1¡NoTeco Dios, noyolo mocualtalijtoc para nimitzhueyimatis! Nipaquis huan nihuicas tiohuicat moixpa ica nochi noyolo.
2¡Quena, na nihuicas huan nitatzotzonas ipan noguitarra huan noarpa! Ica paquilisti na nihuicas ijnaltzi quema ayemo tanesi.
3Nimitzpaquilismacas, TOTECO, campa hueli iniixpa masehualme ten nochi altepeme, huan nimitzhueyimatis iniixpa masehualme ten nochi talme.
4Pampa ta tahuel titemachti huan nelpano miyac motaicnelijcayo, hasta conajsi ihuejcapanca ilhuicacti.
5Ma nochi mitzhueyimatica nepa ilhuicac, Toteco Dios. Huan ipan nochi taltipacti ma quitachilica masehualme mohueyitilis.
6Xijtacaquili quenicatza mitztzajtzilíaj moconehua cati tiquinicnelía. Xihuala ica miyac chicahualisti huan techmanahuiqui.
7Toteco Dios camanaltic ipan itiopa huan quiijto: “Ica paquilisti nijxelos tali Siquem huan nopa tamayamit cati itoca Sucot.
8Pampa na noaxca tali Galaad huan Manasés. Nosoldados hualase ipan tali Efraín. Huan notanahuatijcahua hualase ipan tali Judá.
9Pero cati itztoque ipan tali Moab huan Edom nechtequipanose, huan nitzajtzis ica paquilisti quema niquintantos nopa filisteos.”
10¿Ajquiya nechmacas chicahualisti para niquintanis nopa altepeme cati moyahualtzactoque ica tepamit? ¿Ajquiya nechyacanas para nicalaquis ipan tali Edom?
11¿Atac techtahuelcajtoc? ¿Amo elis ta, tiToteco Dios, cati techyacanas? Techyacana huan xiya ica nosoldados para titatehuitij, Toteco.
12Techpalehui para tiquintanise tocualancaitacahua pampa san motapalehuil ipati. Amo ipati masque miyac masehualme techpalehuisquíaj sinta ta, amo techpalehuía.
13Pero ica ta motapalehuil tijchihuase huejhueyi tamanti. Pampa san ica ta hueli ipan timoquejquetzase tocualancaitacahua.
