Text copied!
CopyCompare
Kâte Bible - Samue II

Samue II 1

Help us?
Click on verse(s) to share them!
1Dawidi e Amaleke ŋic bawahac‐joparâ risie Zikilaga haeo ʒoaŋ gie bapa jajahec juwec.
2Ehame Saulo hâmowec irec faicnao ʒoaŋ gie bapa jahec â moc eme Saulore teuŋkonec ŋic moc ŋaqi qoruc‐ticne suckekicnezi qizecnao rufe ruarâ warewec. Wareku Dawidirao fisirâ mâreŋko fodapehuc dape qâhâŋ ewec.
3Iŋuc eme Dawidizi wiocnewec, “Go wenirec warekomec?” Wiocneme muwec, “No Israe momori jaŋere teuŋkonec wisepac.”
4Iŋuc mume wiocnerâ muwec, “Wiac weniŋuc fuajec? Nazatec manape.” Mume dâŋ bâtikiecnehuc muwec, “Ŋic bocjaha hâmombieŋ â momori jaŋe ʒikaonec wisembieŋ. Erâ Saulo â ŋokâ‐ticne Jonataŋ jahe wâc hâmopirec.”
5Iŋuc mume Dawidizi biŋedâŋ bawarewec ŋic e mocwâc indiŋkerâ muwec, “Saulo â ŋokâ‐ticne Jonataŋ jahe hâmopirec i weniŋucko manakic?”
6Iŋuc wiome ŋic e dâŋ ʒiŋuc bâtikiecnewec: “No Giliboa tikio jaha mâc domahuc honehape Saulo e sându‐ticnao roweckerâ domajec. Ehame keretac â becâsicko rara ŋic jaŋe fisi orâŋkembieŋ.
7Eme e râpenao firâ no honecnurâ wira‐narejec. Eme no mupac, ‘No ʒi.’
8Iŋuc mupe ʒiŋuc wio‐narejec, ‘Go mo?’ Eme mupac, ‘No Amaleke ŋic moc.’
9Iŋuc mupe mujec, ‘Go ʒira warerâ âke hâmocnuc. No ʒâiczi boc imacnukac â juju‐nane ine fokac jaha.’
10E iŋuc mume no domarâ qâhâmopac. Sipirickekicne iŋucnezi mocwâc mi juocmu, iŋuc manarâ hâcne epac. Ehuc qizec‐ticnao eri du ŋewec i â me ombâŋ‐ticnao maŋguc fowec i rorâ fekicne‐nane gorao bawarepac ʒi.”
11E iŋuc mume Dawidi e jahacne ŋaqi qoruc‐ticne bâsuckewec, eme ehec jumbiŋ ŋic i jaŋe sâc ijaha efârembiŋ.
12Eme Saulo â ŋokâ‐ticne Jonataŋ â Wofuŋte ŋicfâc, Israe guru hâcne, ʒikao hâmombiŋ irec ʒâic busâqoc sâko manarâ kiohuc nânâ sowa juhapie hae ŋafewec.
13Erâ Dawidi e ŋic biŋedâŋ bafisiwec e wiocnerâ muwec, “Go wenirec?” Wiocneme muwec, “No Amaleke ŋic, ŋe qatara juju ŋic mocte ŋokâ.”
14E iŋuc mume Dawidizi ʒuhuckerâ ʒiŋuc wiocnewec: “Go weniŋuc erâ Wofuŋzi wokemaŋ ruacnewec ŋic e qacmurâ mi hâwicgujec?”
15Iŋuc murâ ŋicfâcne jaŋeraonec ŋic moc wiracnehuc muwec, “Ŋic keci qac.” Iŋuc mume ŋic e rarâ Amaleke ŋic qâhâmowec.
16Hâmome Dawidizi ʒiŋuc muwec: “Go gahac ʒiŋuc mutaniŋkemecte socgere kiŋ i go gahacnao fozejec, ‘No Wofuŋzi wokemaŋ ruacnewec ŋic e qâhâmopac.’”
17Eme Dawidi e Saulo â ŋokâ‐ticne Jonataŋ jahere makuc bahuc kiowec.
18Ehuc gae makuc i Judaŋic he qazuc ejareniŋte mujarewec. Eme makuc i Jasare papia qizecko qâreŋkekicne fokac. Makuc i ʒiŋuc hefuawec:

19“O Israe ʒâŋe rarage i tikigao râekicne. Ŋic tai tâpirihec jaŋe waha qambiŋ.
20Gati haeo irec biŋe mi muniŋ â Asikaloŋ haere hatao mi musaweniŋ. Iŋuc eniŋmuo ine Filisa ŋokac jaŋe kiwac qawac eniŋmu â sahac tofa‐jeŋicko mi hezukicne jaŋere otâfâc jaŋe jaŋacnere manapie boc feocmu.
21“Giliboa tiki guru ŋoŋerao hoe me maniŋ titikuc mi fuazejec, erâ wâc hoezi giegaŋ wiac mi hegunuckezejec. Ŋic tâpirihec jaŋere maro i gâc hejarekicne, erâ Saulore maro i wokemaŋ mi ruacnekicne tinac gâc hecnekicne wâc.
22“Eme jopahuc jukicne jaŋere sockonec â tai tâpirihec jaŋere wokemaŋkonec Jonataŋte tepe moteczi mâc mi risiewec â Saulore ʒikazi fâri tâmiric wâc mi risiewec.
23“Saulo â Jonataŋ jahe hone aŋac ejactehuc maŋzi heâroŋ‐jofakicne, eme jahe ɋâricne juhuc me hâmocko hehetarac mi epic. Jahe tucwipe siric‐jopahuc ʒocne fârone jujupirec â laioŋ siric‐jopahuc tâpirihec jujupirec.
24“Israere otâfâc ŋoŋe Saulore erâ kioniŋ. Eki hâcne ŋaqi somboroŋ erinehec furi sâko heŋareme huwec, erâ ŋaqi‐ŋeŋicko gol râe‐ŋarewec.
25“Jai, momori tâpirihec jaŋe ʒikao hâmombiŋ i wiac hâhâwicne! “Jonataŋ e tikio qâhâmokicne fokac.
26O Jonataŋ, qomâ‐nane, no gore ʒâic busâqoc manakopac. Go aŋac baŋacne jâmbâŋ junaremeŋ, go maŋjauŋ enaremeŋ i ŋokac jaŋere sâc siricke‐jâmbâŋkekac.
27“Momori jaŋe jopapie waha forambiŋ, ehame ʒikare wiac‐jeŋic i ira foku mareŋte temâne ewec.”