1X̱ana' Dios, benle da' ẕnnabla' Le', na' bze nag da' žḻiža' Le'.
2Bi wkache' ḻawo' Le' ḻawa' neda', dan' že' zedla'. Bze nag chia', na' bechebe chia' kate' žḻiža' Le'.
3Nak yeḻa' nban chia' ka žen che yi' da' ẕnitlen. Yo'o da' ḻa ḻo žit chia' ka to yi' da' žáḻa'ḻe'en.
4Žedó ḻaža'a, na' nak ḻáẕda'wa' ka to yix̱e' nkwaden, na' biž ẕnnan gawa' yet.
5Dan' ẕbeže wé'ḻi'a ba nžítḻi'a.
6Naka' ka to lab ẕlaba' to ḻo yežlyó biž, na' ka to bedkoke žíaba' ḻawle to yo'o nyinnj.
7Žata'a yele, san bi ẕtasa'. Naka' ka to byinne žíaba' tozba' yichjo'o sibe.
8Tža tža ẕnne zí'tezgak benne' ka' bi ẕḻé'egekle' neda' chawe'. Benne' ka' ẕžá'agake' neda' ẕkóngekle' žin la' kate' ẕnne zí'gake' che no benne'.
9Kate' žawa' yet, naken ka žawa' de, na' nis ẕbeža' nchix̱en da' že'ja'.
10Ki žaken dan' ẕžo'o neda', na' žsaka' zi'o neda'. Bkwaso' neda', na' bžo'no' neda'.
11Nak yeḻa' nban chia' ka to ẕoḻ da' ẕdezen, na' naka' ka to yix̱e' da' ba nbižen.
12Le', X̱ana' Dios, to chi'ize zo'. Chejsá' ḻáže'gak yógo'te benách ka' La la'y chio'.
13Bezó ža', na' beyache' ḻaže'l benne' yež Sión ka', dan' ba bžin ža yenít ḻawo'o chégake'.
14Neto', wen žin chio', nži'ilto' yej ka' che yežen'. Žékelto' zi' dan' nbia yin'.
15Benne' yógo'te yež ka' gápegake' La la'y chio' ba la'ne, X̱anto' Dios. Žébegak yógo'te benne' wnná bia' ka' yeḻa' ẕen chio',
16kate' yechiso' yež Sión, X̱anto' Dios, na' ḻé'egekle' yeḻa' ẕen chen,
17dan' wzé nago' da' ẕnnábgekle benne' ka' wléj yichjo' na' biž wzó' cheḻa'ale da' žáta'yoegekle' Le'.
18Bzoj da' ni nich góḻgaken benne' ka' za' ḻá'gake', na' benne' ka' za' gáljgake' we ḻáwgake' X̱anžo Dios.
19Gan zoa X̱anžon' ya'abá bwie'. Gan zoe' ya'abá bḻe'ele' yežlyó nga,
20nich yenle' chegak benne' ka' ẕbeže nyáche'gake', benne' ka' zej nyejwe' liž ya, na' yeslé' benne' ka' ba nžog chégake' gátgake',
21nich wzéngekle' benne' yež Sión ka' kan nak ẕen La la'y che X̱anžo Dios, nich we ḻáwgake' Ḻe' ḻo yež Jerusalén,
22kate' ḻa'gak benách yógo'te yež ka', nich wká'n ẕéngake' X̱anžo Dios.
23X̱anžo Dios bzex̱jwe' yeḻa' waḻe chia', na' yeláte'ze ka bete' neda'.
24Naž wnnía': “Dios chia', bi goto' neda', kate' bi na' gola'. Le' to chi'ize zo'.”
25Ža ni'te bzo' yežlyó nga, na' ḻen no'o beno' ya'abá.
26Kwia yi'gak da' ka', san sóatezo' Le'. Te chegak yógo'te da' ka' kan žeywé to laže'. Kan ẕcha'to' ẕato' žeza', wchó'o da' ka',
27san bi ẕcha' kwino', na' batkle te chio'.
28Gape chi'o ẕi'nto' neto', benne' wen žin chio' ka', na' wzóa chochkzo' ẕa'sóto' ka' ḻawo' Le'.
