1Dawidi ŋokâ‐ticne Abisalom ere seŋ sahac hawari biaŋ moc juwec ʒâŋene Tama. Eme Dawidi ŋokâ‐ticne moc, ʒâŋene Amnoŋ, e maŋne Tamarao boc domawec.
2Erâ Tama e naru ʒeŋoŋ juwecte Amnoŋzi wiac i me i ecneocte honeme quŋke‐fârewec. Ehuc saseczi maŋnao boc fâcfâc jâmbâŋ âeckeme huc burec ehuc fowec.
3Eme Amnoŋte âgo moc juwec ʒâŋene Jonadaba, e Dawidi hahac‐ticne Simea ere ŋokâ. E ŋic maŋfânâŋhec juwec.
4Eme eki ʒiŋuc wiocnewec, “Ŋicwofuŋte ŋokâ, go wemocte ʒoaŋ sâc dodoc rorokac boc ehuc jukic? Go nazatec manazapo.” Mume Amnoŋzi ʒiŋuc âzâcnewec: “No qonane Abisalomte seŋ Tama ere enareekac.”
5Iŋuc âzâcneme Jonadabazi dâŋ ʒiŋuc bâtikiecnewec: “Go huc bacgukac hawari tinac fofogaoa waha fozemec. Fohaŋtec mamacgezi honecguocte wareme ʒiŋuc âzâcnezemec: ‘Manatec seŋnane Tamazi warerâ nânâ narezac. Ehuc nânâ i ʒâŋe fai‐naneoa sâcne rike bâmoc eme honerâ meticnaonec nazapo.’”
6Iŋuc âzâcneme Amnoŋ e huc burec ehuc fowec. Fohame ŋicwofuŋ e honeocte fisime Amnoŋzi ʒiŋuc âzâcnewec: “Manatec seŋnane Tamazi warerâ ʒâŋe fai‐naneoa nânâ poroŋ gâcne ba rikec eme honerâ ere meonec nânâ nazapo.”
7Iŋuc mume Dawidi e Tama dâŋ râecnehuc ʒiŋuc âzâcnewec: “Go seŋge Amnoŋte ficko rarâ nânâ rike bâmoc ecnec.”
8Eme Tama e seŋticne fowec fic ira rawec. Ehuc poroŋ uucne rorâ jârickehuc ʒâŋe fai‐ticnaoa rikewec.
9Erâ faŋ poroŋheckohaŋ bârâriehuc poroŋ rorâ hecneme nâocte takickewec. Iŋuc erâ muwec: “Ŋic sasawa hufâreniŋ.” Iŋuc mume jaŋe hufârembiŋ.
10Hufârepie Amnoŋzi Tama âzâcnerâ muwec: “Nânâ i guŋficko bawaretec go gahacne meonec nâpe.” Iŋuc mume Tama e poroŋ bawec i rorâ seŋticne Amnoŋte guŋficko baraʒiwec.
11Erâ hecneme nâocte maŋfuŋnao rame basanaŋkehuc muwec: “Seŋnane, waretec fonac.”
12Mume Tamazi dâŋ ʒiŋuc bâtikiecnehuc muwec: “Misac seŋnane, go wiac miminehec mi enarezemec. Mâsi repicne iŋucne Israe guruo moc mi eeŋgopeneŋ. Go qâto jaŋere sâc mi ec.
13No weniŋuc mimihec jupemu? Â go ine Israe guruo bec qowi jaŋere sâcko wawahane jâmbâŋ jucmu. Go wemocte wiac iŋucnere ŋicwofuŋhec muc manac mi ekomec? E gohec roroc enacte mutec mi sakarecnuocmu.”
14Iŋuc mume Amnoŋ e sifu seŋticnere dâŋ mi manawec. Erâ e ŋic tâpirihec, irec ʒoɋac ecnerâ ehec fowec.
15Eme Amnoŋzi seŋticne mâretec qaisocke‐jâmbâŋkewec. E maŋne qanaŋ seŋticnere domaweczi ʒâhec ine qaisocke‐jâmbâŋkewec hâcne. Erâ ʒiŋuc âzâcnewec: “Go faharerâ wise tâmirec.”
16Iŋuc âzâcneme seŋticnezi dâŋ bâtikiecnehuc muwec, “Seŋnane, iŋuc misac; jâpecnuzo mukic izi wiac enaremec i sirickehuc repicne jâmbâŋ ekac.” Iŋuc âzâcneme sifu dâŋticne mi manawec.
17Ehuc kiŋaŋŋic moc soŋaŋ‐ticne juwec e hefârerâ âzâcne muwec, “Go ŋokac ʒi rorâ fic râpenao râetec hume motâc basanaŋkec.”
18Ŋokac e ŋaqi ʒora‐ticne me ʒoranehec jaha rojuwec, ŋicwofuŋte otâfâc jaŋe naru ʒeŋoŋ juhuc ŋaqi iŋucne roju jumbieŋ. Eme kiŋaŋŋic‐ticnezi ŋokac rorâ fic râpenao râehuc motâc basanaŋkewec.
19Eme Tama e ʒafe rorâ qizec‐ticnao râerâ ŋaqi ʒora‐ticne me ʒoranehec rojujec i bâsuckewec, erâ meticne huhuo herâ qizec‐ticnao râehuc owa ruruckerâ kiowec.
