Text copied!
CopyCompare
Kâte Bible - Samue II

Samue II 2

Help us?
Click on verse(s) to share them!
1Eme irec faicnao Dawidizi Wofuŋ mu wioc ecnehuc muwec, “No Juda hae ira me ira sâcne fepemu me?” Wiome Wofuŋzi muwec, “Sâcne fec.” Iŋuc mume Dawidizi muwec, “Hae wenimoira fepemu?” Mume muwec, “Heboroŋ haeo fec.”
2Iŋuc âzâcneme Dawidi e ŋonâŋ jahec‐ticne, Jesere haeonec Ahinoam â Karamele haeonec Nabalire hozec Abigai jahe rocjofame mâmâc fembiŋ.
3Erâ ŋicfâcne e jahacnehec jumbiŋ jaŋe wâc jowac‐jopame wiacfâc‐jeŋic jaŋehec mâmâc ferâ Heboroŋ haere hae boze gâcne ira jumbiŋ.
4Ehame Judaŋic jaŋe fisi tumaŋnerâ Dawidi e Juda kikefuŋte ŋicwofuŋ juocte âkendâŋnembiŋ. Erâ ʒiŋuc âzâcnembiŋ: “Jabesi‐Gileade haeonec ŋic jaŋe Saulo duckembiŋ.”
5Iŋuc âzâcnepie Dawidizi Jabesi‐Gileade haeonec ŋic jaŋerao kiŋaŋ sorec‐jopahuc muwec: “Ŋoŋe fekicne‐ŋeŋic Saulore manapie feha araŋ bacnehuc duckembiŋte Wofuŋzi ehâmo‐ŋarezejec.
6Ehuc aki anonoc eŋarezejec. Eme ŋoŋe iŋuc embiŋte biaŋne jaha eŋarepemu.
7Irec ŋoŋe hâbi gogoroŋ mi ehuc sanaŋkeniŋ. Fekicne‐ŋeŋic Saulo e hâmowec â Juda kikefuŋ jaŋe ine no wokemaŋ rua‐narehuc ŋicwofuŋ jujarepemurâ âkendâŋnumbiŋ.”
8Eme Nera ŋokâ‐ticne Abene, Saulo momorifâc‐ticne jaŋere micne hâcne, e Saulore ŋokâ Isibose rorâ Mahanaim haeo jowa rawec.
9Erâ Gileade, Ase, Jesere, Eferaim, Benjamiŋ â Israe ŋic sasawa jaŋere ŋicwofuŋ âkendâŋnewec.
10Erâ Saulore ŋokâ Isibose e jara‐ticne 40 bazurâ Israe guruo ŋicwofuŋ gie‐ticne fuŋkewec. Ehuc jara jajahec sawa ŋicwofuŋ juwec. Â Juda kikefuŋ jaŋe ine Dawidi bâjâpembiŋ.
11Eme Dawidizi Heboroŋ haeo Juda kikefuŋ jaŋere ŋicwofuŋ juhame jara 7 â mosa 6 tarawec.
12Eme Saulore ŋokâ Isibosere mume rereŋfâc jaŋe Nera ŋokâ‐ticne Abenezi micne bajareme Mahanaim haeonec Gibeoŋ haeo rambiŋ.
13Ehame Dawidire mume rereŋfâc jaŋe Zeruja ŋokâ‐ticne Joabezi micne bajareme Heboroŋ haeonec faharerâ rambiŋ. Raku Gibeoŋ opâ ʒâkâŋko bâbâfuac erâ ʒâkâŋ ŋifec â ŋifec toma‐jeŋic âtembiŋ.
14Eme Abenezi Joabe ʒiŋuc âzâcnewec: “Manatec ŋicmotec jaŋe faharerâ ʒâŋe fai‐nâŋecko sisiricko qaqac eniŋ.” Iŋuc mume Joabezi muwec, “Sâcne, fahareniŋ.”
15Mume jaŋe wâŋ wâŋ faharerâ birickembiŋ. Eme Benjamiŋ â Isibose jahere ŋicfâc 12 domambiŋ â Dawidire ŋicfâc jaŋeraonec 12 jaha fuarâ domambiŋ.
16Ehuc ru sâc qizec‐jeŋicko roroc erâ ʒikazi gâjoŋko ââke mârâŋ ehuc mâmâc jaha rândiŋkembiŋ. Irec mâreŋ ŋondeŋ i ʒâŋene Hazurim Mâreŋ mumbiŋ. Eme mâreŋ i Gibeoŋ hae mendâŋko fokac.
17Eme ʒoaŋ ira ʒikazi boc ɋârâŋke‐jâmbâŋkewec. Eme Dawidire ŋicfâc jaŋe Abene â Israe ŋic mâretec jopambiŋ.
18Eme Zeruja ŋokâfâcne ʒiŋuc jaŋe ijaha mâmâc jumbiŋ: Joabe, Abisai â Asahele. Asahele e kâte qera iŋucne kike afec jâmbâŋ juwec.

