1Wɛ̃ndade gbãasaidee kɛ̀ èe a yã'ↄ̃ammanↄ bↄɛɛ Diinɛ aduakɛna. Dii, ǹ ma aduakɛna ma, ǹ tó ma wiii n kii le.
2Ǹton wɛ́ɛ gá ǹ zumɛ ma nawɛ̃akɛgurↄro, ǹ swã kpámazi, tó ma n sisi, ǹ wemala kpakpaa,
3Zaakɛ ma gurↄↄ e gɛ̃tɛɛ lán tɛ́sukpɛ bà, ma mɛ̀ e puusu bↄↄ lán tɛ́yↄ̃ bà.
4Ma nↄ̀sɛ yàka, ma gↄ̃ lán sɛ̃̀ kori bà, ma sã pↄ́bleyãn.
5Ma m̀bona gbãngbãn bé à tò ma gↄ̃ wákabaran ũ.
6Ma gↄ̃ lán gbáa tiongoo bà, lán bɛzĩ koroo bà.
7Ii è gɛ̃ ma wɛ́ɛnlo, ma gↄ̃ lán bãa kɛ̀ zↄ̃ kpɛ́ musu adoo bà.
8Ma ibɛɛnↄ ègↄ̃ ma sↄ̃sↄ̃ↄ gurↄ píngi, ma faborinↄ è gbɛ̃ ká kↄ̃n ma tↄ́o.
9Túbun mɛɛ̀ ble pↄ́blee ũ, ma wɛ́ɛ'i è ká ma íminan
10n pↄfɛ̃ kↄ̃n n pɛ̃tɛ̃o yãnzi, zaakɛ n ma sɛ n ma zĩnna.
11Ma gurↄↄ e gɛ̃tɛɛ lán ↄra bà, ben mɛ́ɛ gagaa lán sɛ̃̀ bà.
12Mpi sↄ̃ Dii, nɛɛ̀gↄ̃ kú kpatan gurↄ píngi, n tↄ́ é garo ai wa boriia.
13Nɛ́ fɛɛ ǹ Zayↄn wɛ̃nda gwa, zaakɛ gurↄↄ kà, gurↄↄ kɛ̀ ń dìɛ kà, kɛ̀ nɛ́ à pↄnnaa wɛtɛ.
14À gbɛ̀nↄ kɛ̀ n zↄ̀blerinↄnɛ maa, à gborona bùsu è kɛńnɛ wɛ̃nda.
15Bori píngi é vĩa kɛnnɛ, Dii, anduna kínanↄ é n kíkɛɛ dↄ̃ ń píngi.
16Zaakɛ Dii é Zayↄn kɛkɛ à bo dↄ, eé bↄ à mↄ́ḿma kↄ̃n gakuio.
17Eé takaasideenↄ aduakɛna sí, eé ń wɛ́ɛkɛna kpá swãkotoro.
18À tó yã kɛ̀ gↄ̃ kɛ̃na kpɛɛdeenↄ yãnzi lɛ gbɛ̃ kɛ̀ aↄ̃ kpɛ́nↄ Dii táaki lɛ́.
19Dii tↄↄtɛ gwà zaa a kúkiia, zaa musu à wɛ́ɛ kpàɛ gĩzĩ,
20lɛ à gbɛ̃nↄ zↄ̀blena wii ma à ń bↄ gaa lɛ́zĩ yãnzi,
21Weé Dii tↄ́ bↄ Zayↄn, weé à táaki lɛ́ Yerusalɛmu.
22zĩ kɛ̀ gbɛ̃nↄ é kↄ̃ kakↄ̃a gwe, kↄ̃n kpatablerinↄ wà dↄnzi kɛnɛ.
23À ma gbãaa bùsa zɛ́gbãn, à ma wɛ̃̀ndi kɛ̀ kusu,
24ben ma bè: Ma Luda, ǹton ma wɛ̃̀ndi bↄ gugbãnlo, mmↄn kɛ̀ ń kuu ai wa boriia.
25N anduna kãsãa pɛ̀ɛ zaa káaku, musu nɛ́ n ↄzĩimɛ.
26Aↄ̃ píngi é gɛ̃tɛ, mↄde nɛ́gↄ̃ kuu, aↄ̃é zi kũ lán pↄ́kãsãa bà, nɛ́ ń liɛ lán uta bà ǹ ń zĩnna.
27Mpi sↄ̃ n kuuna ègↄ̃ dↄ̃nkↄ̃, n gurↄↄ yãana vĩro.
28N zↄ̀blerinↄ nɛ́nↄ égↄ̃ kuu aafia, aↄ̃ boriinↄ é kãsãa pɛ́ɛ n kuu.