20Iŋuc eme seŋticne Abisalomzi wiocnerâ muwec, “Seŋge Amnoŋzi gohec jujec me?” Iŋuc murâ heckecnehec muwec, “Go mâc niniŋkerâ juc. E seŋge irec manatec fârine boc mi eoc.” Iŋuc mume Tama e seŋticne Abisalomte ficko busâqoc faio juwec.
21Eme ŋicwofuŋ e irec biŋe manarâ mâretec aarickewec, okacne ine mi bazucnewec. E mârâc motec‐ticne juwecte maŋticne erao domawec hâcne.
22Abisalom e ine Amnoŋ âgodâŋ me râsidâŋ piticne moc mi ecne huŋgaŋkewec. E Amnoŋzi seŋticne Tama ʒoɋac ecneku sipirickewecte qaisockewec hâcne.
23Juku jara jajahec tarame lama kanʒaŋ bâbâtâc dameŋ maickeme Abisalomzi hahac ɋafâcne sasawa Eferaim heririŋko hae moc ŋewec ʒâŋene Baali‐Hazoro ira hefârec‐jopame rambiŋ.
24Eme Abisalom e ŋicwofuŋtao fisirâ muwec, “Fekicne‐nane, no lama kanʒaŋ bâtâcnekopac. Irec ŋicwofuŋ‐nane go â kiŋaŋ qaqafâcge fânʒepieŋ.”
25Iŋuc mume ŋicwofuŋzi ʒiŋuc âzâcnewec: “Ŋokâ‐nane, iŋuc mâcne, nâŋe sasawa mi fânʒepeneŋ. Iŋuc epene gorao ŋemâckeocmu.” Eme Abisalom e boc ʒoɋac ecneme ŋicwofuŋ e raocte mi afeckewecte mâc jambuŋkerâ râeme rawec.
26Eme razo ehuc muwec, “Go mi razo mukicte ine sifu manatec hahac‐nane Amnoŋzi nâŋehec razejec.” Iŋuc mume ŋicwofuŋzi muwec, “E wemocte ŋoŋehec raocmu?”
27Eme Abisalom e boc fotariecnekume ŋicwofuŋ e Amnoŋ â ŋokâfâcne gâcne jaŋe ehec raniŋte mana‐jarewec.
28Ehame Abisalom e kiŋaŋ qaqafâcne ʒiŋuc mutâcne‐jarewec: “Ŋoŋe ruc bajâmbâŋkehuc ŋehapie Amnoŋ e waiŋ nâku ʒeri faio ŋeme honerâ noni ‘qaniŋ’ mupe manarâ qanʒepieŋ. No nahac mupaŋke‐ŋarekopacte mi hâwic‐ŋopazejec. Hâhâwic qamaserâ hâbihec jaha ezo.”
29Eme Abisalomte kiŋaŋ qaqafâc jaŋe Abisalomzi mutâcne‐jarewec irec sâcko embiŋ. Iŋuc epie ŋicwofuŋte ŋokâfâc jaŋe faharerâ ru sâc doŋgifâc‐jeŋic jaŋere faio ferâ wisembiŋ.
30Jaŋe hatao rahuc juhapie biŋedâŋzi Dawidirao ʒiŋuc fisiwec: “Abisalom e ŋokâfâcge moc mi bâtiric‐jopahuc sasawa qâhâmoc‐jopajec.”
31Biŋedâŋ iŋuc manarâ ŋicwofuŋ e faharerâ ŋaqi qoruc‐ticne bâsuckerâ mâreŋko fowec. E iŋuc eme kiŋaŋ qaqafâcne maŋfuŋnao domambiŋ jaŋe iŋuc jaha ŋaqi qoruc‐jeŋic bâsuckembiŋ.
32Ehame Dawidi hahac‐ticne Simea ere ŋokâ Jonadabazi muwec: “Bomboŋ‐nane, go manatec ŋokâfâcge sasawa hâmombieŋ mi eoc. Aricne, Amnoŋzi sawa hâmojec. E seŋticne Tama bâsâqorewec irecnecteaŋ fuŋkerâ Abisalomzi qâhâmoocte manapaŋkeme fowec.
33Irec ŋicwofuŋ‐nane, go ŋokâfâcge sasawa hâmombieŋ dâŋ i manatec fârine mi ezejec. Amnoŋzi sawa ine hâmojec.”
34Eme Abisalom e wisewec. Ehame soŋaŋ domahuc ʒâŋe fiwec eki ʒâŋe firâ honeme ŋic guru sâkozi tikio Horonaim hataopec wahambiŋ.
35Eme Jonadabazi ŋicwofuŋ âzâcnerâ muwec, “Honekic, kiŋaŋŋicge no dâŋ gazapac irec sâcko ŋokâfâcge jaŋe risieŋgopieŋ. Irec dâŋnane fârio qakac.”
36E dâŋ mutarahame izia ŋicwofuŋ ŋokâfâcne jaŋe fisirâ owa ruruckerâ kiopie ŋicwofuŋ â kiŋaŋ qaqafâcne jaŋe iŋuc jaha kio sâqorembiŋ.
37Ehame Abisalom e wiserâ Gesuru ŋicwofuŋ Amihudure ŋokâ Talamai erao rawec. Eme Dawidi e ŋokâ‐ticnere erâ ʒoaŋne ʒoaŋne kiohuc juwec.
38Eme Abisalom e wiserâ Gesuru mâreŋko juhame jara jahec â moc tarawec.
39Eme Dawidi e Abisalomtao maŋne boc domawec. E Amnoŋzi biac hâmowec, iŋuc manarâ maname tarawec hâcne.
