1Toteco Dios, tijcactoque taya techpohuilijtoque tohuejcapan tatahua ten ta, huan nochi nopa tamanti cati tiquinchihuili huejcajquiya.
2Quena, Toteco Dios, ica mohueyi chicahualis ta tiquinquixti nopa fiero masehualme cati quinhueyichihuayayaj teteyome ipan nopa tali, huan nopa tali tiquinmacac totatahua. Quena, tiquintatzacuilti ne sequinoc huan tiquinpalehui tohuejcapan tatahua para ma momiyaquilica, huan ma moaxcatica.
3Tohuejcapan tatahua amo quitanque nopa tali ica inimacheta, yon ica ininchicahualis. Tatanque ica nopa hueyi chicahualisti cati ta tijpiya ipan monejmat, huan pampa hueyi moyolo ica inijuanti, huan achi más tiquinicnelía.
4Ta tinotanahuatijca huan tinoTeco Dios. Ta tiquinmanahuía huan tijchihua ma tatanica momasehualhua.
5Quena, ica motapalehuil tiquintanise tocualancaitacahua. Huan ica mochicahualis ininpan timoquejquetzase cati techtehuíaj.
6Pampa amo timotemachíaj ipan tocuahuitol huan tomacheta para techmanahuise huan titatanise.
7Eltoc ta, Toteco, cati tijchihua ma tiquintanica tocualancaitacahua. Ta tiquinpinahualtijtoc nochi cati techcualancaitaj.
8Mojmosta timitzpaquilismacase tinoTeco Dios. Huan timitzhueyichihuase ica huicat para nochipa.
9Pero amantzi eltoc quej techtahuelcajtoc huan techpinahualtijtoc. Yon ayecmo tinemi inihuaya tosoldados quema tiontatehuíaj.
10Tijchijqui ma ticholoca iniixpa tocualancaitacahua. Quena, inijuanti cati techcualancaitaj techtachtequilíaj huan quihuicaj nochi cati quinequij.
11Techtemactilijtoc quej tipilborregojtzitzi cati san quichiyaj para quinhuicase campa quinmictise. Huan techsemantoc campa hueli ipan sequinoc talme campa quinhueyichihuaj teteyome.
12Technamacatoc timomasehualhua ica nelquentzi quej elisquía amo teno topati.
13Nochi masehualme ipan nopa talme cati itztoque tonechca quiitaque cati techchihuilijtoc. Yeca techtaijilhuíaj huan toca paquij.
14Tijchijtoc para inijuanti cati quinhueyichihuaj taixcopincayome ma toca huetzcaca. Nochi quema techitaj, motzonojoliníaj.
15Mojmosta toixpa eltoc nopa pinahualisti hasta tijnequisquíaj timoixtzacuase,
16pampa techtaijilhuíaj huan techhuetzquilíaj nopa motacuepilijca masehualme. Quena, techpinahualtíaj tocualancaitacahua.
17Nochi ni tamanti topantitoc, masque amo timitzelcajtoque, yon amo timoiyocacajtoque ten nopa camanal sencahuali cati tijchijqui inihuaya tohuejcapan tatahua.
18Amo timoiyocatalijtoque ten ta, yon amo tijcajtejtoque moojhui.
19Pero techtahuelcajtoc campa amo aqui itztoc, campa san itztoque tapiyalme cati mosisiníaj. Techcajtoc ipan se tzintayohuilot cati eltoc quej miquilisti.
20Toteco Dios, sinta timitzelcajtosquíaj, o tijhueyichijtosquíaj se totaixcopincayo,
21ta tijmajtosquía, pampa ta tijmati nochi cati ixtacatzi eltoc ipan iyolo se masehuali. Pero amo tijchijtoque, Toteco.
22Pero masque amo teno tijchijtoque, por ta tiitztoque nechca miquilisti. Techchihuaj quej tipilborregojtzitzi cati san quichiyaj ajquiya quinmictis pampa timoaxcahua.
23¡Toteco ximotanana! ¡Amo xicochi! Amo ximoiyocatali ten tojuanti para nochipa.
24¿Para ten timoixtatía? Eltoc quej tiquelcajtoc para tojuanti titaijyohuíaj huan miyac techcualancaitaj.
25Techtahuisojtoque hasta talchi. Toxayac eltoc ipan taltepocti huan amo hueli timotananase.
26¡Ximotanana, Toteco! Techpalehuiqui. Techmaquixti pampa tahuel techicnelía.
