Ehuc hae irec ŋic rocjoparâ ejareme sege â kinoŋ sanaŋ â râriczi gie bambiŋ. Erâ ŋic gâcne râec‐jopame qânâ ririke ficko gie bahuc jumbiŋ. Dawidi e Amoŋŋic jaŋere hae ŋerawec ira iŋuc hâcne efârewec. Erâ e jahacne â ŋicfâcne jaŋe Jerusalem haeo risiembiŋ.