19Irec Abene jâperâ ira me ira moc mi qâsoriehuc râpefuŋnaoa gasackehuc kikeo kikeo ecnewec.
20Iŋuc eme Abenezi forisie firâ ʒiŋuc âzâcnewec: “I Asahele go gahac me?” Mume muwec, “I no nahac hâcne.”
21Dâŋ iŋuc bâtikiecneme Abenezi ʒiŋuc âzâcnewec: “Go ŋifec me ŋifec ira rahuc ŋicmotec jaŋeraonec moc bâfuarâ tâpiri‐ticne bawahahuc mafa wiac‐ticne jâoc roc.” Iŋuc muhuc âzâcneme Asahele e ʒoɋac erâ Abene jaha jâpewec.
22Iŋuc eme Abenezi mocwâc ʒiŋuc âzâcnewec: “No qâhâmocguzipore boc mi jâpecnuc. No hahacge Joabere ʒâŋe maio weniŋuc fuapemu?”
23Iŋuc âzâcneme Asahele e mana takirehuc sifu bâjâpewec. Iŋuc eme Abenezi sându tofanezi bunao âeckeme sânduzi ŋifec râpenao hemârâŋkewec, eme gasackeweckoa rândiŋke qarâ hâmocne fowec. Ehame gâcne jaŋe ʒâhec rambiŋzi Asahele fowecko fisirâ niniŋkerâ domambiŋ.
24Eme Joabe â Abisai jahe ʒuhuckerâ Abene jâpepic. Jâpe raku ʒoaŋ huhame Gibeoŋ mâreŋ burocnao hata rakacko Gia hae maickehuc Ama tiki ŋekac ira fisipic.
25Eme Benjamiŋ guru jaŋe Abenerao hesanaŋkerâ guru mocjaha embiŋ, ehuc tiki facne mocko domambiŋ.
26Ehuc Abenezi Joabe ʒiŋuc muhuc âzâcnewec: “Ʒikazi ŋic iŋuc omaec‐jopahuc foocmu me? Go râpenao ʒâic busâqoc fokac i mi manakomec? Go mo dameŋko ŋic ejaretec qomâfâc‐jeŋic jâpec‐jopaŋgopieŋ i beheniŋmu?”
27Iŋuc mume Joabezi dâŋ ʒiŋuc muhuc bâtikiecnewec: “No Wofuŋte maio mukopac, go dâŋ moc mi munʒaŋ ine ŋic jaŋe qomâfâc‐jeŋic jâpec‐jopakupie hae fureme behenʒapiŋ.”
28Iŋuc murâ Joabezi qeŋ qame ŋic jaŋe beherâ ŋembiŋ. Ehuc Israe ŋic jopa jâpec eejare me jaŋehec ʒuhuckerâ qaqac ee i behembiŋ.
29Eme Abene â ŋicfâcne jaŋe ŋafe ʒora Araba mâreŋ âtehuc juku Jordaŋ opâo fisihapie hae fureme fotâcne raku guŋpiticko Mahanaim haeo fisimbiŋ.
30Eme Joabe e Abene jâperâ rawec i beherâ risie ŋic hetumaŋ‐joparâ Asahele â Dawidire mume rereŋfâc 19 jaŋere ʒâŋe mai basawec.
31Â Dawidire ŋicâc jaŋe ine Abenere bâjâpecfâc â Benjamiŋ ŋic jaŋeraonec 360 jopambiŋ.
32Eme Asahele qâŋɋâŋ‐ticne rorâ Betelehem haeo mamac‐ticnere ʒâŋeruŋ hawec gufukicne fowec ira duckembiŋ. Erâ Joabe â ŋicfâcne jaŋe ŋafe hata rahuc juku hae furehame Heboroŋ haeo fisimbiŋ.