1¡Xijtascamatica TOTECO pampa yaya nelía cuali! ¡Itaicnelilis amo quema tamis!
2Nochi amojuanti cati TOTECO amechmanahuijtoc, xitepohuilica. Quena, xitepohuilica para yaya amechmaquixtijtoc inimaco amocualancaitacahua.
3Yaya ya quinsentilijtoc nochi nopa masehualme cati itztoyaj campa hueli ipan taltipacti. Quinsentili cati itztoyaj ica norte, ica sur, ica campa quisa tonati huan ica campa calaqui.
4Sequij nentinenque ipan huactoc tali, yon amo quipiyayayaj ininchaj, yon amo quipixque se altepet para ipan itztose.
5Amictinemiyayaj huan mayantinemiyayaj, hasta quimachiliyayaj para miquisquíaj pampa ayecmo quipiyayayaj chicahualisti.
6Huajca quitzajtzilijque TOTECO para ma quinpalehui, huan yaya quinpalehui.
7Quinyacanqui xitahuac ipan se ojti cati temachti. Huan quinhuicac ipan se altepet para nopona ma itztotij.
8Xijhueyimatica TOTECO pampa yaya tahuel tetasojta, huan quichihua huejhueyi tamanti cati nochi san quitachilíaj.
9Pampa Toteco quitamaca cati teicneltzi huan mayantinemi. Quiaixhuitis cati amictinemi.
10Sequij inijuanti itztoyaj ipan tzintayohuilot ipan tatzacti huan nechca para miquise. Itztoyaj ilpitoque ica tepos cadenas.
11Ya nopa ininpantic pampa inijuanti moyoltetilijque ica cati TOTECO quinnahuatijtoya, huan amo quitacaquilijque Toteco Cati Más Hueyi.
12Yeca Toteco quincajqui ma taijyohuica ipan nopa tequit cati tahuel teticayo. Quena, huetzque huan amo aqui quinpalehui para sempa motananase.
13Huajca quema ayecmo quimatiyayaj taya quichihuase ica nopa taijyohuilisti, quitzajtzilijque TOTECO, huan yaya quinmanahui ten nopa taijyohuilisti
14Quinquixti ipan nopa tzintayohuilot huan quinmanahui para amo miquise. Huan quicotonqui nopa tepos cadena cati ica quinilpitoyaj.
15Xijhueyimatica TOTECO pampa yaya tahuel tetasojta huan quichihua huejhueyi tamanti cati ica masehualme san quitachilíaj.
16Pampa yaya quitapanqui nopa miyac caltemit ten bronce ipan tatzacme, huan quihuejhuelo nopa teposme cati ica quintzacuayayaj nopa caltemit.
17Sequij masehualme tahuel mohualiquilijque taohuijcayot, pampa moyoltetilijque ica Toteco huan quiixpanoque.
18Huan ipan nopa taijyohuilisti ayecmo mayanayayaj por inincocolis huan pampa itztoyaj nechca para miquise.
19Pero quema ayecmo quimatiyayaj taya quichihuase ica nopa taijyohuilisti, quitzajtzilijque TOTECO huan yaya quinmanahui.
20Toteco camanaltic huan mochicajque. Huan quej nopa quinmaquixti para amo miquise.
21Xijhueyimatica TOTECO pampa yaya tahuel tetasojta huan quichihua huejhueyi tamanti cati nochi quitachilíaj.
22Xijpaquilismacaca Toteco huan yaya quiitas quej elisquía se tacajcahualisti. Huan xihuicaca huan xitepohuilica nochi cati yaya quichijtoc.
23Nopa masehualme cati nemij ica inincuaacalhua ipan hueyi at, huan yahuij ipan nochi taltipacti para tanamacase huan tacohuase,
24nojquiya quiitztoque nopa cuajcualtzitzi tamanti cati TOTECO quichijtoc ipan at.
25Quiitztoque quema TOTECO camanaltic huan quichijqui ma motanana se ajacat cati chicahuac, huan quitananqui nopa at.
26Nopa cuaacalme motananayayaj huan sempa huetziyayaj atatzinta. Huan nopa masehualme cati itztoyaj ipan nopa cuaacalme pejque huihuipicaj huan majmahuij.
27Inijuanti huihuipicaque huan momimilojque quej ihuintini, huan ayecmo quimatque taya quichihuase.
28Huajca quema itztoyaj ipan taohuijcayot, quitzajtzilijque TOTECO, huan yaya quinmaquixti ten cati quintequipacholmacayaya.
29Quema huetziyaya at huan taajacayaya chicahuac, yaya quitacahualti nopa hueyi at para ma ayecmo molini, huan mochijqui icamanal.
30Huan inijuanti pajque miyac quema quiitaque ya moquetzqui nopa at. Huan quej nopa Toteco quinyacanqui ica cuali hasta atenti campa monequi ajsise ica inincuaacalhua.
31Ma quihueyimatica TOTECO pampa yaya tahuel tetasojta, huan quichihua huejhueyi tamanti cati nochi quitachilíaj.
32Ma quipaquilismacaca Toteco miyacapa iniixpa nochi masehualme huan iniixpa nopa huehue tacame cati tayacanaj ipan nopa tali.
33Toteco quinhuatztoc hueyame huan quinchijtoc quej huactoc tali. Nojquiya hueli quinhuatza campa meya at.
34Nopa cuali tali cati tahuel taeliltía quichijtoc ma ayecmo taelilti. Huan ya ni quichijqui por inintajtacolhua nopa masehualme cati itztoyaj nopona.
35Pero nojquiya nopa huactoc tali campa amo teno eli quichijqui ma taelilti. Nojquiya quichijqui ma quipiya miyac at cati meya campa hueli.
36Huan quinhuicac nopa masehualme cati mayantinemiyayaj para ma itztoca nopona, huan ma quichihuaca inialtepe.
37Nojquiya quichijqui para ma tocaca ipan mila, huan ma quichihuaca xocomeca mili, huan ma quipixcaca tahuel miyac inintajca.
38TOTECO tahuel quintiochijqui. Nojquiya momiyaquilijque huan quinpixque miyac inihuacaxhua.
39Teipa pejqui caxani inimiyaca nopa masehualme, huan nochi mocajque teicneltzitzi, pampa quinajsic taohuijcayot, tequipacholi huan taijyohuilisti.
40Huan yaya quinechcapantali nopa tayacanani cati mohueyimatiyayaj, huan quinchijqui ma mocuapoloca campa amo oncac ojti huan yeca ayecmo quimatque canque yahuiyayaj.
41Pero yaya quinmanahui nopa teicneltzitzi. Quinmiyaquili ininconehua quej elisquíaj pilborregojtzitzi hasta mochijque tahuel miyac.
42Ma quiitaca nochi cati quichijtoc TOTECO nochi cati nemij xitahuac iixpa, huan ma paquica. Pero nochi nopa fiero masehualme ma mocamatzacuaca.
43Masehualme cati talnamiquini quimachilise nochi ni tamanti cati Toteco quichijtoc, huan quiajocuise ipan iniyolo. Inijuanti moyolilhuise quenicatza TOTECO quintasojtatihualajtoc imasehualhua.
