1Nomasehualhua, xijtacaquilica notamachtil huan nochi cati niquijtohua,
2pampa nimechnextilis tamanti cati amo aqui más quimati cati panoc huejcajquiya.
3Tamanti cati tijcactoque huan tijmajtoque pampa totatahua techpohuilijque.
4Quena, nimechmatiltis para anhuelise anquinpohuilise amoconehua nochi nopa cuajcualtzitzi huan huejhueyi tamanti, cati TOTECO quichijqui ica ihueyi chicahualis.
5Toteco Dios quimacac miyac tanahuatilme Jacob ipan tali Israel para ma monejnemiltica xitahuac, huan quinnahuati tohuejcapan tatahua ma quinnextilica ininconehua,
6huan iniixhuihua cati tacatise teipa. Huan quej nopa nochi masehualme quinixmatise itanahuatilhua Toteco.
7Yeca hasta ama miyac masehualme quintepanitaj itanahuatilhua Toteco Dios, huan motemachíaj ipan ya para quinmocuitahuis. Huan amo ma quielcahuaca nochi nopa huejhueyi tamanti cati quichijtoc Toteco. Monequi ma quitoquilijtinemica nochi itanahuatilhua.
8Pampa amo quinamiqui para elise quej inihuejcapan tatahua cati moyoltetilijque huan amo tatepanitaque. Inijuanti amo elque temachme ica Toteco Dios, yon amo quimactilijque iniyolo, yon ininemilis.
9Nopa masehualme ten tali Efraín mocuepatoj huan cholojque ipan nopa tonali quema yahuiyayaj tatehuitij. Quena, cholojque masque quipiyayayaj miyac teposti para tatehuise.
10Amo quintepanitaque itanahuatilhua Toteco Dios, huan amo quinejque nejnemise ipan iojhui.
11Quielcajque nochi tamanti cati yaya hueli quichihua. Amo quielnamijque nopa cuajcualtzi tiochicahualnescayot cati quichijqui Toteco.
12Quena, Toteco Dios quichijqui miyac tamanti iniixpa inihuejcapan tatahua ipan tali Egipto campa itoca Zoán.
13Quitajcoxelo nopa hueyi at huan quichijqui ma panoca. Ipan ome lados nopa at moquetzqui quej tepamit.
14Tonaya quinyacanqui ica se mixti para quinecahuilis, huan ica tayohua ica se mixti cati taahuiyaya quej tit.
15Ipan huactoc tali quitapo nopa hueyi tet huan quisqui miyac at para atique hasta aixhuique.
16¡Quena, ipan tet quisqui miyac at cati motalo quej se hueyat!
17Pero inijuanti quisenhuiquilijque amo quitepanitaque. Huan nepa campa huactoc tali tajtacolchijque ica Toteco Cati Más Hueyi.
18Pampa quiyejyecojque Toteco Dios huan quitajtanijque tacualisti cati iniyolo quinequiyaya.
19Hasta cualanque ica Toteco huan quiijtojque: “¿Huelis Toteco Dios techtamacas ipan ni huactoc tali?
20Xiquitaca, Toteco Dios quitapo nopa hueyi tet huan quisqui miyac at quej elisquía se hueyat hasta atzonpoli tali, pero ¿huelis nojquiya hueli techmacas tacualisti? ¿Huelis techtamacas tiimasehualhua ica nacat?”
21Huan quema TOTECO quicajqui ni tamanti, tahuel cualanqui. Huan ipan icualancayo quisqui tit ica israelitame, inijuanti cati iixhuihua Israel,
22pampa inijuanti amo quineltocaque Toteco Dios, yon amo motemachijque ipan ya para quipiya chicahualisti para quinmaquixtis.
23Pero masque quej nopa quichijque, Toteco Dios quinahuati nopa mixti huan quitapo ilhuicacti.
24Huan quichijqui ma huetzi nopa tacualisti cati itoca maná para ma quicuaca quej quema huetzi at. Quinmacac tacualisti cati hualajqui ten ilhuicac.
25Masehualme quicuajque cati elqui inintacualis ilhuicac ehuani. Quena, quintamacac hasta cuali ixhuique huan hasta mocajqui nopa tacualisti.
