Samue II 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Eme irec faicnao Dawidizi Filisa ŋic joparâ bawahuc‐jopahuc Metege‐Ama hae jowac rowec.

²Erâ Moabi ŋic jaŋe wâc bawahac‐joparâ ejareme mâreŋko waha fohapie muczi sâc bacjopame muc jajahecte sâc embiŋ jaŋe qâhâmoc‐jopaocte muwec â muc ʒoricne mocjahare sâc embiŋ jaŋe ine juniŋte mujarewec. Eme Moabi ŋic jaŋe Dawidire rurumaŋko juhuc sahac taha wiac râcnehuc jumbiŋ.

³Erâ Rehobore ŋokâ Hadadeze, Zoba ŋicwofuŋ hâcne, e mârâc jaha uucmaŋ‐ticnezi Eufrata opâo fowec i heɋâreocte rahame Dawidizi e iŋuc jaha bawahawec.

⁴Erâ Dawidi e iŋuc ehuc becâsicko rara ŋic 1 tauseŋ 700 jâoc rowec â momori kikezi rarane 20 tauseŋ jâoc rowec. E iŋuc ehuc keretac fâfâre becâsic jaŋere rua hetâcnewec, erâ keretac 100 jaŋere sâc akic‐jopawec.

⁵Eme Siria ŋic jaŋe Zoba ŋicwofuŋ Hadadeze bafickeniŋte Damasko haeonec fisipie Dawidizi Siria ŋic 22 tauseŋ qâhâmoc‐jopawec.

⁶Iŋuc erâ Aram mâreŋko Damasko haeo ira momori râec‐jopawec. Ehame Siria ŋic jaŋe Dawidire rurumaŋko juhuc sahac taha‐jeŋic râcnehuc jumbiŋ. Eme Dawidi e ira me ira rawec sâc Wofuŋzi bafickehuc dopecke‐jâmbâŋkewec.

⁷Erâ Dawidi e Hadadeze kiŋaŋ qaqafâcne jaŋe maro wiac golzi bakicne barâ jujumbieŋ i rorâ bara Jerusalem haeo râewec.

⁸Erâ ŋicwofuŋ Dawidi e Hadadezere hae jajahec Beta â Berotai irecnec aeŋ bâbâroŋ bocjaha jâmbâŋ rowec.

⁹Eme Hamati ŋicwofuŋ Toi e Dawidizi Hadadezere momori guru ʒeŋgoma bawahac‐jopawec irec biŋe manarâ

¹⁰ŋokâ‐ticne Joram Dawidi bubiaŋ dâŋ âzâcneocte erao soreme rawec. Hadadeze e dameŋ sâc Toihec ʒika qahuc juwec irec. Eme Joram e siliwa â gol â aeŋ bâbâroŋzi wiac bakicne i barâ fisiwec.

¹¹Eme wiac i wâc Dawidizi Wofuŋte biŋe qahuc siliwa â gol gâcne, ŋicguru gâcne bawahac‐jopahuc jowac rorâ râe jujec ijaha ʒuhuckewec.

¹²E ŋicguru ʒiŋuc jaŋeraonec wiac i rowec: Edom, Moabi, Amoŋ, Filisa â Amaleke, erâ Rehobo ŋokâ‐ticne Hadadeze, Zoba ŋicwofuŋ hâcne, eraonec wâc mâmâc rowec.

¹³Dawidi e iŋuc ehuc ʒâŋe biŋe sâkohec ewec. Erâ Edomŋic 18 tauseŋ hâwec wâneŋko jopawec.

¹⁴Iŋuc erâ hae‐ticnao risieocte ehuc Edom mâreŋ sâcke‐fârerâ momori râec‐jopawec. Ehame Edomŋic jaŋe Dawidire rurumaŋko jumbiŋ. Eme Dawidi e ira me ira rawec sâc Wofuŋzi kime dopec ecnewec.

¹⁵Dawidi e Israe ŋic jaŋere ŋicwofuŋ juwec. Ehuc ŋicfâcne sasawa wiac sâckoa ejarehuc mutiŋ bâtiŋ ejare jujec.

¹⁶Ehame Zerujare ŋokâ Joabe e momori jaŋere micne juwec. Â Ahiludu ŋokâ‐ticne Josafata eki ine giedâŋ mujujec.

¹⁷Ehame Ahitubu ŋokâ‐ticne Zadoko â Abiata ŋokâ‐ticne Ahimelec jahe ine taha bapa jupic. Â Serajazi ine qâqâreŋ ŋic juwec.

¹⁸Ehame Jojada ŋokâ‐ticne Benaja eki ine Kereti â Peleti ŋic qaŋeŋ‐jopawec. Â Dawidi ŋokâfâcne jaŋe ine taha bapa jumbiŋ.