1¡Na nimitzpaquilismacas, TOTECO! ¡TOTECO Dios, nelía tihueyi! Campa ta tiitztoc nochi tacuajcualtzi huan cuajcualtzi.
2Mitzyahualojtoc taahuili cati tahuel cuajcualtzi. Ta tijpatajqui nopa ilhuicacti quej se masehuali quipatajtosquía se yoyomit.
3Eltoc quej quema timochanti, tijtali nopa cuatetomit ipan at cati huejcapa, huan tijsencajqui nopa mixti para elisquía mocarros. Ta tihueli tinejnemi san ajacatipa.
4Tiquintequihuía moilhuicac ejcahua quej motatitanilhua huan tiquinchihua ma elica quej tilelemecti.
5Ta cuali tijtatzquilti ni taltipacti para amo mijcuenis ten campa eltoc.
6Tijchijqui ma huetzi miyac at cati quiixtzajqui taltipacti quej elisquía iyoyo. Quena, tijchijqui at ma tejco hasta quiixtzajqui nochi tepeme.
7Pero quema ta ticamanaltic huan ticajhuac nopa at ipan hueyi at, nopa at motalojtejqui huan mosejcotilito.
8Tejcoque tepeme huan nopa tamayame temoque ipan inilugar campa ta titanahuati ma motalica.
9Teipa tiquintalili ininepa nopa huejhueyi at para ayecmo quema ma quiixtzacuaca tali.
10Ta tijchijqui at ma motalo ipan atajti campa tepeme, huan ma temotihuala hasta quitemitis campa más tatzinta nopa tamayame campa hueli.
11Ica nopa at tiquinamaca nochi tapiyalme para ma atica. Ipan nopa atajti aixhuij nopa burrojme cati nemij cuatita.
12Nopa totome quichihuaj inintepasol iteno nopa atajti, huan huicaj quema itztoque ipan inimacuayo nopa cuame.
13Ta tijchihua ma huetzi at ipan tepeme, huan tijchihua ma taelilti nopa tali.
14Quena, ta Toteco tijchihua ma moscalti sacat para ma tacuaca tapiyalme. Huan tijchihua ma onca quilit, cuatajcayot huan cuayoli cati masehualme quitocaj para ma ica mopanoltica.
15Nojquiya tiquinmaca xocomecat iayo para ma ica yolpactoca, huan aceite para ma mopoloca ipan inixayac, huan nojquiya tiquinmaca tacualisti para ma quipiyaca fuerza.
16Ica nopa at moscaltíaj nopa tiocuame cati ta, TOTECO, tijtojqui ipan tali Líbano. Nopa cuame tahuel huejcapantique huan quipiyaj miyac inixochiyo.
17Ipan nopa cuame motepasoltíaj nochi tamanti totome. Huan ipan nopa ciprés cuahuit motepasoltía nopa totot cati itoca cigüeña.
18Inintzonixco nopa huejhueyi tepeme onca sacat para nopa chivojme cati nemij cuatita. Huan campa cocoyocatoc nopa teme, mochantijtoque nopa pesojme.
19Toteco, ta tijchijqui metzti para quinextis ipan taya metzti itztoque masehualme. Huan nopa tonati tijchijqui para tenextilis sesen tonal.
20Ta tijtitani nopa tzintayohuilot huan mochihua yohuali, huan quema tayohua, quisaj nochi tecuanime cati itztoque ipan cuatitamit.
21Nopa leones cati noja conetzitzi nanalcaj pampa mayanaj. Huan quitemohuaj nopa tacualisti cati ta, Toteco Dios, tiquinmacas.
22Quema quisas tonati sempa onmotatíaj ipan iniosto.
23Huan masehualme quisaj para tequititij, huan tequitij chicahuac hasta tiotac.
24¡TOTECO, nelía tijchijtoc miyac tamanti! Huan nochi tamanti tijsencajtoc ica miyac talnamiquilisti. Yajmaxtic taltipacti temitoc ica miyac tamanti cuajcualtzitzi cati ta tijchijtoc.
25Xiquitaca nopa hueyi at cati tahuel patahuac huan hueyi. Nopona itztoque miyac tamanti tapiyalme pisiltzitzi huan huejhueyi.
26Nopona nemij nopa huejhueyi cuaacalme, huan nopona itztoc nopa hueyi tapiyali itoca leviatán cati temajmati cati ta tijchijqui para ma mahuilti ipan hueyi at.
27Nochi ni tapiyalme mochiyaj ipan ta para xiquintamaca quema monequi.
28Huan quema tiquinmaca inintacualis, inijuanti quiselíaj. Ta tijtapohua ica motaicnelilis huan tiquintamaca hasta ixhuij ica ten más cuali.
29Pero sinta tiquintahuelcahua, inijuanti motequipachohuaj. Huan sinta tiquinquixtilía ininemilis, miquij huan mocuepaj taltepocti.
30Huan quema ta tijtitani moTonaltzi cati temaca nemilisti, tacatij sempayano para sempa ma momiyaquilica huan tacualnesis ipan ni taltipacti.
31¡Ma tijhueyitalica TOTECO pampa ihueyitilis amo quema tamis! ¡Ma quipanti paquilisti TOTECO ipan nochi cati quichijtoc!
32Quema Toteco quitachilía taltipacti, ni taltipacti huihuipica. Huan quema quinajsi tepeme, inijuanti lemenij.
33Nijhuicatis TOTECO nochi tonali cati niitztos ipan ni tali. Quena, nijpaquilismacas Toteco Dios ica tiohuicat hasta tamis nitaijyotilanas.
34Ma quipacti TOTECO nochi cati nimoyolilhuía ten ya, huan na nimopaquilismaca ipan ya.
35Ma miquica nochi cati quinpactía tajtacolchihuaj ipan ni taltipacti. Quena, ma ayecmo itztoca cati amo quinequij quitepanitase TOTECO. Pero na nijpaquilismacas ica nochi noyolo. ¡Paquilisti!