26Ica ihueyi chicahualis quihualicac nopa ajacat cati huala campa quisa tonati huan cati huala ica tani para ma taajaca campa ilhuicacti.
27Quichijqui ma hualaca miyaqui totome quej imiyaca taltepocti. Quena, hualajque totome quej mixti huan quej imiyaca xali cati onca iteno hueyat.
28Huan Toteco quichijqui para nopa totome ma huetzica tatajco campa quichijtoyaj iniyoyoncal.
29Huan nopa masehualme tacuajque hasta ixhuique. Toteco quinmacac nacat quej iniyolo quinequiyaya.
30Pero quema sanoc tantoyaj tacuaj, huan hasta noja quipixtoyaj nacat ipan inincamac,
31Toteco Dios motananqui ica ihueyi cualancayo, huan quintzontamilti nochi nopa telpocame cati más tapejpenilme ipan tali Israel.
32Pero masque Toteco quinchihuili ya nopa, nopa masehualme quisenhuiquilijque tajtacolchijque, huan amo quineltocaque nopa huejhueyi tiochicahualnescayot cati yaya quichijqui iniixpa.
33Yeca Toteco quintaijyohuilti ipan nochi ininemilis huan quintzontamilti san ica se talojtzi.
34Pero teipa, quema ya quintzontamiltijtoya sequij, huajca quena, ne sequinoc quitemojque Toteco Dios. ¡Quena, nimantzi mocuetque huan quitoquilijque!
35Huan quielnamijque para yaya Toteco Dios cati quinmocuitahuiyaya para amo quinajsis cati amo cuali. Huan quielnamijque para Toteco Cati Más Hueyi san yaya inintemaquixtijca.
36Pero nopa israelitame amo quitoquiliyayaj ica nochi iniyolo. ¡Amo! Quitoquiliyayaj san ica inincamac.
37Pampa iniyolo eltoya huejca ten Toteco. Huan amo quichihuayayaj cati quitajtolcahuilijtoyaj Toteco para quichihuase.
38Pero Toteco quipixqui hueyi iyolo ica inijuanti. Quintapojpolhuiyaya inintajtacolhua huan amo quintzontamiltiyaya. Miyac huelta quitilquetzqui icualancayo para amo quintatzacuiltis.
39Pampa Toteco quielnamijqui para inijuanti san elij masehualme cati ininemilis ixpolihui san ica se talojtzi, huan amo quema mocuepaj sempa.
40Nepa ipan huactoc tali, tahuel miyac huelta amo tatepanitaque ica Toteco Dios huan quiyolcocojque.
41Talojtzitzi quiyejyecojque, huan ica ya nopa quichihualtiyayaj para Toteco ma quintzontamilti. Yon amo quicahuilijque para Toteco ma quintiochihua, yaya cati ininDios israelitame huan cati Tatzejtzeloltic.
42Quielcajque ihueyi chicahualis huan iteicnelijcayo. Huan quielcajque quenicatza quinmanahui inimaco inincualancaitacahua.
43Quielcajque quenicatza Toteco quititanqui tatzacuiltili ipan Zoán ipan tali Egipto.
44Quielcajque quenicatza quicuetqui esti nopa at huan ayecmo aqui huelqui quiic.
45Quielcajque quenicatza quintitanqui tahuel miyac sayolime hasta quitemitijque nopa tali. Quielcajque quenicatza nopa temasolime quitemitijque nopa tali Egipto.
46Toteco quintitanqui ocuilime huan chapolime para ma quicuaca inintatochui huan ininpixquilis.
47Ica tesihuit quitzontamilti inixocomecamil huan inihiguera mil.
48Inihuacaxhua mijque ipan potrero pampa Toteco Dios quinmajcahuili tesihuit cati tahuel huejhueyi. Huan ininborregojhua mijque ica tapetancayot.
49Quena, Toteco tahuel cualanqui ica inijuanti, huan yeca quintitanili tacuajcualocayot huan taohuijcayot. Huan quintitanili se grupo ten ilhuicac ehuani cati tetzontamiltíaj.
