1TOTECO, ta cati tinoDios huan tinotemaquixtijca. Tonaya huan tayohua nimitztzajtzilijtoc para techpalehui.
2Techtacaquili quema nimotatajtía huan quema nimitztzajtzilía,
3pampa nijmati nisiyajtoc ica nochi cati amo cuali hasta nijmati ya nechcatitoc para nimiquis.
4Miyac quiijtohuaj para ya tantinemi nonemilis huan para ayecmo nijpiya chicahualisti.
5Masehualme nechtahuelcajtoque para ma nimiqui. Niitztoc quej se cati ya mijqui ipan tatehuilisti huan nochi quielcahuaj sinta itztoya. Huan eltoc quej ta techelcajqui huan ayecmo techmocuitahuía.
6Ta techmajcajtoc ipan nopa ostot cati más huejcata campa onca tzintayohuilot cati más yayahuic.
7Mocualancayo nechtaijyohuiltía chicahuac huan talojtzitzi nechtatzintanhuetziltía más.
8Tijchijtoc para noteixmatcahua ma nechtahuelcahuaca huan ma nechijiyaca. Eltoc quej niitztoc ipan se tatzacti huan amo hueli niquisa.
9Ayecmo hueli nitachiya pampa tahuel nimochoquilijtoc. Mojmosta nimitztajtanía motapalehuil, huan nimomatanana quema nimotatajtía ica ta, TOTECO, para techtasojta.
10Pero nijmachilía para, quena, nimiquis nimantzi, huan ¿taya ipati elis para na nopa tiochicahualnescayot cati tijchihuas quema ya nimictoc? ¡Amo teno! ¿Huelis nimitzpaquilismacas quema ya nimictos?
11Se mijcatzi cati ya quitalpachojtoque amo huelis tepohuilis para tijpiya hueyi taicnelili. Amo huelis tepohuilis para titemachti.
12Nepa campa tzintayohua amo huelise tepohuilise nopa huejhueyi tiochicahualnescayot cati tijchihua. Mijcatzitzi itztoque ipan se tali campa ayecmo teno quielnamiquij, huan amo huelis mitzelnamiquise para san ta tixitahuac.
13Pero na nimitztzajtzilijtoc ta TOTECO, huan sese ijnaloc nochi cati niquijtohua quema nimotatajtía ica ta ajsi hasta moixpa.
14TOTECO, ¿para ten tijhuejcamajcajtoc nonemilis? ¿Para ten tiquijcuenía moxayac huan titachiya sejcoyoc?
15Na niitztoc ipan taijyohuili huan tequipacholi hasta quema noja niitztoya nitelpocat. Majmajti huan miquilisti cati ta techtitanilijtoc nechtoquilijtinemi, huan ama ayecmo nihueli más niquijyohuía.
16Miyac huelta hualajtoc ipan na mohueyi cualancayo, huan nopa majmajti cati techtitanilijtoc tahuel nechtaijyohuiltía.
17Quena, nochi nopa tamanti nechyahualojtoc quej at.
18Nochi cati niquinicnelía huan cati eliyayaj nohuampoyohua tiquinchijtoc ma nechtahuelcahuaca, ayecmo nechchihuilíaj cuenta. Huan noteixmatcahua tiquintalijtoc ipan tzintayohuilot.
