1Xrana' Dios, bene da dxenaba' lau', ne bze̱ naga da dxuláwizra' Lue'.
2Quebe gucache lau' lawa' neda', lawe' da lu da ste̱be zua'. Bze̱ naga neda', ne beché̱beche chia' gate dxuláwizra' Lue'.
3Naca xel-la' nabán chia' ca zren chee̱ xi' da dxexenítete̱. Xu'u da la lu zrita chia' ca tu xi' da dxálale̱'e̱ na.
4Dxedú lazra', ne naca lázrdawa' ca tu xixre' da dxecuade, na' québedxa dxenná na gudagu xeta.
5Lawe' da dxebezre wé̱'le̱'a ba nazrítale̱'a.
6Naca' ca tu situgún dxedaba' tu lu xe̱zr la xu bizre, ne ca tu bzriu zríaba' lawe' tu xu'u ze la'a.
7Dxíchaja' bchigala, ne naca' ca tu bxinne zríaba' túzeba' xrgu'u sibe.
8Tu zra tu zra tu dxulucháchale̱zqueze benne' dxeledábague̱' neda'. Benne' ca' dxelecuídene̱' neda' dxuluchínene̱' la' neda' gate nu benne' dxelegú'e̱ de'.
9Lu waláz chee̱ xeta dxawa' de, na' nisa dxebezra' dxechixre na da dxé'aja'.
10Caní dxaca chia' lawe' da dxezra'u neda', ne dxecuídenu' neda'. Guca'u neda', na' gudxú'unu' neda'.
11Naca xel-la' nabán chia' ca tu zrul-la da dxedeze, na' naca' ca tu xixre' da ba nabizre.
12Lue', Xrana' Dios, tu chí'izqueze zu', na' cheajlesá lazre' xúgute̱ cuen bénneache Lau'.
13Chasu', ne xexache lazru' benne' zaj zre̱'e̱ xe̱zre Sión, lawe' da ba bzrin zra xexache lazru' benne' ca'.
14Netu', we̱n zrin chiu', nazrí'intu' xiaj ca' chee̱ xe̱zre na'. Dxéquentu' zi' lawe' da ba nabía xi na.
15Nadxa benne' xe̱zr la xu ca' xelezrebe̱' lau Lue', Xran. Xelezrebe xúgute̱ benne' wenná bea chee̱ xe̱zr la xu nigá da xabáa chiu',
16gate ba bechisu' xe̱zre Sión, Xran, ne xelelé'equezne̱' ca naca da xabáa chee̱ na,
17gate na' guzé̱ nagu' da dxelenaba benne' ca' guleaj xíchaju', ne québedxa guzú' chalá'ala da dxelata' xuene̱' Lue'.
18Xuaj da nigá chee̱ xululaba benne' ca' za zá'aca, na' benne' ca' za xelalaj xelúe lá'ane̱' Xránadxu Dios.
19Naga zua Xránadxu xabáa gunné̱'e̱. Naga zue̱' xabáa blé'ene̱' lu xe̱zr la xu nigá.
20Dxelé'ene̱' benne̱' dxelebezre xache', benne' zaj xu'e̱ lizre xia, na' gusane̱' benne' ca' ba zaj nachugue̱' chee̱' xelatie̱'.
21Xuluzenne̱' benne' zaj zre̱'e̱ xe̱zre Sión ca szren naca La Xránadxu Dios, chee̱ xelúe lá'ane̱' Le̱' lu xe̱zre Jerusalén,
22gate xelezraga bénneache chee̱ xúgute̱ xe̱zre, ne xúgute̱ cue' xe̱zr la xu chee̱ xulucá'ana szrene̱' Xránadxu Dios.
23Xránadxu Dios be̱ne̱' gute ni'a na'a gate ne naca' cuide'. Xeláteze ca be̱tie̱' neda'.
24Nadxa gunnía': Dios chia', quebe gutiu' neda', gate quebe ne gué̱xrua'. Lue' tu chí'izqueze zu'.
25Nédxudaute̱ Lue' bzu' xe̱zr la xu nigá, na' nen na'u be̱nu' xabáa.
26Xelebía xi' da ca', san tu zúazquezu' Lue'. Welexru xúgute̱ da ca' ca tu ladxe'. Ca dxuchadxu zra lánadxu tuzruj, ca' gucha'u da ca', na' xucúbeu' na.
27Túzqueze ca nacu' Lue', ne québequeze te chiu' Lue'.
28Zrí'inentu' netu', we̱n zrin chiu', xelezrabe' chawe', na' guzé̱ chúchuquezu' zri'ine zre súantu' lau Lue'.