50Cualanqui nelchicahuac huan amo quimanahui yon se Egipto ejquet. Senquisa quintitanili tatzacuiltili huan huejhueyi cocolisti.
51Teipa Toteco quinmicti nopa achtohui ehuani ipan sese familia ten tali Egipto. Quena, quinmicti cati elqui ininachtohui fuerza quema pejque quinpiyaj coneme.
52Pero quinquixti imasehualhua quej elisquíaj pilborregojtzitzi, huan quinyacanqui ica cuajcualtzi ipan nopa huactoc tali.
53Quinyacanqui ica miyac temachili para ma amo majmahuica. Pero nopa hueyi at quinatzonpolihuilti inincualancaitacahua.
54Huan quinhuicac hasta campa inepa nopa tali cati tatzejtzeloltic. Nopa tali cati quipiya miyac tepeme cati Toteco quintanili para inijuanti.
55Iniixpa quinquixti nopa masehualme cati itztoyaj ipan nopa tali. Teipa quitamachijqui huan quinmajmacac nopa huejhueyi familias ten israelitame para iniaxca. Huan nopona quincajqui ma itztoca.
56Pero masque quinchihuili ya nopa, inijuanti quisenhuiquilijque quiyejyecohuaj huan quicualancamacaj Toteco Cati Más Hueyi. Huan amo quinejque quitepanitase icamanal.
57Yeca mocuetque para amo calaquise ipan nopa tali tatencahuali huan quicamaijixnamijque san se quej inintatahua quichijque. Huan quej se cuataminti cati huijcoltic amo yahui xitahuac quema quimajcahuaj, inijuanti nojquiya amo yajque xitahuac para quichihuase ipaquilis Toteco.
58Quicualancamacaque Toteco pampa mochijchihuilijque teteyome huan taixpamit para quinhueyichihuase ininteteyohua.
59Pero quema Toteco Dios quiitac ya ni, tahuel cualanqui huan pejqui quincualancaita.
60Huan quitahuelcajqui itiopa cati eltoya ipan altepet Silo, nopa yoyon cali campa itztoya inihuaya imasehualhua.
61Huan Toteco quincahuili inincualancaitacahua ma quihuicaca iCaxa cati quinpixtoya itanahuatilhua. Elqui quej quincuilijque ininchicahualis huan iniyejyejca.
62Nojquiya quintemactili imasehualhua inimaco inincualancaitacahua para ma quinmictica ica macheta, pampa yaya tahuel cualantoya inihuaya.
63Inintelpocahua quintatijque, huan iniichpocahua quintzontamiltijque, yon amo quiaxilijque para monamictise huan huicase ipan nenamictili.
64Quintzontamiltijque nopa totajtzitzi ica macheta huan inisihuajhua nojquiya mijque nimantzi, yon amo quinchoquilijque inihuehuejhua.
65Huajca Toteco motananqui quej quema se acajya cochi huan mijquehua, o quej se tetica tacat cati tahuel tzajtzi chicahuac pampa ihuintitoc.
66Huan Toteco quinichtacahui quema quintehui icualancaitacahua. Quena, quinhuejcamajcajqui huan quintitanqui ipan se lugar campa quipanose pinahualisti para nochipa.
67Pero Toteco quintahuelcajqui nopa huejhueyi familias cati hualajqui ten José huan Efraín.
68San quintapejpeni ihueyi familia Judá, huan nopa tepet Sion cati yaya tahuel quiicneliyaya.
69Huan nopona quichijchijqui itiopa cati cuajcualtzi huan temachti, huan cati huejcahuasquía para nochipa quej huejcahua ilhuicacti huan taltipacti.
70Quitapejpeni itequipanojca, David, quema quinmocuitahuiyaya borregojme,
71quema yahuiyaya inintepotzco nopa tena borregojme cati quinpiyayayaj ininconehua, huan quinhualicayaya para ma quinmocuitahui. Huan Toteco quichijqui David ma quinyacana imasehualhua, nopa israelitame cati quintapejpenijtoya para iaxcahua.
72Huan quena, David quinmocuitahui imasehualhua Toteco ica nochi ichicahualis huan ica nochi iyolo.
